ആധാര് വിവരങ്ങള് സുരക്ഷിതമെന്ന മോദി സര്ക്കാരിന്റെ വാദം പൊള്ള: 500 രൂപ കൊടുത്താല് രാജ്യത്തെ ആരുടെ ആധാര് വിവരങ്ങളും ചോര്ത്താം
#TRIBUNEINVESTIGATION — #SECURITYBREACH | by @RachnaKhaira
Rs 500, 10 minutes, and you have access to billion #Aadhaar details | Group tapping @UIDAI data may have sold access to 1 lakh service providershttps://t.co/3vlJhbP94t #AadhaarData pic.twitter.com/CvF6F6Y1Ap— The Tribune (@thetribunechd) January 3, 2018
‘ആധാര് വിവരങ്ങള് പൂര്ണമായും സുരക്ഷിതമാണ്. വിവരങ്ങള് യുഐഡിഎഐയില്നിന്നു ചോരുന്ന പ്രശ്നമില്ല’.
യുണീക് ഐഡന്റിഫിക്കേഷന് അതോറിറ്റി ഓഫ് ഇന്ത്യ (യുഐഡിഎഐ) 2017 നവംബര് 20ന് പറഞ്ഞത്.‘ഇന്ത്യയിലെ ഡേറ്റാ സംഭരണ സംവിധാനം കുറ്റമറ്റതാണ്, ഏറ്റവും സുരക്ഷിതമായ വിവര കൈമാറ്റ സംവിധാനമാണ് ആധാര്. ആളിനെ തിരിച്ചറിയാനല്ലാതെ കൂടുതല് ഒരു വിവരവും ആധാറിലൂടെ മറ്റാര്ക്കും ലഭിക്കില്ല’. കേന്ദ്ര ഐടി മന്ത്രി രവിശങ്കര് പ്രസാദ് പറഞ്ഞ വാക്കുകള്.
ആധാര് വിവരങ്ങള് സുരക്ഷിതമെന്ന ഈ വാദങ്ങളെല്ലാം പൊള്ളയാണെന്ന് തെളിയിക്കുന്നതാണ് ദ ട്രിബ്യൂണ് പത്രം പുറത്തുവിട്ടിരിക്കുന്ന വിവരങ്ങള്. 500 രൂപ കൊടുത്താല് പത്തുമിനിറ്റുകൊണ്ട് നിങ്ങളുടെ ആധാര് വിവരങ്ങള് ആര്ക്കും ലഭിക്കും. 300 രൂപ കൂടി നല്കിയാല് ആരുടെ പേരിലും ‘ആധികാരിക’ ആധാര് കാര്ഡ് അച്ചടിച്ചെടുക്കാനുള്ള ‘സോഫ്റ്റ് വെയറും’ ഈ ഏജന്റുമാര് കമ്പ്യുട്ടറില് സ്ഥാപിച്ചു തരും.
ആധാര് വിവരങ്ങള് ഒട്ടും സുരക്ഷിതമല്ലെന്നും വാണിജ്യാവശ്യങ്ങള്ക്കടക്കം ഈ വിവരങ്ങള് ദുരുപയോഗിക്കപ്പെടും എന്നും ആരോപണങ്ങള് ഉയരുന്നതിനിടയിലാണ് പത്രത്തിന്റെ വെളിപ്പെടുത്തല്. ഇതിനികം തന്നെ പല കോര്പ്പറേറ്റ് സ്ഥാപനങ്ങളും വ്യക്തികളുടെ വിവരങ്ങള് ശേഖരിച്ച് വാണിജ്യാവശ്യങ്ങള്ക്കുപയോഗിക്കുന്നുവെന്നും കണ്ടെത്തിയിരുന്നു.
