ആണവയുദ്ധം ഉണ്ടായാല് പോലും നേരിടാൻ ഇന്ത്യന് സൈന്യത്തിന് കഴിയും; ചൈനയ്ക്ക് മുന്നറിയിപ്പുമായി ബിപിൻ റാവത്ത്
ഇന്ത്യ അതിന്റെ അതിര്ത്തി പ്രദേശമായ വടക്ക്-കിഴക്ക് ഭാഗത്ത് ശക്തമായ വെല്ലുവിളികൾ നേരിടുന്നുണ്ടെന്നും ഇതിന് തക്കതായ ഭാഷയിൽ മറുപടി നൽകാൻ ശേഷി ഇന്ത്യയുടെ സൈന്യത്തിനുണ്ടെന്നും സംയുക്ത സൈനിക മേധാവി ബിപിൻ റാവത്ത്. ഇതുപോലുള്ള ഭീഷണികളെ നേരിടാൻ ഇന്ത്യ പദ്ധതി തയാറാക്കിയിട്ടുണ്ടെന്നും അദ്ദേഹം പറഞ്ഞു.
ഏതാനും നാളുകളായി കിഴക്കൻ ലഡാക്ക് മേഖലയിൽ ചൈനയുടെ സേന ഇന്ത്യയുമായി സംഘര്ഷം സൃഷ്ടിക്കുമ്പോഴാണ് സൈനിക മേധാവിയുടെ പ്രസ്താവനഎന്നത് ശ്രദ്ധേയമാണ്. അതേപോലെ തന്നെ ചൈന പാക് അധീന കശ്മീരിന് വലിയ രീതിയില് സാമ്പത്തിക പിന്തുണ നൽകുന്നുണ്ട്. പാകിസ്താന് ആവശ്യമായ സൈനിക-നയതന്ത്ര സഹായവും നൽകുന്നത് ചൈനയാണ്. ഈ നടപടികള് ഇന്ത്യയെ കൂടുതൽ കരുതലെടുക്കാൻ പ്രേരിപ്പിക്കുകയാണെന്നും അദ്ദേഹം പറഞ്ഞു.
ഒരു ആണവ യുദ്ധമുണ്ടായാൽ പോലും അതിനെ നേരിടാൻ ഇന്ത്യന് സൈന്യത്തിന് കഴിയുമെന്നും ബിപിൻ റാവത്ത് കൂട്ടിച്ചേർത്തു.ഇതോടൊപ്പം തന്നെ പാകിസ്താനും റാവത്ത് മുന്നറിയിപ്പ് നൽകി. ഇന്ത്യക്കെതിരായി ചൈനയുമായി ചേർന്ന് പ്രവർത്തിച്ചാൽ പാകിസ്താന് കനത്ത നഷ്ടമുണ്ടാവുമെന്ന് അദ്ദേഹം പറഞ്ഞു.