ഫ്രോഡുകൾക്കു രാജ്യം മാപ്പു നൽകാറില്ല: മോദിയോട് പ്രിയങ്ക
പ്രധാനമന്ത്രി നരേന്ദ്ര മോദിക്കെതിരേ ആഞ്ഞടിച്ച് എഐസിസി ജനറൽ സെക്രട്ടറിയും മകളുമായ പ്രിയങ്ക ഗാന്ധി. ഫ്രോഡുകൾക്കു രാജ്യം മറ്റുനൽകില്ലെന്നും മോദിക്ക് അമേഠിയിലെ ജനങ്ങൾ മറുപടി നൽകുമെന്നും പ്രിയങ്ക ട്വീറ്റ് ചെയ്തു. രാജീവ് ഗാന്ധിക്കെതിരായ മോദിയുടെ പരാമർശത്തിനെതിരെയാണ് പ്രിയങ്ക രംഗത്തെത്തിയത്.
വീരമൃത്യു വരിച്ച ധീര സൈനികരുടെ പേരിൽ വോട്ട് ചോദിച്ച് ആ രക്തസാക്ഷിത്വങ്ങളെ അപമാനിച്ച പ്രധാനമന്ത്രി, ഒരു ധീരന്റെ രക്തസാക്ഷിത്വത്തെ കൂടി അപമാനിച്ചിരിക്കുന്നു. രാജീവ് ഗാന്ധി ജീവൻ നൽകിയ അമേഠിയിലെ ജനങ്ങൾ ഇതിന് മോദിക്കു മറുപടി നൽകും. ഫ്രോഡുകൾക്കു രാജ്യം മാപ്പു നൽകാറില്ലെന്നും മോദിയോടു പ്രിയങ്ക ട്വിറ്ററിൽ പറഞ്ഞു.
നേരത്തെ, രാജീവ് ഗാന്ധി ഒന്നാം നന്പർ അഴിമതിക്കാരനായിരുന്നെന്ന മോദിയുടെ പരാമർശത്തിനു മറുപടിയുമായി മകനും കോണ്ഗ്രസ് അധ്യക്ഷനുമായി രാഹുൽ ഗാന്ധിയും രംഗത്തെത്തിയിരുന്നു. മോദിക്ക് മോദിയെക്കുറിച്ച് തോന്നുന്ന കാര്യം മറ്റുള്ളവരുടെ മേൽ ചാരേണ്ടെന്നും അത് നിങ്ങളെ സംരക്ഷിക്കില്ലെന്നും നിങ്ങളുടെ കർമഫലം നിങ്ങൾ അനുഭവിക്കുമെന്നും രാഹുൽ മോദിയോടു പറഞ്ഞു.