സംഘപരിവാറിന്റെ കണ്ണില്ലാ ക്രൂരത വീണ്ടും: കണ്ണുകാണാത്ത വൃദ്ധനെ ഭീഷണിപ്പെടുത്തി ജയ് ശ്രീറാം വിളിപ്പിച്ചു; വീഡിയോ
ബംഗാളിലെ അസന്‍സോളില്‍ വര്‍ഗീയ സംഘര്‍ഷമുണ്ടായതിന് പിന്നാലെ, വൃദ്ധനെ ഭീഷണിപ്പെടുത്തുന്ന സംഘപരിവാര്‍ ക്രൂരതയുടെ ദൃശ്യങ്ങള്‍ പുറത്ത്. വയോധികനെ നിര്‍ബന്ധിച്ച് കൊടി പിടിപ്പിക്കുകയും ജയ് ശ്രീറാം വിളിപ്പിക്കുകയും ചെയ്തു. വെറുതെ വിടൂ മക്കളേ എന്ന് യാചിച്ചിട്ടും സംഘം ക്രൂരത തുടരുകയായിരുന്നു.
‘ഞങ്ങള്‍ക്ക് കണ്ണ് കാണില്ല. നടക്കാനും ബുദ്ധിമുട്ടാണ്. ഞാന്‍ ഇസ്‌ലാം മത വിശ്വാസിയാണ്. അല്ലാഹുവും ഭഗവാനുമെല്ലാം ഒന്നല്ലേ. ഹിന്ദുവും മുസ്‌ലിമും ഒന്നല്ലേ. വെറുതെവിടൂ’- എന്ന് വൃദ്ധന്‍ കെഞ്ചിയിട്ടും ഫലമുണ്ടായില്ല. ജയ് ശ്രീറാമെന്ന് വിളിക്കാന്‍ കണ്ണ് കാണേണ്ട ആവശ്യമില്ല, വായ കൊണ്ട് വിളിച്ചാല്‍ മതിയെന്ന് സംഘം ആക്രോശിച്ചു.
ഗുണ്ടകള്‍ കയ്യേറ്റത്തിന് ശ്രമിച്ചതോടെ വൃദ്ധന്‍ ജയ് ശ്രീറാമെന്ന് വിളിച്ചു. വീണ്ടും വീണ്ടും ഉറക്കെ ജയ്ശ്രീറാം, ജയ് മാതാ റാം എന്ന് വിളിപ്പിച്ചു. ഇതിനുശേഷമാണ് ഭിക്ഷയെടുത്ത് ജീവിക്കുന്ന ആ ദമ്പതികളെ പോകാന്‍ അനുവദിച്ചുള്ളൂ.
