പ്രവാസി യാത്രക്കാരുടെ ഭാരമേറിയ ലഗേജുകള് കയറ്റുകയും സ്റ്റോപ്പുകളില് സുരക്ഷിതമായി ഇറക്കി കൊടുക്കയും ചെയ്യുന്ന ഒരു കണ്ടക്ടര്; കെഎസ്ആര്ടിസിയില് ഇങ്ങനെയും ചിലരുണ്ട്
കെഎസ്ആര്ടിസിക്കെതിരെ ഒരുപാട് പരാതികളുണ്ടാവാറുണ്ട്. പലപ്പോഴും അവ വലിയ തോതില് ചര്ച്ചകളാവാറുമുണ്ട്. എന്നാല് ഈ ആനവണ്ടിയും ജീവനക്കാരും ഒത്തിരി നന്മകളുടെ കാവലാളുകളും ആകാറുണ്ട്. അര്ദ്ധരാത്രിയില് റോഡില് ഒറ്റപ്പെട്ടു പോയ സ്ത്രീക്ക് കാവല് നിന്നതുള്പ്പെടെ പല സംഭവങ്ങളും ഉദാഹരണങ്ങളായിട്ടുണ്ട്. എന്നാല് ചെറിയൊരു പിഴവില് അതൊക്കെ നമ്മള് മറന്നുപോകുകയാണ് പതിവ്.
എന്നാല് ചില നന്മമരങ്ങളായ കെഎസ്ആര്ടിസി ജീവനക്കാര്ക്ക് അതിലൊന്നും പരാതിയെ ഇല്ല. കെഎസ്ആര്ടിസി കണ്ടക്ടര്മാരെ കുറിച്ചുള്ള നമ്മുടെ മുന്ധാരണകളെല്ലാം മാറ്റുന്നതാണ് പിയൂഷ് എന്നയാള് ഫെയ്സ്ബുക്കില് ഷെയര് ചെയ്തിരിക്കുന്ന ഒരു പോസ്റ്റ്. നെടുമ്പാശ്ശേരി എയര്പോര്ട്ടില് നിന്നും മലപ്പുറത്തേക്കുള്ള യാത്രക്കിടെ പ്രവാസി യാത്രക്കാരുടെ ലഗേജുകള് സുരക്ഷിതമായി ഇറക്കി കൊടുക്കുകയും മറ്റുള്ളത് സുരക്ഷിതമായി അടുക്കി വെക്കുകയും ചെയ്യുകയാണ് ഈ കണ്ടക്ടര്.
ഒരു കണ്ടക്ടര്മാരും ഇതേപോലെ യാത്രക്കാരോട് ഇത്ര സഹകരണത്തില് പെരുമാറില്ലെന്നും ഫെയ്സ്ബുക്ക് പോസ്റ്റില് പറയുന്നു. പോസ്റ്റ് വൈറലായതിനു പിന്നാലെ നിരവധി പേരാണ് കണ്ടക്ടറെ അഭിനന്ദിച്ച് രംഗത്തെത്തിയത്. മലപ്പുറം ജില്ലയിലെ കോട്ടക്കല് കോട്ടൂര് സ്വദേശി ഫൈസല് കറുത്തേടത്താണ് ഈ കണ്ടക്ടര് എന്ന് ഒരാള് കമന്റു ചെയ്യുകയും ചെയ്തിട്ടുണ്ട്.