യുവതിയുമായി ഒത്തുതീര്പ്പിന് ശ്രമിക്കുന്ന ബിനോയ് കോടിയേരിയുടെ ശബ്ദരേഖ പുറത്ത്
ബിഹാര് യുവതിയെ ലൈംഗികമായി ചൂഷണം ചെയ്തെന്ന കേസ് ഒത്തുതീര്പ്പാക്കാന് ബിനോയ് കോടിയേരി ശ്രമിച്ചതിന്റെ ശബ്ദരേഖ പുറത്തായി. മാതൃഭൂമി ന്യൂസാണ് ശബ്ദരേഖ പുറത്തുവിട്ടത്. അഞ്ചുകോടി രൂപ ആവശ്യപ്പെട്ട് യുവതി വക്കീല് മുഖേന നോട്ടീസയച്ചതിനെത്തുടര്ന്ന് ബിനോയ് ജനുവരി പത്തിന് അവരെ വിളിച്ചതിന്റെ ശബ്ദരേഖയാണ് പുറത്തുവന്നത്.
ഇതില് നഷ്ടപരിഹാരത്തുകയായ അഞ്ചു കോടി നല്കാനാവില്ലെന്നും ബിനോയ് പറയുന്നുണ്ട്. എന്നാല് ‘മകന്റെ ജീവിതത്തിന് വേണ്ടി നിങ്ങള്ക്ക് എത്ര നല്കാന് സാധിക്കും അത്ര നല്കൂ’ എന്നാണ് യുവതി പറയുന്നത്. അതേസമയം, കുട്ടിയുടെ പിതൃത്വം ബിനോയ് സംഭാഷണത്തില് നിഷേധിക്കുന്നില്ലെന്നതും ശ്രദ്ധേയമായ കാര്യമാണ്.
പണം കൊടുക്കാന് ചില വ്യവസ്ഥകളും ബിനോയ് മുന്നോട്ട് വെക്കുന്നുണ്ട്. ‘പണം തരണമെങ്കില് രണ്ട് കാര്യങ്ങള് നീ ചെയ്യണം, പേരിനൊപ്പം എന്റെ പേര് ചേര്ക്കുന്നത് നിര്ത്തണമെന്നും ഞാനുമായുള്ള ബന്ധം അവസാനിപ്പിക്കണ’മെന്നും ബിനോയ് പറയുന്നു.
ബിനോയി കോടിയേരിയുടേയും യുവതിയുടേയും ഫോണ് സംഭാഷണത്തിന്റെ പൂര്ണ്ണരൂപം
ബിനോയ്: ശരി, ആരു മുഖേനെയാണ് നീ കത്തയച്ചത്? അഭിഭാഷകന് വഴിയോ അതോ മറ്റാരെങ്കിലുമോ?
പരാതിക്കാരി: എന്റെ അഭിഭാഷകന് വഴി
ബിനോയ്: ശരി, പക്ഷേ, നിനക്ക് ആര് അഞ്ചുകോടി രൂപ നല്കും?
പരാതിക്കാരി: നിങ്ങള് എനിക്ക് അഞ്ചുകോടി തരില്ലെങ്കില് നിങ്ങളുടെ മകനു ജീവിക്കാന് ആവശ്യമായതെന്താണോ ആ തുക എത്രയെന്ന് നിനക്ക് തീരുമാനിക്കാം. എനിക്കൊന്നും വേണ്ട. പക്ഷേ, നിങ്ങളുടെ മകനുവേണ്ടി നിങ്ങളത് ചെയ്യണം.
ബിനോയ്: ശരി, ഒരു കാര്യം ചെയ്യ്. തിരക്കുപിടിച്ചൊന്നും ചെയ്യരുത്. ആളുകള് പലരീതിയിലാണ് പ്രതികരിക്കുന്നത്. ഓക്കെ?
പരാതിക്കാരി: ഞാനെന്തുചെയ്യണം?
ബിനോയ്: എന്തുചെയ്യണമെന്ന് ഞാന് പറയാം. എന്താണ് വേണ്ടതെന്നു വെച്ചാല് ചെയ്യാം. ഓക്കേ? പക്ഷേ, നിനക്ക് ഞാനുമായുള്ള ബന്ധം എന്താണോ അത് പൂര്ണമായും ഉപേക്ഷിക്കണം. നിന്റെ പേര് നീ മാറ്റണം. ഓക്കേ, നിനക്ക് ഇഷ്ടമുള്ളതുപോലെ നിനക്ക് ജീവിക്കാം.
പരാതിക്കാരി: ഓക്കേ.
ബിനോയ്: ഓക്കേ
പരാതിക്കാരി: നീ പറഞ്ഞ കാര്യങ്ങളെല്ലാം എപ്പോള് ശരിയാക്കും(മറ്റൊരു ഫോണ് റിങ് ചെയ്യുന്നു. പരാതിക്കാരി ഉച്ചത്തില്: നിങ്ങള് എന്താ പറയുന്നത്. കേള്ക്കുന്നില്ല. ഇതിനിടെ ഫോണ് കട്ടാവുന്നു.)