തെന്നിന്ത്യൻ താരം കൃതി ഷെട്ടി ബോളിവുഡിൽ അരങ്ങേറ്റം കുറിക്കുന്നു. പ്രശസ്ത സംവിധായകൻ രോഹിത് ഷെട്ടി അവതരിപ്പിക്കുന്ന ‘ഹം തേരേ പ്യാർ മേം’ എന്ന റൊമാന്റിക് എന്റർടെയ്‌നറിലൂടെയാണ് താരത്തിന്റെ ഹിന്ദി സിനിമാ പ്രവേശനം. രോഹിത് ഷെട്ടിയുടെ സഹസംവിധായികയായി 17 വർഷമായി പ്രവർത്തിക്കുന്ന വിധി ഘോഡ്ഗാവ്കറാണ് ചിത്രം സംവിധാനം ചെയ്യുന്നത്.

‘ഗോൽമാൽ 3’, ‘സിങ്കം’, ‘ചെന്നൈ എക്സ്പ്രസ്’, ‘ദിൽവാലെ’, ‘ഗോൽമാൽ എഗെയ്ൻ’ തുടങ്ങിയ ചിത്രങ്ങളിൽ അസിസ്റ്റന്റ് ഡയറക്ടറായി പ്രവർത്തിച്ച പരിചയവുമായാണ് വിധി സ്വതന്ത്ര സംവിധായികയാകുന്നത്. ചിത്രത്തിന്റെ ഷൂട്ടിങ് ബുധനാഴ്ച ആരംഭിച്ചു. സിനിമയുടെ പൂജാ ചടങ്ങിൽ നിന്നുള്ള ക്ലാപ്പർബോർഡിന്റെ ചിത്രം ഇൻസ്റ്റഗ്രാം സ്റ്റോറിയിൽ പങ്കുവെച്ച രോഹിത് ഷെട്ടി വിധിക്ക് ആശംസകളും നേർന്നു.

ഹൃദയസ്പർശിയായ പ്രണയകഥയാണ് ചിത്രം പറയുന്നത്. എവിഎസ് സ്റ്റുഡിയോസ്, ടുഡിപ് എന്റർടൈൻമെന്റ് എന്നിവരുമായി സഹകരിച്ചാണ് രോഹിത് ഷെട്ടി ചിത്രം അവതരിപ്പിക്കുന്നത്. അഭിഷേക് എസ്. വ്യാസും പ്രിയങ്ക ചൗധരിയുമാണ് നിർമാതാക്കൾ.

2021-ൽ വൈഷ്ണവ് തേജിനൊപ്പം അഭിനയിച്ച ‘ഉപ്പേന’യിലൂടെയാണ് കൃതി ഷെട്ടി നായികയായി അരങ്ങേറ്റം കുറിച്ചത്. ആദ്യ ചിത്രത്തിലൂടെ തന്നെ ശ്രദ്ധ നേടിയ താരം പിന്നീട് ‘ബംഗാർരാജു’, ‘ദി വാരിയർ’, ‘കസ്റ്റഡി’, ‘മനമേ’, മലയാള ചിത്രം ‘എആർഎം’ എന്നിവയിലും ശ്രദ്ധേയമായ വേഷങ്ങൾ ചെയ്തു.

അനിൽ രവിപുടി സംവിധാനം ചെയ്യുന്ന ‘ജനുവരി 12 വിടുതലൈ’യാണ് കൃതിയുടേതായി പ്രതീക്ഷിക്കപ്പെടുന്ന മറ്റൊരു ചിത്രം. വെങ്കിടേഷ്, നന്ദമുരി കല്യാൺ റാം, കീർത്തി സുരേഷ് എന്നിവർക്കൊപ്പമാണ് താരം ചിത്രത്തിൽ പ്രധാന വേഷത്തിലെത്തുന്നത്.

The post ബോളിവുഡിലേക്ക് കൃതി ഷെട്ടി; രോഹിത് ഷെട്ടിയുടെ ‘ഹം തേരേ പ്യാർ മേം’ ചിത്രീകരണം തുടങ്ങി appeared first on ഇവാർത്ത | Evartha.