ഒരു വാട്ട്സ്ആപ്പ് ഗ്രൂപ്പില് കണ്ട നമ്പര് വഴിയാണ് പത്രത്തിന്റെ ലേഖിക രചന ഖൈര തട്ടിപ്പ് സംഘവുമായി ബന്ധപ്പെടുന്നത്. അനാമിക എന്ന് പേര് കൊടുത്തു. ഫോണ് നമ്പരും മെയില് ഐഡിയും നല്കി. 500 രൂപ പറഞ്ഞ അക്കൗണ്ടിലേക്കും അടച്ചു. 20 മിനിട്ടിനകം ലേഖികയെ ഒരു ആധാര് എന്റോള്മെന്റ് അഡ്മിനിസ്ട്രേറ്റര് ആക്കിക്കൊണ്ടുള്ള മെയില് ലഭിച്ചു.
അഡ്മിനിസ്ട്രേറ്റര്ക്കുള്ള യൂസര് ഐഡിയും പാസ്വേഡും പിന്നാലെയെത്തി. അതോടെ ഇന്ത്യയില് ആധാര് എടുക്കാനായി രജിസ്റ്റര് ചെയ്ത മുഴുവന് പേരുടെയും വിവരങ്ങള് ലേഖികയ്ക്ക് ലഭ്യമായി. ആധാര് കാര്ഡ് അച്ചടിച്ചെടുക്കാനുള്ള സോഫ്റ്റ് വെയര് ആവശ്യപ്പെട്ട ലേഖികയ്ക്ക് 300 രൂപ കൂടി മുടക്കിയപ്പോള് ഏജന്റ് അതും ലഭ്യമാക്കി.
മറ്റൊരാള് ‘ടീം വ്യുവര്’ വഴി ലേഖികയുടെ കമ്പ്യൂട്ടറില് കയറി ഈ സോഫ്റ്റ് വെയര് ഇന്സ്റ്റാള് ചെയ്തു നല്കുകയായിരുന്നു. അതോടെ ഇന്ത്യയില് ആരുടെപേരിലുള്ള ആധാര് കാര്ഡ് അച്ചടിയ്ക്കാനും ലേഖികയ്ക്ക് കഴിയുമെന്ന സ്ഥിതിയായി. അതീവ രഹസ്യമായി സൂക്ഷിയ്ക്കുന്നതായി സര്ക്കാര് അവകാശപ്പെടുന്ന രേഖകളാണ് അരമണിക്കൂറില് 800 രൂപ മുടക്കില് ആര്ക്കും അച്ചടിയ്ക്കാവുന്ന വിധത്തില് ലഭ്യമായതെന്ന് പത്രം ചൂണ്ടിക്കാട്ടുന്നു.
ഗുരുതരമായ സുരക്ഷാവീഴ്ച ഉണ്ടായതായി ആധാര് വിവരങ്ങള് കൈകാര്യം ചെയ്യുന്ന യുഐഡിഎഐ അധികൃതര് പത്രത്തോട് സമ്മതിക്കുന്നു. എന്നാല് ഇതെങ്ങനെ സാധിയ്ക്കുന്നു എന്ന് കൃത്യമായി പറയാന് അധികൃതര്ക്ക് കഴിയുന്നില്ല. രാജസ്ഥാന് സര്ക്കാരിന്റെ സൈറ്റിലൂടെയാണ് ആധാര് വിവരങ്ങളിലേക്കു കടന്നുകയറാന് തട്ടിപ്പ് സംഘം ലേഖികയ്ക്ക് അവസരം ഒരുക്കിക്കൊടുത്തത്.
രാജസ്ഥാന് സര്ക്കാരിന്റെ ഈ വിവര ശേഖരം കൈകാര്യം ചെയ്യുന്നത് ഐഎല് ആന്റ് എഫ് എസ് എന്ന സ്ഥാപനമാണ്. 2012 ലെ വിവാദമായ ഹൈദരാബാദ് വിവര ചോര്ച്ചയില് ഉള്പ്പെട്ട സ്ഥാപനം തന്നെയാണിത്.