മഹാരാഷ്ട്രയില്‍ തെരഞ്ഞെടുപ്പ് പ്രഖ്യാപിച്ച പിന്നാലെ ശരദ് പവാറിനും അജിത് പവാറിനുമെതിരെ എന്‍ഫോഴ്‌സ്‌മെന്റ് കേസ്
മഹാരാഷ്ട്രയിൽ തെരഞ്ഞെടുപ്പ് പ്രഖ്യാപിച്ച പിന്നാലെ എന്‍സിപി അധ്യക്ഷന്‍ ശരദ് പവാറിനും അനന്തരവനും മുന്‍ ഉപമുഖ്യമന്ത്രിയുമായ അജിത് പവാറിനുമെതിരെ എന്‍ഫോഴ്‌സ് ഡിപ്പാര്‍ട്ട്‌മെന്റ് കേസ് രജിസ്റ്റര്‍ ചെയ്തു. മഹാരാഷ്ട്ര സ്റ്റേറ്റ് കോ ഓപ്പറേറ്റീവ് ബാങ്ക് അഴിമതിയുമായി ബന്ധപ്പെട്ടാണ് കേസ്. ബാങ്ക് അഴിമതിയിൽ 25000 കോടി രൂപയുടെ തിരിമറി ആരോപണമാണ് ഇരുവര്‍ക്കുമെതിരെ ഉന്നയിക്കുന്നത്.
എന്‍ഫോഴ്‌സ്‌മെന്റ് കള്ളപ്പണം വെളുപ്പിക്കല്‍ നിരോധനനിയമ പ്രകാരമാണ് ഇരുവര്‍ക്കുമെതിരെ കേസ് ചുമത്തിയിരിക്കുന്നതെന്നാണ് റിപ്പോര്‍ട്ട്. മുംബൈ പോലീസ് രജിസ്റ്റര്‍ ചെയ്തിട്ടുള്ള പ്രഥമ വിവര റിപ്പോർട്ടിൽ നേരത്തെ അജിത് പവാറും ബാങ്കിലെ 70 ഉദ്യോഗസ്ഥരും ബാങ്ക് ഡയറക്ടറും പ്രതിയായിരുന്നു.
നിലവിൽ കേസ് രജിസ്റ്റര്‍ ചെയ്തതോടെ ശരദ് പവാറും അജിത് പവാറും മൊഴി നല്‍കാന്‍ എന്‍ഫോഴ്‌സ്‌മെന്റ് ഡയറക്ടറേറ്റില്‍ ഉടന്‍ എത്തുമെന്നാണ് റിപ്പോര്‍ട്ട്. അടുത്തമാസം 21 നാണ് മഹാരാഷ്ട്രയില്‍ തെരഞ്ഞെടുപ്പ്.