ചീഫ് ജസ്റ്റിസ് സൂര്യകാന്തിനെതിരായ വിവാദ സമൂഹമാധ്യമ പോസ്റ്റിലും സുപ്രീംകോടതിയിലേക്ക് നടത്തിയ മാർച്ചിലും കോൺഗ്രസിനും രാഹുൽ ഗാന്ധിക്കും കോടതി നോട്ടീസ്. കോടതി വളപ്പിൽ രാഷ്ട്രീയ പ്രകടനങ്ങൾക്കും പ്രതിഷേധങ്ങൾക്കും കർശന നിയന്ത്രണം ഏർപ്പെടുത്തണമെന്ന് ആവശ്യപ്പെട്ട് നാല് അഭിഭാഷകർ സമർപ്പിച്ച പൊതുതാൽപ്പര്യ കോടതിയലക്ഷ്യ ഹർജിയിലാണ് നടപടി.

ചീഫ് ജസ്റ്റിസ് സൂര്യകാന്തും ജസ്റ്റിസ് ജോയ്മാല്യ ബാഗ്ചിയും അടങ്ങിയ ബെഞ്ചാണ് ഹർജി പരിഗണിച്ചത്. രാഹുൽ ഗാന്ധിയുൾപ്പെടെയുള്ള എതിർകക്ഷികളോട് വിഷയത്തിൽ മറുപടി നൽകാൻ കോടതി നിർദേശിച്ചു. അഭിഭാഷകരായ ദിഗന്ത് മിശ്ര, ദിവ്യാംഷ് ബിഷ്ത്, ആശിഷ് ഗോപാൽ ഗാർഗ്, ശ്വേത ഗാർഗ് എന്നിവർ അഡ്വക്കേറ്റ് ഓൺ റെക്കോർഡ് ഉത്കർഷ് ജയ്സ്വാൾ മുഖേനയാണ് ഹർജി സമർപ്പിച്ചത്. ചീഫ് ജസ്റ്റിസിനെതിരെ അപകീർത്തികരമായ പരാമർശങ്ങൾ നടത്തിയെന്നാരോപിച്ച് കെപിസിസിക്കെതിരെയും കർശന കോടതിയലക്ഷ്യ നടപടി സ്വീകരിക്കണമെന്ന് ഹർജിക്കാർ ആവശ്യപ്പെട്ടു.

ഡൽഹിയിലെ പൊലീസ് നിയന്ത്രണങ്ങളെക്കുറിച്ചുള്ള മാധ്യമങ്ങളുടെ ചോദ്യത്തിന് ക്രമസമാധാനം തന്റെ ചുമതലയിൽപ്പെടുന്ന വിഷയമല്ലെന്ന് ചീഫ് ജസ്റ്റിസ് പ്രതികരിച്ചതിനു പിന്നാലെയാണ് കെപിസിസിയുടെ ഔദ്യോഗിക എക്സ് അക്കൗണ്ടിൽ വിവാദ പോസ്റ്റ് പ്രത്യക്ഷപ്പെട്ടത്. ക്രമസമാധാനം ചുമതലയല്ലെങ്കിൽ രാജിവെക്കണമെന്നും പകരം മറ്റൊരാളെ കണ്ടെത്താമെന്നുമുള്ള പരാമർശമാണ് വിമർശനങ്ങൾക്ക് പിന്നാലെ നീക്കം ചെയ്തത്. പോസ്റ്റ് കെപിസിസി നേതൃത്വത്തിന്റെ അറിവോടെയല്ലെന്ന് കെപിസിസി പ്രസിഡന്റ് സണ്ണി ജോസഫ് വ്യക്തമാക്കിയിരുന്നു.

