എത്ര വിജയമുണ്ടായിട്ടും കാര്യമില്ല; ബിജെപി ഉന്നതിയിലെത്തണമെങ്കിൽ കേരളം കീഴടങ്ങണമെന്ന് അമിത് ഷാ
ബിജെപിക്ക് കേരളത്തിലടക്കം മുന്നേറ്റമുണ്ടാക്കാതെ താന് തൃപ്തനാവുകയില്ലെന്നു കേന്ദ്ര ആഭ്യന്തരമന്ത്രി അമിത് ഷാ. ലോക്സഭാ തെരഞ്ഞെടുപ്പില് വലിയ വിജയം നേടിയെങ്കിലും കേരളത്തിലും ബംഗാളിലും സര്ക്കാര് രൂപീകരിക്കുന്നതുവരെ പാര്ട്ടി ഉന്നതിയിലെത്തിയില്ലെന്നും ബിജെപി നേതൃയോഗത്തില് അമിത് ഷാ വ്യക്തമാക്കി.
രാജ്യത്തെ എല്ലാ സംസ്ഥാനങ്ങളിലും ബിജെപി മുഖ്യമന്ത്രി അധികാരത്തില് വരുമെന്നും പഞ്ചായത്തുമുതല് പാര്ലമെന്റുവരെ എല്ലായിടത്തും ബിജെപി അംഗങ്ങളെത്തുകയും ചെയ്യുന്ന സാഹചര്യം ഉണ്ടാകുമെന്നും അമിത് ഷാ അഭിപ്രായപ്പെട്ടു.
2019 അവസാനിക്കുന്നതു വരെ ബിജെപിയില് നേതൃത്വമാറ്റം ഉണ്ടാകില്ലെന്നും അടുത്ത വര്ഷം മാത്രമെ അധ്യക്ഷനെ തെരഞ്ഞെടുക്കുകയുള്ളൂ എന്നും യോഗത്തില് തീരുമാനം എടുത്തിട്ടുണ്ട്. ഇതിനിടയില് വരുന്ന മഹാരാഷ്ട്ര, ഹരിയാന, ഝാര്ഖണ്ഡ് സംസ്ഥാനങ്ങളില് നടക്കുന്ന തെരഞ്ഞെടുപ്പ് അമിത് ഷായ്ക്ക് കീഴിലായിരിക്കും ബിജെപി നേരിടുക.