നിരാഹാര സമരത്തിനിടെ പ്രവര്‍ത്തകര്‍ ബിരിയാണി കഴിക്കുന്ന ചിത്രങ്ങള്‍ വൈറല്‍

single-img
4 April 2018

Support Evartha to Save Independent journalism

വെല്ലൂര്‍: കാവേരി നദീജല തര്‍ക്കവുമായി ബന്ധപ്പെട്ട് കാവേരി ബോര്‍ഡ് രൂപീകരിക്കണമെന്ന് ആവശ്യപ്പെട്ട് തമിഴ്‌നാട്ടില്‍ അണ്ണാ ഡി.എം.കെ നടത്തിയ ഏകദിന നിരാഹാര സമരത്തിനിടെ പ്രവര്‍ത്തകര്‍ ബിരിയാണി കഴിക്കുന്ന ചിത്രങ്ങള്‍ വൈറലാവുന്നു. കഴിഞ്ഞ ദിവസം വെല്ലൂര്‍ ഹെഡ്‌പോസ്റ്റ് ഓഫീസിന് മുന്നിലായിരുന്നു അണ്ണാ ഡി.എം.കെ പ്രവര്‍ത്തകര്‍ നിരാഹാര സമരം ആംരംഭിച്ചത്.

സമരത്തിനിടെ പ്രവര്‍ത്തകര്‍ ബിരിയാണി കഴിക്കുന്ന ചിത്രം ആരോ പകര്‍ത്തി സോഷ്യല്‍ മീഡിയയില്‍ പ്രചരിപ്പിക്കുകയായിരുന്നു. എന്നാല്‍ തങ്ങള്‍ കഴിച്ചത് ബിരിയാണി അല്ലെന്നും വെറും തക്കാളി ചോറാണെന്നും ചിലര്‍ ന്യായീകരിക്കാന്‍ ശ്രമിച്ചതും സോഷ്യല്‍ മീഡിയയുടെ പരിഹാസത്തിനിടയാക്കി.

കാവേരി ബോര്‍ഡ് രൂപീകരിക്കാന്‍ കേന്ദ്രസര്‍ക്കാര്‍ മടിക്കുന്നുവെന്ന് ആരോപിച്ചാണ് സംസ്ഥാനത്തിന്റെ വിവിധയിടങ്ങളില്‍ അണ്ണാ ഡി.എം.കെ നിരാഹാര സമരം സംഘടിപ്പിച്ചത്. മുഖ്യമന്ത്രി ഇ.പളനിസാമിയാണ് ചെന്നൈയില്‍ ഇത് ഉദ്ഘാടനം ചെയ്തത്. മന്ത്രിസഭയിലെ മുഴുവന്‍ അംഗങ്ങളും മുതിര്‍ന്ന പാര്‍ട്ടി നേതാക്കളും ഇതില്‍ പങ്കെടുത്തിരുന്നു. കൃത്യം എട്ട് മണിക്ക് പ്രഭാത ഭക്ഷണം കഴിച്ച് ആരംഭിച്ച നിരാഹാര സമരം വൈകുന്നേരം അഞ്ച് മണിക്കാണ് അവസാനിച്ചത്.

എന്നാല്‍ കേന്ദ്രസര്‍ക്കാരിനെതിരെ സമരം നടത്തുന്നത് നാട്ടുകാരുടെ കണ്ണില്‍ പൊടിയിടാനാണെന്നാണ് പ്രതിപക്ഷത്തിന്റെ ആരോപണം. ഇതിനിടെ ഭക്ഷണം കഴിക്കുന്ന പ്രവര്‍ത്തകരുടെ ചിത്രം പ്രചരിച്ചത് അണ്ണാ ഡി.എം.കെയ്ക്ക് കനത്ത തിരിച്ചടിയായി.