തിരുവനന്തപുരം നഗരത്തില് നിന്ന് തട്ടിക്കൊണ്ടുപോയ യുവാവിനെ കൊല്ലപ്പെട്ട നിലയില് കണ്ടെത്തി
തിരുവനന്തപുരം: തിരുവനന്തപുരം നഗരത്തില് നിന്ന് കഴിഞ്ഞ ദിവസം തട്ടിക്കൊണ്ടുപോയ യുവാവിനെ മരിച്ച നിലയില് കണ്ടെത്തി. കൊഞ്ചിറവിള സ്വദേശി അനന്ദു ഗിരീഷിനെയാണ് മരിച്ച നിലയില് കണ്ടെത്തിയത്. കരമനയിലെ ബൈക്ക് ഷോറൂമിന് സമീപത്താണ് മൃതദേഹം കണ്ടെത്തിയത്.
ബൈക്കില് കരമന ഭാഗത്തേക്ക് യാത്ര ചെയ്യുകയായിരുന്ന അനന്ദുവിനെ രണ്ട് പേര് ചേര്ന്നാണ് തട്ടിക്കൊണ്ടുപോയത്. അനന്ദുവിന്റെ ഫോണിലേക്ക് സുഹൃത്ത് വിളിച്ചപ്പോഴാണ് തട്ടിക്കൊണ്ടുപോയെന്ന വിവരം മനസ്സിലാകുന്നത്. പിന്നീട് ഫോണ് സ്വിച്ച് ഓഫ് ആയി.
തമ്പാനൂര് ഭാഗത്താണ് അവസാനമായി സംഘത്തെ കണ്ടത്. നഗരത്തിലെ വിവിധ ഭാഗങ്ങളിലെ സി.സി.ടി.വി കാമറകള് പരിശോധിച്ച് വരികെയാണ് യുവാവിനെ മരിച്ച നിലയില് കരമനയില് നിന്നും കണ്ടെത്തുന്നത്. കൊഞ്ചിറവിള ക്ഷേത്ര ഉത്സവത്തിനിടെ അനന്ദുവും മറ്റൊരു സംഘവുമായി തര്ക്കമുണ്ടായിരുന്നു. ഇതാണ് സംഭവത്തിന്റെ പിന്നിലെന്നാണ് സൂചന. സംഭവത്തില് പോലീസ് അന്വേഷണം തുടങ്ങി.