മാഗി ന്യൂഡില്‍സിന്റെ പരസ്യത്തില്‍ അഭിനയിച്ച മാധുരി ദീക്ഷിതിനെതിരെ കേസെടുക്കും
മാഗി ന്യൂഡില്‍സിന്റെ പരസ്യത്തില്‍ അഭിനയിച്ച ബോളിവുഡ് നടി മാധുരി ദീക്ഷിതിനെതിരെ ഫുഡ് ആന്റ് ഡ്രഗ് അഡ്മിനിസ്‌ട്രേഷന്‍ നോട്ടീസ് അയച്ചു. രണ്ടുമിനിറ്റുകൊണ്ടു തയ്യാറാക്കുന്ന മാഗി നൂഡില്‍സ് എന്ത് പോഷണമാണ് നല്‍കുന്നത് എന്നതു സംബന്ധിച്ച് നടി വിശദീകരിക്കണമെന്നും നോട്ടീസ് ലഭിച്ച് 15 ദിവസത്തിനകം മാധുരി മറുപടി നല്‍കണമെന്നുമാണ് ഉത്തരാഖണ്ഡിലെ ഫുഡ് ആന്റ് ഡ്രഗ് അഡ്മിനിസ്‌ട്രേഷന്‍ മാധുരിക്ക് നോട്ടീസ് അയച്ചിരിക്കുന്നത്.
മാത്രമല്ല നോട്ടീസില്‍ പറഞ്ഞ സമയത്തിനുള്ളില്‍ മാഗി എങ്ങനെയാണ് ആരോഗ്യത്തിന് ഗുണം ചെയ്യുന്നതെന്ന കാര്യത്തില്‍ വിശദീകരണം നല്‍കുന്നതില്‍ പരാജയപ്പെടുകയാണെങ്കില്‍ താരത്തിനെതിരെ കേസെടുക്കുമെന്നും ഭക്ഷ്യസുരക്ഷാ ഉദ്യോഗസ്ഥനായ മഹിംആനന്ദ്‌ജോഷി അറിയിച്ചു.
മാഗി നൂഡില്‍സ് സാമ്പിളുകളില്‍, ഉത്തര്‍പ്രദേശിലെ ഫുഡ് സേഫ്റ്റി ആന്റ് ഡ്രഗ് അഡ്മിനിസ്‌ട്രേഷന്‍ നടത്തിയ പരിശോധനയില്‍ മോണോസോഡിയം ഗ്ലൂട്ടാമേറ്റ്, ലെഡ് എന്നിവ കൂടിയ അളവില്‍ അടങ്ങിയിരിക്കുന്നതായി കണ്ടെത്തിയതിനെ തുടര്‍ന്ന് നെസ് ലേ വിപണിയില്‍ നിന്ന് വ്യാപകമായി തങ്ങളുടെ ഉത്പന്നത്തെ തിരിച്ചെടുത്തിരുന്നു.
