ആരോഗ്യനില തൃപ്തികരം; ഇരുപത് ദിവസത്തെ ചികിത്സകള്ക്കൊടുവിൽ ശ്രീനിവാസൻ ആശുപത്രി വിട്ടു
ഇരുപത് ദിവസത്തെ ചികിത്സകള്ക്കൊടുവിൽ നടൻ ശ്രീനിവാസനെ ആശുപത്രിയില് നിന്ന് ഡിസ്ചാര്ജ് ചെയ്തു. കൊച്ചി അപ്പോളോ അഡ്ലക്സ് ആശുപത്രിയിൽ ചികിത്സയിലായിരുന്ന ശ്രീനിവാസന് ബൈപാസ് സര്ജറി നടത്തിയിരുന്നു.
ഇപ്പോൾ ശ്രീനിവാസന്റെ ആരോഗ്യാവസ്ഥ തൃപ്തികരമാണെന്ന് ആശുപത്രി അധികൃതര് പുറത്തുവിട്ട മെഡിക്കല് ബുള്ളറ്റിനില് അറിയിച്ചു. കഴിഞ്ഞ മാസം 30 നാണ് ശ്രീനിവാസനെ ആശുപത്രിയില് പ്രവേശിപ്പിച്ചത്. തുടർന്ന് നടത്തിയ ആന്ജിയോഗ്രാം പരിശോധനയില് അദ്ദേഹത്തിന് ട്രിപ്പിള് വെസ്സല് ഡിസീസ് (ധമനികളിലെ രക്തമൊഴുക്കിന് തടസം നേരിടല്) കണ്ടെത്തിയിരുന്നു.
ഇതിനു പിന്നാലെ മാര്ച്ച് 31 വ്യാഴാഴ്ച്ച ബൈപാസ് സര്ജറിക്കും വിധേയനാക്കിയിരുന്നു. ശ്രീനിവാസന്റെ ആരോഗ്യവസ്ഥയില് കാര്യമായ പുരോഗതിയുണ്ടെന്നും തൃപ്തികരമാണെന്നുമാണ് ഡോ. അനില് എസ് ആര് പുറത്തിറക്കിയ മെഡിക്കല് ബുള്ളറ്റനില് പറയുന്നത്.