4000 രൂപയ്ക്ക് കിട്ടിയത് ഒരു ഷൂ, പഴയ ബെല്റ്റ്, കുറച്ചു കടലാസുകള്: വീണ്ടും ഓണ്ലൈന് തട്ടിപ്പ്
22 March 2018
ഓണ്ലൈനിലൂടെ സാധനങ്ങള് വാങ്ങാന് നാലായിരം രൂപയടച്ചയാള്ക്ക് കിട്ടിയത് പഴയ ഷൂസും പൊട്ടിപ്പൊളിഞ്ഞ ബെല്റ്റും. കയ്പമംഗലം മൂന്നുപീടിക സ്വദേശി രാഹുല് മാര്ച്ച് 15നാണ് ചെന്നൈ ആസ്ഥാനമായുള്ള എമൈസ് എന്റര്പ്രൈസസ് എന്ന സ്ഥാപനത്തില്നിന്ന് ബെല്റ്റ്, പഴ്സ്, ഒരു ജോഡി ഷൂസ് എന്നിവയ്ക്ക് ഓര്ഡര് നല്കിയത്.
അറിയിപ്പ് ലഭിച്ചതിനെ തുടര്ന്ന് ബുധനാഴ്ച പോസ്റ്റോഫീസിലെത്തി നാലായിരം രൂപയടച്ച് പാര്സല് വാങ്ങി തുറന്നുനോക്കിയപ്പോഴാണ് കബളിപ്പിക്കപ്പെട്ടതായി മനസ്സിലായത്. കവറിനുള്ളില് ഒരു ഷൂവും പഴയതും പൊട്ടിപ്പൊളിഞ്ഞതുമായ ബെല്റ്റും കടലാസുകളും മാത്രമാണുണ്ടായിരുന്നത്.
ഉടന്തന്നെ കമ്പനിയുമായി ബന്ധപ്പെട്ടെങ്കിലും അവ്യക്തമായ മറുപടിയാണ് ലഭിച്ചതെന്ന് രാഹുല് പറഞ്ഞു. പണം തിരികെ നല്കണമെന്നാവശ്യപ്പെട്ട് പോസ്റ്റോഫീസില് പരാതി നല്കിയ രാഹുല് മതിലകം പോലീസിലും പരാതി നല്കി.