പെട്രോള്‍ വില താരതമ്യം ചെയ്യാന്‍ ആമിറിന്റെ ചിത്രങ്ങളുമായി കോണ്‍ഗ്രസ്
പെട്രോള്‍, ഡീസല്‍ വില വര്‍ധനയ്ക്കെതിരെ ഭാരത് ബന്ദ് തുടരുന്നതിനിടെ സോഷ്യല്‍ മീഡിയയിലും പ്രതിഷേധം പുകയുകയാണ്. യുപിഎ, എൻഡിഎ കാലത്തെ ഇന്ധനവില താരതമ്യം ചെയ്യുന്നതിനായി ബോളിവുഡ് സിനിമ ദംഗലിലെ ആമിർ ഖാന്റെ ചിത്രങ്ങളാണു കോൺഗ്രസിന്റെ സമൂഹമാധ്യമ വിഭാഗം മേധാവി ദിവ്യ സ്പന്ദന ട്വീറ്റ് ചെയ്തത്.
ഗുസ്തി താരമായി മെലിഞ്ഞിരിക്കുന്ന ആമിറിന്റെ ചിത്രം യുപിഎ കാലത്തെ പെട്രോൾ വിലയോടും പ്രായമായി കുടവയറുമായി നിൽക്കുന്ന ആമിറിന്റെ ചിത്രം എൻഡിഎ കാലത്തെ പെട്രോൾ വിലയോടും ഉപമിച്ചുള്ള ട്വീറ്റാണു ദിവ്യ സ്പന്ദനയുടേത്. ട്വീറ്റിനെ അനുകൂലിച്ചും എതിര്‍ത്തും നിരവധി പേര്‍ മറുപടിയുമായെത്തി.
മോദി സർക്കാർ എല്ലാ റെക്കോർഡുകളും ഭേദിച്ചിരിക്കുകയാണെന്ന കുത്തുമായി കോൺഗ്രസിന്റെ ട്വീറ്റുമുണ്ട്. രൂപയുടെ നിരക്ക് ഏറ്റവും താഴ്ന്ന നിലയിലാണെന്നും ഇന്ധനവില ഏറ്റവും ഉയർന്ന നിലയിലാണെന്നുമുള്ള ട്വീറ്റിൽ മോദി സർക്കാർ സമ്പ‌ദ്‌വ്യവസ്ഥയെ കൈകാര്യം ചെയ്യുന്നതിൽ പൂർണ പരാജയമാണെന്നും കുറ്റപ്പെടുത്തുന്നു.
