കെപി ശശികലയെ പൊലീസ് അറസ്റ്റ് ചെയ്തു:ഇന്ന് സംസ്ഥാന വ്യാപക ഹര്‍ത്താല്‍
ശബരിമല: ഹിന്ദു ഐക്യവേദി സംസ്ഥാന അധ്യക്ഷ കെപി ശശികലയെ പൊലീസ് അറസ്റ്റ് ചെയ്തു. ശബരിമലക്ക് പോകാനെത്തിയ ശശികലയെ മരക്കൂട്ടത്തു വെച്ച്‌ പൊലീസ് തടഞ്ഞിരുന്നു. ശബരിമലയിലേക്ക് പോകരുതെന്നും തിരിച്ചുപോകണമെന്നുമുള്ള പൊലീസ് നിര്‍ദ്ദേശം അവഗണിച്ചതിനെ തുടര്‍ന്നാണ് അറസ്റ്റ് ചെയ്ത് നീക്കിയത്. മരക്കൂട്ടത്തുവെച്ചാണ് ശശികലയെ പോലീസ് അറസ്റ്റ് ചെയ്തത്.തിരികെ പോകണമെന്ന് പൊലീസ് നിര്‍ദ്ദേശിച്ചെങ്കിലും കൂട്ടാക്കാന്‍ തയ്യാറാകാത്തതിനെ തുടര്‍ന്നാണ് അഞ്ചുമണിക്കൂറോളം തടഞ്ഞുവച്ചതിന് ശേഷം ശശികലയെ അറസ്റ്റ് ചെയ്തത്.
കെ.പി. ശശികലയെ അറസ്റ്റ് ചെയ്തതില്‍ പ്രതിഷേധിച്ച്‌ സംസ്ഥാനത്ത് ഇന്ന് ഹര്‍ത്താലിന് ആഹ്വാനം. ഹിന്ദു ഐക്യവേദിയും ശബരിമല കര്‍മസമിതിയുമാണ് ഹര്‍ത്താലിന് ആഹ്വാനം നല്‍കിയത്. രാവിലെ ആറു മുതല്‍ വൈകിട്ട് ആറു വരെയാണു ഹര്‍ത്താല്‍.
ഹിന്ദു ഐക്യവേദി നേതാവ് ഭാര്‍ഗവറാമിനെയും ശബരിമല ആചാര സംരക്ഷണസമിതി ജനറല്‍ സെക്രട്ടറി പൃഥ്വിപാലനെയും പമ്പയില്‍ പോലീസ് കസ്റ്റഡിയിലെടുത്തിരുന്നു. ഇവര്‍ സന്നിധാനത്തേക്ക് കടന്നുചെന്നാല്‍ ഉണ്ടാകാവുന്ന പ്രശ്നസാധ്യത കണക്കിലെടുത്താണ് പോലീസിന്‍റെ നടപടി.
