ആവിഷ്കാരത്തിന്റെ രീതി 51 വെട്ടാണ്: ബൽറാമിനു പിന്തുണയുമായി കെ എം ഷാജി

എ കെ ജി വിവാദത്തിൽ കോൺഗ്രസ്സ് എം എൽ ഏ ആയ വി ടി ബൽറാമിനു പിന്തുണയുമായി യൂത്ത് ലീഗ് നേതാവും എം എൽ ഏയുമായ കെ എം ഷാജി. തന്റെ ഫെയ്സ്ബുക്ക് പോസ്റ്റിലൂടെയാണു അദ്ദേഹം ബൽറാമിനു പിന്തുണ അറിയിച്ചത്.

മറ്റുള്ളവരെയെല്ലാം വിമർശിക്കുന്ന കമ്മ്യൂണിസ്റ്റ് അനുഭാവികൾ സ്വന്തം കാര്യം വരുമ്പോൾ ആവിഷ്കാര സ്വാതന്ത്ര്യത്തിനു പരിധി നിശ്ചയിക്കുന്നത് ഇരട്ടത്താപ്പാണെന്ന് സൂചിപ്പിച്ചുകൊണ്ടാണു കെ എം ഷാജി ഫെയ്സ്ബുക്കിൽ പോസ്റ്റ് ഇട്ടത്.

“കാലങ്ങളായി സ്വന്തം പുരയിടത്തിലെ മാലിന്യം അയൽപക്കത്തെ വീട്ടിലേക്കിടുന്ന പണിയായിരുന്നു ഇടതുപക്ഷം നിർവഹിച്ചത്. അത് കോരിയെടുത്ത് ഒരു പയ്യൻ ” ഇതാ നിങ്ങളുടെ മാലിന്യം ” എന്നു പറഞ്ഞ് മാന്യതയില്ലാത്ത അയൽക്കാരന്റെ വീട്ടിലേക്ക് തിരിച്ച് നിക്ഷേപിച്ചിരിക്കുന്നു. അത് കണ്ട അയൽക്കാരന് ശുണ്ഠി പിടിച്ചിരിക്കുന്നു. അയൽക്കാരാ, ശുണ്ഠി പിടിക്കേണ്ട. അയാൾ നിനക്ക് തിരിച്ചറിവ് നൽകിയിരിക്കുകയാണ്.“ കെ എം ഷാജി പറയുന്നു.

കെ എം ഷാജിയുടെ ഫെയ്സ്ബുക്ക് പോസ്റ്റിന്റെ പൂർണ്ണ രൂപം:

ആവിഷ്കാര സ്വാതന്ത്ര്യത്തിന്റെ അതിർത്തി എവിടെയെന്ന ചോദ്യത്തിനുള്ള ഉത്തരമാണ് ഇപ്പോൾ കിട്ടിയിരിക്കുന്നത്. സഖാക്കളുടെ ആക്ഷേപവും, മോർഫിങ്ങും, മതനിന്ദയും, വ്യാജ ആരോപണങ്ങളും ആവിഷ്കാരത്തിന്റെ പരിധിയിലാണ് വരുന്നത്. മത വിശ്വാസത്തെയും, സാംസ്കാരിക ചിഹ്നങ്ങളെയും അവഹേളിക്കുന്നത് ആവിഷ്കാരസ്വാതന്ത്ര്യമാണ്. എന്നാൽ എ കെ ജിയെ വിമർശിക്കരുത്.

മുഖ്യമന്ത്രിയെ കല്ലെറിഞ്ഞതും, മൻമോഹനെ ആക്ഷേപിച്ചതും ആവിഷ്കാരമാണ്. എന്നാൽ എ കെ ജിയെ തൊട്ടു കളിക്കരുത്. ആത്മകഥ പോലും വിമർശനാത്മകമായി വായിക്കരുത്. വായിച്ചാൽ ഓഫിസ് തല്ലിത്തകർക്കും, കിട്ടിയാൽ കൈകാര്യം ചെയ്യും.