പാന്കാര്ഡ് ആധാറുമായി ബന്ധിപ്പിക്കാത്തവര് പേടിക്കേണ്ട; ഇനിയും സമയമുണ്ട്
ജൂലൈ ഒന്നിന് മുമ്പ് പാന് കാര്ഡുമായി ആധാര് നമ്പര് ബന്ധിപ്പിക്കണമെന്നും അല്ലെങ്കില് പാന് കാര്ഡ് അസാധുവാകുമെന്നുമുള്ള വാര്ത്തകള് അടിസ്ഥാന രഹിതം. ആധാറും പാന് കാര്ഡും തമ്മില് ബന്ധിപ്പിക്കുന്നതിനുള്ള അവസാന തീയ്യതി സര്ക്കാര് ഇതുവരെ പ്രഖ്യാപിച്ചിട്ടില്ല. ഇനി പ്രഖ്യാപിക്കാനിരിക്കുന്ന അവസാന തീയ്യതിക്ക് ശേഷവും ആധാറുമായി ബന്ധിപ്പിക്കാത്ത പാന് കാര്ഡുകള് മാത്രമേ അസാധുവാകൂ. ഈ തീയ്യതി പ്രഖ്യാപിക്കാത്തതിനാല് ഇപ്പോള് ആശങ്കപ്പെടേണ്ട കാര്യവുമില്ലെന്ന് ആദായനികുതി വകുപ്പ് വ്യക്തമാക്കി.
ആധാര് നമ്പറുമായി പാന് കാര്ഡ് ബന്ധിപ്പിക്കണമെന്ന് സര്ക്കാര് നിര്ദ്ദേശിച്ചിട്ടുണ്ടെങ്കിലും അതിന് ജൂലൈ ഒന്ന് എന്ന അവസാന തീയ്യതി നിശ്ചയിച്ചിട്ടില്ല എന്ന് ആദായ നികുതി വകുപ്പ് ഉദ്യോഗസ്ഥര് പറയുന്നു. ആദായനികുതി വകുപ്പിന്റെ വെബ്സൈറ്റ് വഴിയാണ് ആധാറും പാന് കാര്ഡും ബന്ധിപ്പിക്കാനുള്ള സൗകര്യമൊരുക്കിയിരിക്കുന്നത്. ജൂണ് അവസാനമായതോടെ ആളുകള് തിക്കിട്ട് ഇതിന് ശ്രമിക്കുന്നതിനാല് പലപ്പോഴും വെബ്സൈറ്റ് തകരാറുവുന്നുമുണ്ട്.
ആധാര് പാന് കാര്ഡുമായി ബന്ധിപ്പിക്കാന് ചെയ്യേണ്ടത് ഇവ:
കേവലം രണ്ടു പടികളിലൂടെ ആധാറും പാന് കാര്ഡും ബന്ധിപ്പിക്കാം.
www.incometaxindiaefiling.gov.in എന്ന ആദായ നികുതി വകുപ്പിന്റെ വെബ് സൈറ്റില് ഇവ ബന്ധിപ്പിക്കാനുള്ള സൗകര്യമുണ്ട്.
ആദായ നികുതി വകുപ്പിന്റെ ഇ ഫയലിങ് പോര്ട്ടലില് റജിസ്റ്റര് ചെയ്യണം. തുടര്ന്നു ലോഗിന് ചെയ്യുക. ലോഗിന് ഐഡി, പാസ് വേഡ്, ജനന തീയതി ഇവ സഹിതം ലോഗിന് ചെയ്യുക.
ആധാറും പാനും ബന്ധിപ്പിക്കാനുള്ള ലിങ്ക് ജാലകം തുറന്നു വരും
പേര്, ജനന തീയതി, സ്ത്രീയോ പുരുഷനോ എന്നിവ ജാലകത്തില് തെളിയുന്നു. അവ ശരിയെന്ന് ഒന്നു കൂടി ഉറപ്പാക്കുക. അവയും ആധാര് കാര്ഡിലെ വിവരങ്ങളും ഒന്നു തന്നെയെന്നു ഉറപ്പാക്കുക.
അവ രണ്ടും ശരിയെങ്കില് ലിങ്ക് നൗ എന്ന ഭാഗത്തു ക്ലിക്ക് ചെയ്യുക. ഇരു കാര്ഡ് നമ്പറുകളും ബന്ധിപ്പിച്ചതായി സന്ദേശം ലഭിക്കും.
പാന് കാര്ഡിലെയും ആധാര് കാര്ഡിലെയും വിവരങ്ങള് വ്യത്യസ്തമെങ്കില് ഉചിതമായ തെളിവുകള് സഹിതം അവ തിരുത്തുക.
പേരു മാറ്റമുണ്ടെങ്കില് ആധാര് വെബ് സൈറ്റില് ലോഗിന് ചെയ്യുക. അതിനായി പാന് കാര്ഡിന്റെ സ്കാന് ചെയ്ത പകര്പ്പ് അപ് ലോഡ് ചെയ്യുക.
മറ്റൊരു വഴി. പേരു മാറ്റമുള്ളവര്ക്ക് ആദായ നികുതി വകുപ്പ് വെബ് സൈറ്റില് നിന്നു വണ് ടൈം പാസ് വേഡ് അയച്ചു നല്കും. ആധാറില് റജിസ്റ്റര് ചെയ്ത മൊബൈല് നമ്പറിലേക്കാണു സന്ദേശം വരിക. ഈ വണ് ടൈം പാസ് വേഡ് ഉപയോഗിച്ചു രണ്ടും ബന്ധിപ്പിക്കാം.