National

നോട്ട്​ പിൻവലിക്കൽ തീരുമാനമെടുത്തത്​ ആർ.എസ്​.എസെന്ന് രാഹുൽ ഗാന്ധി

ബംഗളൂരു: നോട്ട്​ പിൻവലിക്കൽ തീരുമാനമെടുത്തത്​ ആർ.എസ്​.എസ് ആയിരുന്നുവെന്ന രൂക്ഷ വിമർശനവുമായി കോൺഗ്രസ്​ അധ്യക്ഷൻ​ രാഹുൽ ഗാന്ധി രംഗത്ത്. കർണാടകയിൽ നടന്ന തെരഞ്ഞെടുപ്പ്​ പ്രചാരണത്തിനിടെയാണ്​ ബി.ജെ.പി നേതൃത്വത്തെയും മോദി സർക്കാറിനെയും വീണ്ടും പ്രതിരോധത്തിലാക്കികൊണ്ടുള്ള രാഹുലിന്റെ പരാമർശം.

നോട്ട്​ പിൻവലിക്കാനുള്ള കേന്ദ്രസർക്കാർ തീരുമാനത്തിന്​ പിന്നിൽ ആർ.ബി.​ഐ അല്ല മറിച്ചു ആർ.എസ്​.എസ്​ ആണെന്നും രാഹുൽ ഗാന്ധി പറഞ്ഞു.

കേന്ദ്രസർക്കാറിനെ നിലവിൽ നയിക്കുന്നത്​ ആർ.എസ്​.എസാണ്​. എല്ലാ മന്ത്രാലയങ്ങളിലും ആർ.എസ്​.എസിന്​ വേണ്ടപ്പെട്ടവരാണ്​ ഉള്ളത്​. ആർമിയെ പരിഹസിക്കുന്ന പ്രസ്​താവനയാണ്​ മോഹൻ ഭാഗവത്​ നടത്തിയത്​. ഹിന്ദുത്വ വിഷയങ്ങളുയർത്തി കർണാടക തെരഞ്ഞെടുപ്പിനെ സ്വാധീനിക്കാനാണ്​ ബി.ജെ.പി ശ്രമിക്കുന്നതെന്നും രാഹുൽ കുറ്റപ്പെടുത്തി.

കഴിഞ്ഞ നാല്​ ദിവസമായി കർണാടകയിൽ തെരഞ്ഞെടുപ്പ്​ പ്രചാരണത്തിലാണ്​ രാഹുൽ ഗാന്ധി. ആറ്​ ജില്ലകളിലായി 700 കിലോ മീറ്റർ ദൂരം രാഹുൽ സഞ്ചരിച്ചിരുന്നു.