ജഡ്ജിയെ സ്ഥാനത്തുനിന്ന് നീക്കുന്നതിന് ഭരണഘടനയിൽ നിർദേശിച്ചിട്ടുള്ള നടപടിക്രമങ്ങൾ മാത്രമേ പിന്തുടരാനാകൂവെന്നും ചീഫ് ജസ്റ്റിസിനെ സമ്മർദത്തിലാക്കാനുള്ള നീക്കം ഭരണഘടനാ തത്വങ്ങളുടെ ലംഘനമാണെന്നും ഹർജിയിൽ ചൂണ്ടിക്കാട്ടുന്നു. ചീഫ് ജസ്റ്റിസിന് പകരക്കാരനെ രാഷ്ട്രീയ പാർട്ടി കണ്ടെത്തുമെന്ന തരത്തിലുള്ള പരാമർശങ്ങളും ജഡ്ജിമാരുടെ നിയമനവുമായി ബന്ധപ്പെട്ട ഭരണഘടനാ വ്യവസ്ഥകൾക്ക് വിരുദ്ധമാണെന്ന് ഹർജിക്കാർ വാദിച്ചു.

ചീഫ് ജസ്റ്റിസിന്റെ രാജി ആവശ്യപ്പെട്ടുള്ള പരാമർശങ്ങളെ അപലപിച്ച് സുപ്രീംകോടതി ബാർ അസോസിയേഷനും സുപ്രീംകോടതി അഡ്വക്കേറ്റ്സ് ഓൺ റെക്കോർഡ്സ് അസോസിയേഷനും പാസാക്കിയ പ്രമേയങ്ങളും ഹർജിയിൽ പരാമർശിച്ചിട്ടുണ്ട്.

The post ചീഫ് ജസ്റ്റിസിനെതിരായ വിവാദ പോസ്റ്റ്; കോൺഗ്രസിനും രാഹുൽ ഗാന്ധിക്കും സുപ്രീംകോടതി നോട്ടീസ് appeared first on ഇവാർത്ത | Evartha.

കിഫ്ബിയുടെ പ്രവർത്തനങ്ങളിൽ നിയന്ത്രണം ഏർപ്പെടുത്തിയ യുഡിഎഫ് സർക്കാർ നടപടിക്കെതിരെ സിപിഐഎം രംഗത്ത്. കിഫ്ബിയെ തകർക്കാനുള്ള നീക്കത്തിന് ന്യായീകരണം നിരത്തുകയാണ് മുഖ്യമന്ത്രി വി.ഡി. സതീശനെന്ന് വിമർശനം ഉയർന്നു. ധനവകുപ്പിനെ കിഫ്ബി നോക്കുകുത്തിയാക്കിയെന്നായിരുന്നു മുഖ്യമന്ത്രിയുടെ വാർത്താസമ്മേളനത്തിലെ ആരോപണം.

കിഫ്ബി നിർത്തലാക്കുന്നത് കേരളത്തിന്റെ വികസനത്തിന് വലിയ ആഘാതമുണ്ടാക്കുമെന്ന് മുൻ ധനമന്ത്രി ഡോ. ടി.എം. തോമസ് ഐസക് പറഞ്ഞു. ബജറ്റിലെ പണം മാത്രം ഉപയോഗിച്ച് വലിയ പശ്ചാത്തല വികസന പദ്ധതികൾ നടപ്പാക്കാനാകില്ലെന്നും കിഫ്ബിക്ക് നിയന്ത്രണം ഏർപ്പെടുത്തുന്നത് സർക്കാർ പദ്ധതികളെ പ്രതിസന്ധിയിലാക്കുമെന്നും അദ്ദേഹം ചൂണ്ടിക്കാട്ടി.

കിഫ്ബി കേരളത്തിൽ വലിയ വികസനക്കുതിപ്പിന് വഴിയൊരുക്കിയെന്ന് മുൻ ധനമന്ത്രി കെ.എൻ. ബാലഗോപാലും പറഞ്ഞു. രാഷ്ട്രീയ കാരണങ്ങളാൽ വലിയൊരു സംവിധാനത്തെ ഇല്ലാതാക്കാനല്ല ശ്രമിക്കേണ്ടതെന്നും കിഫ്ബിയുടെ പ്രവർത്തനങ്ങൾക്ക് തടസ്സമുണ്ടാകരുതെന്നും അദ്ദേഹം വ്യക്തമാക്കി. മറ്റ് സംസ്ഥാനങ്ങൾക്കും മാതൃകയായ പദ്ധതിയാണ് കിഫ്ബിയെന്നും വികസന പ്രവർത്തനങ്ങൾക്കായി ഇതിലൂടെ വലിയ തോതിൽ പണം ചെലവഴിക്കാനായെന്നും ബാലഗോപാൽ കൂട്ടിച്ചേർത്തു.

