മക്കയിലെ ക്രെയിൻ അപകടം; മരണപ്പെട്ടവരുടെ കൂട്ടത്തില് 2 മലയാളികള്;15 ഇന്ത്യാക്കാർക്ക് പരിക്ക്
മക്ക: മസ്ജിദുൽ ഹറമിൽ ക്രെയിൻ തകർന്ന് വീണ് മരിച്ചവരിൽ രണ്ട് മലയാളികളുണ്ടെന്ന് കേന്ദ്ര വിദേശകാര്യ മന്ത്രാലയം അറിയിച്ചു. 15 ഇന്ത്യാക്കാർക്ക് പരിക്കേറ്റിട്ടുണ്ട്. സ്വകാര്യ ഹജ്ജ് സംഘത്തിനൊപ്പം പോയ പാലക്കാട് സ്വദേശിയായ മുഹ്മിനയാണ് മരിച്ച ഒരാൾ. രണ്ടാമത്തെ ആളുടെ പേര് വിവരം ലഭ്യമായിട്ടില്ല.
ഹറമിലെ ബാബു സഫാ, ബാബു ഉംറ എന്നിവയ്ക്കിടയിലെ പ്രദേശത്ത് വെള്ളിയാഴ്ച പ്രാദേശികസമയം വൈകിട്ട് 5.30 ഓടെ ആയിരുന്നു അപകടം. അതിനിടെ അപകടത്തിലെ മരണ സംഖ്യ 107 ആയി ഉയർന്നു. മസ്ജിദുൽ ഹറമിനു മുകളിൽ വികസന ജോലികൾക്കായി ഉയർത്തിയിരുന്ന രണ്ടു കൂറ്റൻ ക്രെയിനുകൾ തകർന്നു വീണാണ് ദുരന്തമുണ്ടായത്.
ഹജ്ജ് നിര്വ്വഹിച്ചു കൊണ്ടിരുന്ന തീർത്ഥാടകർക്ക് മുകളിലേക്ക് ക്രെയിൻ പൊട്ടി വീഴുകയായിരുന്നു. ഇന്നലെ വൈകിട്ടുണ്ടായ ശക്തമായ കാറ്റിലാണ് ക്രെയിൻ തകർന്നു വീണത്. മഴയും കാറ്റും ഇപ്പോഴും ശക്തമായി തുടരുകയാണെന്നാണ് സൗദിയില്നിന്നുള്ള റിപ്പോര്ട്ടുകള്.