ഫെയ്‌സ്ബുക്കിലെ വ്യാജന്‍മാരില്‍ കൂടുതലും ഇന്ത്യക്കാര്‍; ആകെ 20 കോടി വ്യാജ അക്കൗണ്ടുകള്‍!!
ഫെയ്‌സ് ബുക്കില്‍ വ്യാജ പ്രൊഫൈലുകളില്‍ മുന്നില്‍ നില്‍ക്കുന്നത് ഇന്ത്യക്കാരെന്ന് കണക്കുകള്‍. ലോകത്ത് 20 കോടി ഫെയ്‌സ്ബുക്ക് അക്കൗണ്ടുകള്‍ വ്യാജമോ ഇരട്ടിപ്പോ ആണെന്ന് കണ്ടെത്തി. ഇത് സജീവമായുള്ള അക്കൗണ്ടുകളുടെ 10 ശതമാനത്തോളം വരും.
ഇക്കാര്യത്തില്‍ ഇന്ത്യയാണ് മുന്നിലെന്നും ഫെയ്‌സ്ബുക്കിന്റെ തന്നെ വാര്‍ഷിക റിപ്പോര്‍ട്ടില്‍ പറയുന്നു. കഴിഞ്ഞ ഡിസംബര്‍ വരെയുള്ള കണക്കാണിത്. ഇന്ത്യയെക്കൂടാതെ ഇന്‍ഡൊനീഷ്യ, ഫിലിപ്പീന്‍സ്, വിയറ്റ്‌നാം രാജ്യങ്ങളിലും ഇത്തരം അക്കൗണ്ടുകള്‍ വളരെക്കൂടുതലാണ്.
അതേസമയം സജീവമായുള്ള അക്കൗണ്ടുകളുടെ എണ്ണം മുന്‍വര്‍ഷത്തേതില്‍നിന്നു കഴിഞ്ഞ വര്‍ഷംം വര്‍ധിച്ചിട്ടുണ്ട്. 213 കോടിയാണ് കഴിഞ്ഞ വര്‍ഷത്തെ കണക്ക്. ഇത് 2016ലേതിനേക്കാള്‍ 14 ശതമാനം കൂടുതലാണ്. ആ വര്‍ഷം 186 കോടിയായിരുന്നു എല്ലാ മാസവും സജീവമായുള്ള അക്കൗണ്ടുകളുടെ ആകെ എണ്ണം.
അന്ന് 11.4 കോടിയായിരുന്നു വ്യാജ അക്കൗണ്ടുകളുടെ എണ്ണം. അതേസമയം ദിവസവും സജീവമായുള്ള അക്കൗണ്ടുകളുടെ കാര്യത്തിലും 14 ശതമാനം വര്‍ധനയുണ്ടായിട്ടുണ്ട്. ഇക്കാര്യത്തിലും മുന്നില്‍ ഇന്ത്യയാണ്. ഇന്‍ഡൊനീഷ്യ, ബ്രസീല്‍ എന്നീ രാജ്യങ്ങള്‍ പിറകെയും. ഒരാള്‍ അയാളുടെ പ്രധാന അക്കൗണ്ട് കൂടാതെ ഉപയോഗിക്കുന്ന മറ്റ് അക്കൗണ്ടുകളെയാണ് വ്യാജമെന്ന് ഫെയ്‌സ്ബുക്ക് വിശേഷിപ്പിക്കുന്നത്. എന്നാല്‍ വ്യാജ പ്രൊഫൈലുകളെ നിരുത്സാഹപ്പെടുത്താന്‍ ഫെയ്‌സ് ബുക്ക് തയ്യാറാകില്ല.
