ദിലീപിനെ പിന്തുണയ്ക്കുന്നവര്ക്കെതിരെ ആഞ്ഞടിച്ച് സംവിധായകന് ആഷിക് അബു
നടിയെ ആക്രമിച്ച കേസില് ജയിലില് കഴിയുന്ന ദിലീപിനെ പിന്തുണച്ച് സിനിമാമേഖലയില് നിന്ന് രംഗത്തെത്തിയവരെ രൂക്ഷമായ ഭാഷയില് വിമര്ശിച്ച് സംവിധായകന് ആഷിക് അബു. നടനും സംവിധായകനുമായ ശ്രീനിവാസനെയും സെബാസ്റ്റ്യന്പോളിനെയും പേരെടുത്തുപറഞ്ഞാണ് ആഷിക് അബു വിമര്ശിക്കുന്നത്.
വരും ദിവസങ്ങളില് ശ്രീനിയേട്ടനെ പോലെ കുറെയധികം ആളുകള് സംസാരിക്കുമെന്നും ഇത് കേരളം ചര്ച്ച ചെയ്യണമെന്നും ഇടപെടണമെന്നും സംവിധായകന് ആവശ്യപ്പെടുന്നു. ‘ദിലീപ് ഇങ്ങനെ ചെയ്യില്ലെന്ന് താനടക്കമുള്ളവര് വിശ്വസിച്ചിരുന്നു. പക്ഷെ പോലീസ് നടത്തിയ നീക്കം എല്ലാ തിരക്കഥയും പൊളിച്ചു.
ശ്രീനിവാസനെ പോലെ കുറെയാളുകള് ഇതെക്കുറിച്ച് സംസാരിക്കണം. പറ്റുകയാണെങ്കില് ബാബയുടെ ആളുകളെ പോലെ ഒരു ചെറിയ കലാപം എങ്കിലും നടത്തണമെന്നും ആഷിക് അബു തന്റെ ഫേസ്ബുക്ക് പേജിലൂടെ പരിഹസിക്കുന്നു. ഞങ്ങള് അവള്ക്കൊപ്പം മാത്രമാണ് എന്ന് പറഞ്ഞുകൊണ്ടാണ് പോസ്റ്റ് അവസാനിപ്പിക്കുന്നത്.
ആഷിക് അബുവിന്റെ ഫെയിസ്ബുക്ക് പോസ്റ്റ് വായിക്കാം
വ്യക്തിവൈരാഗ്യം തീര്ക്കാന് ബലാല്ക്കാരം നടത്തി അത് മൊബൈലില് പകര്ത്തി കൊണ്ടുവരാന് കൊട്ടേഷന് കൊടുത്തു എന്നതാണ് കേരളാ പോലീസ് ദിലീപ് എന്ന വ്യക്തിയില് ചാര്ത്തിയ കുറ്റം. ശ്രീനിയേട്ടന് പറഞ്ഞതുപോലെതന്നെ അതിബുദ്ധിമാനായ ദിലീപ് ഇങ്ങനെയൊരു മണ്ടത്തരം കാണിക്കില്ല എന്നും, വേറെ വഴികള് അയാള് കണ്ടെത്തിയേനേ എന്നുമാണ് അറസ്റ്റിന് മുന്പ് ദിലീപിനെ അടുത്തറിയാവുന്ന ആളുകളുടെ(ഞാനടക്കം) ഉറച്ച വിശ്വാസം.
പക്ഷെ പോലീസ് നടത്തിയ നീക്കം കഥയിലെ അണിയറ നാടകങ്ങളെ പൊളിച്ചെറിഞ്ഞു. ദിലീപിനെ പോലെ അതിബുദ്ധിമാനും ധനികനും ശക്തനുമായ ഒരാളെ അറസ്റ്റ് ചെയ്യാന് പോലീസ് തീരുമാനിക്കുന്നു. വളരെ സെന്സിറ്റീവ് ആയ വിഷയത്തില് നീതിയുടെ ഭാഗത്തുനില്ക്കാന് സര്ക്കാര് തീരുമാനിക്കുന്നു. കോടതികള് പ്രഥമദൃഷ്ടിയില് കേസ് ഉണ്ടെന്ന് കണ്ടെത്തി ജാമ്യം നിഷേധിക്കുന്നു.
പോലീസിനെയും സര്ക്കാരിനേയും കോടതിയേയും ചോദ്യം ചെയ്യാന് സ്വാതന്ത്ര്യമുള്ള നാടുതന്നെയാണ് നമ്മുടേത്, അതില് സംശയം വേണ്ട ശ്രീ സെബാസ്റ്റ്യന് പോള്. നിങ്ങള് നിഷാമിന് വേണ്ടിയും സംസാരിക്കണം. വക്കീല് ആണെന്ന് മറക്കുന്നില്ല.
വരും ദിവസങ്ങളില് ശ്രീനിയേട്ടനെ പോലെ കുറെയധികം ആളുകള് സംസാരിക്കും, കേരളം ചര്ച്ച ചെയ്യണം, ഇടപെടണം പറ്റുമെങ്കില് മറ്റേ ബാബയുടെ ടീം നടത്തിയ പോലെ അല്ലെങ്കിലും ഒരു ചെറിയ കലാപമെങ്കിലും വേണമെന്ന് പറയാന്.
അവള്ക്കൊപ്പം
അവള്ക്കൊപ്പംമാത്രം