പ്രവാസികളെ നാട്ടിൽ തിരിച്ചെത്തിക്കണം: കണ്ണൂരിൽ കോൺഗ്രസ് ധർണ്ണ
പ്രവാസി മലയാളികളെ നാട്ടിലേക്ക് തിരിച്ചെത്തിക്കണം എന്നാവശ്യപ്പെട്ട് കണ്ണൂരിൽ കോൺഗ്രസിൻ്റെ ധർണ്ണ. പ്രവാസി മലയാളികളുടെ നാട്ടിലേക്കുള്ള മടങ്ങിവരവുമായി ബന്ധപ്പെട്ട് കേന്ദ്ര-സംസ്ഥാന സർക്കാരുകളുടെ മെല്ലെപ്പോക്ക് അവസാനിപ്പിക്കണമെന്നാവശ്യപ്പെട്ടാണ് കണ്ണൂർ വിമാനത്താവളത്തിന് മുന്നിൽ കോൺഗ്രസ് ധർണ നടത്തിയത്. കെപിസിസി അധ്യക്ഷൻ മുല്ലപ്പള്ളി രാമചന്ദ്രൻ വീഡിയോ കോൺഫറൻസിലൂടെ പ്രതിഷേധം ഉദ്ഘാടനം ചെയ്തു.
പ്രവാസികളെ നാട്ടിലെത്തിക്കാനുള്ള നടപടി വേഗത്തിലാക്കുക, പ്രതിസന്ധിയിലായവരുടെയും സാമ്പത്തികമായി പിന്നോക്കം നിൽക്കുന്ന പ്രവാസികളുടെയും വിമാനയാത്രാ ചിലവ് കേന്ദ്ര-സംസ്ഥാന സർക്കാരുകൾ വഹിക്കുക, തിരിച്ചെത്തുന്ന പ്രവാസികൾക്ക് ശാസ്ത്രീയമായ ക്വാറന്റൈൻ സൗകര്യം ഒരുക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു പ്രതിഷേധം.
എംപിമാരായ കെ.സുധാകരൻ, കെ. മുരളീധരൻ, രാജ്മോഹൻ ഉണ്ണിത്താൻ, സണ്ണി ജോസഫ് എംഎൽഎ, കാസർഗോഡ് ഡിസിസി പ്രസിഡന്റ് ഹക്കീം കുന്നിൽ, കണ്ണൂർ ഡിസിസി പ്രസിഡന്റ് സതീശൻ പാച്ചേനി തുടങ്ങിയവർ ധർണയിൽ പങ്കെടുത്തു.