അപ്രതീക്ഷിത കൂടിക്കാഴ്ചയുമായി പിണറായിയും കെജ്രിവാളും; ഒന്നിച്ചു നീങ്ങാനുള്ള മുന്നൊരുക്കമെന്നു സൂചന
കേരള മുഖ്യമന്ത്രി പിണറായി വിജയനും ഡൽഹി മുഖ്യമന്ത്രി അരവിന്ദ് കേജരിവാളും തമ്മിൽ ഡൽഹിയിൽ അപ്രതീക്ഷിത കൂടിക്കാഴ്ച. കൂടിക്കാഴ്ച തികച്ചും സൗഹൃദപരമായിരുന്നുവെന്നു പിണറായി വിജയൻ മാധ്യമങ്ങളമാടു പറഞ്ഞു. എന്നാൽ ചില കാര്യങ്ങൾ ചർച്ച ചെയ്തതായും അദ്ദേഹം വ്യക്തമാക്കി.
പ്രധാനമന്ത്രി നരേന്ദ്ര മോദിയുടെ കീഴിൽ രാജ്യത്ത് ഭീതിജനകമായ അന്തരീക്ഷമാണ് നിലനിൽക്കുന്നതെന്നു കേജരിവാൾ പറഞ്ഞു. ജനങ്ങൾ പേടിച്ചാണ് ജീവിക്കുന്നത്. ഇതു ദുഖകരമായ അവസ്ഥയാണ്. ബിജെപിയെ നേരിടാൻ കോണ്ഗ്രസിനെ ആശ്രയിക്കാൻ കഴിയില്ലെന്നും ഇതിനായി മതനിരപേക്ഷ ശക്തികൾ ഒന്നിക്കണമെന്നും പിണറായി കൂടിക്കാഴ്ചയ്ക്കു ശേഷം മാധ്യമങ്ങളോട് പറഞ്ഞു.
പിണറായി വിജയനുമായി നിരവധി കാര്യങ്ങൾ ചർച്ച ചെയ്തുവെന്നു കേജരിവാളും വ്യക്തമാക്കി. കേരള ഹൗസിൽ വച്ചായിരുന്നു ഇരു മുഖ്യമന്ത്രിമാരും തമ്മിൽ കൂടിക്കാഴ്ച നടത്തിയത്. ബിജെപിക്കെതിരെ ഒന്നിച്ചു നീങ്ങുവാനുള്ള നീക്കങ്ങളുടെ മുന്നൊരുക്കമാണ് ചര്ച്ചയെന്നാണ് രാഷ്ട്രീയ നിരീക്ഷകര് കരുതുന്നത്.