കാവ്യാമാധവന് കൈകുഞ്ഞുമായി വനിതാമതിലില് അണിചേരും: അഡ്വ. ജയശങ്കര്
സര്ക്കാര് സംഘടിപ്പിക്കുന്ന വനിത മതിലില് നിന്ന് നടി മഞ്ജു വാരിയര് പിന്മാറിയതിനെ പരിസഹസിച്ച് രാഷ്ട്രീയ നിരീക്ഷകന് അഡ്വ.ജയശങ്കര്. മഞ്ജു വാരിയര് പിന്മാറിയതോടെ വനിത മതില് വിജയിപ്പിക്കേണ്ടത് അമ്മ സംഘടനയുടെയും ദിലീപ് ഫാന്സ് അസോസിയേഷന്റെയും അഭിമാനപ്രശ്നമായി മാറി. കാവ്യ മാധവന് കൈകുഞ്ഞുമായി വനിത മതിലില് അണിചേരാനും സാധ്യതയെന്നു ജയശങ്കര് പറഞ്ഞു. ഫെയ്സ്ബുക്കിലൂടെയാണ് മഞ്ജുവിനെ ജയശങ്കര് പരിഹസിച്ചത്.
ഫെയ്സ്ബുക്ക് പോസ്റ്റിന്റെ പൂര്ണരൂപം വായിക്കാം:
മഞ്ജു വാര്യര് വനിതാ മതിലിനുളള പിന്തുണ പിന്വലിച്ചു.
സമസ്ത കേരള വാര്യര് സമാജം നവോത്ഥാന മൂല്യങ്ങളെയും വനിതാ മതിലിനെയും എതിര്ക്കുന്നതു കൊണ്ടല്ല, ഒടിയന് സിനിമക്കെതിരെ നടന്ന ഒടിവിദ്യയില് മനംനൊന്തിട്ടുമല്ല മഹാനടി മനസ്സു മാറ്റിയത്.
മട്ടുപ്പാവിലെ പച്ചക്കറി കൃഷി പോലെ എന്തോ സര്ക്കാര് പരിപാടിയാണ് വനിതാ മതില് എന്നാണ് മഞ്ജു കരുതിയത്രേ. മതിലിനു രാഷ്ട്രീയവും മതവും ജാതിയും ഉപജാതിയും നവോത്ഥാന പാരമ്പര്യവും ഉണ്ടെന്ന് സ്വപ്നേപി അറിഞ്ഞില്ല.
കലയാണ് മഞ്ജു വാര്യരുടെ രാഷ്ട്രീയം. സിനിമ, നൃത്തം, പരസ്യം അതിനപ്പുറം ഒരു രാഷ്ട്രീയവും അറിയില്ല, പറയില്ല, താല്പര്യമില്ല. അതുകൊണ്ട് മതിലു പണിയില് നിന്ന് സവിനയം പിന്മാറുന്നു. സോറി.
മഞ്ജു വാര്യര് പിന്മാറിയതോടെ വനിതാ മതില് വിജയിപ്പിക്കേണ്ടത് ‘അമ്മ’സംഘടനയുടെയും ദിലീപ് ഫാന്സ് അസോസിയേഷന്റെയും അഭിമാനപ്രശ്നമായി മാറി. കാവ്യ മാധവന് കൈക്കുഞ്ഞുമായി വനിതാ മതിലില് അണിചേരാനും സാധ്യത.
ജനപ്രിയ നായകനൊപ്പം,
നവോത്ഥാന മൂല്യങ്ങള്ക്കൊപ്പം.