The post കിഫ്ബിയെ തകർക്കാനുള്ള നീക്കത്തിന് ന്യായീകരണം നിരത്തി മുഖ്യമന്ത്രി appeared first on ഇവാർത്ത | Evartha.

കേരളത്തിന്റെ പശ്ചാത്തല വികസന രംഗത്ത് നിർണായക പങ്കുവഹിച്ച കിഫ്ബിയുടെ പദ്ധതികൾ വെട്ടിച്ചുരുക്കാനുള്ള യു.ഡി.എഫ് സർക്കാരിന്റെ നീക്കത്തിനെതിരെ മുൻ ധനമന്ത്രി ഡോ. ടി.എം. തോമസ് ഐസക് രംഗത്ത്. കിഫ്ബിയെ മരവിപ്പിച്ച് സ്ഥാപനത്തിന്റെ കൈവശമുള്ള കോടിക്കണക്കിന് രൂപ ട്രഷറിയിലേക്ക് മാറ്റാനാണ് നീക്കമെന്ന് അദ്ദേഹം ആരോപിച്ചു.

ഒരു ലക്ഷം കോടി രൂപയിലധികം മൂല്യമുള്ള പദ്ധതികൾക്ക് അനുമതി നൽകിയതിൽ 25,000 കോടി രൂപയുടെ പദ്ധതികൾ മാത്രമാണ് പൂർത്തിയായത്. ഇനി പൂർത്തിയാക്കേണ്ട 22,883 കോടി രൂപയുടെ പദ്ധതികൾ മാത്രം നടപ്പാക്കിയാൽ മതിയെന്ന വിദഗ്ധ സമിതി തീരുമാനത്തോടെ കിഫ്ബി പദ്ധതികളിൽ പകുതിയോളം ഒഴിവാക്കപ്പെടുമെന്നും തോമസ് ഐസക് ആശങ്ക പ്രകടിപ്പിച്ചു.

കിഫ്ബിക്ക് ലഭിച്ചിരുന്ന മോട്ടോർ വാഹന നികുതിയുടെ ഗ്രാന്റ് നിർത്തിയതും പദ്ധതികൾക്കായി വായ്പയെടുക്കേണ്ടതില്ലെന്ന തീരുമാനവും വികസന പ്രവർത്തനങ്ങളെ ബാധിക്കുമെന്നും അദ്ദേഹം ചൂണ്ടിക്കാട്ടി.

The post കിഫ്ബി പദ്ധതികൾ വെട്ടിച്ചുരുക്കാൻ നീക്കം; വിമർശനവുമായി തോമസ് ഐസക് appeared first on ഇവാർത്ത | Evartha.

റഷ്യക്കെതിരായ യുദ്ധത്തിൽ അമേരിക്കയുടെ നിലപാടിനെ രൂക്ഷമായി വിമർശിച്ച് യുക്രെയ്ൻ പ്രസിഡന്റ് വോളോഡിമർ സെലെൻസ്‌കി. അമേരിക്കൻ പ്രസിഡന്റ് ഡോണൾഡ് ട്രംപ് തന്നെ വഞ്ചിച്ചതായി തോന്നുന്നുവെന്ന് പ്രമുഖ മാധ്യമപ്രവർത്തകൻ പിയേഴ്‌സ് മോർഗനുമായുള്ള അഭിമുഖത്തിൽ സെലെൻസ്‌കി പറഞ്ഞു. യുദ്ധത്തിന്റെ നിർണായക ഘട്ടത്തിൽ പ്രധാന പങ്കാളിയുടെ പിന്തുണ നഷ്ടപ്പെടുന്നത് യുക്രെയ്‌നെ സംബന്ധിച്ച് വലിയ ആശങ്കയാണെന്നും അദ്ദേഹം വ്യക്തമാക്കി.

റഷ്യൻ ഡീസൽ കയറ്റുമതിയിലെ നിയന്ത്രണങ്ങൾ ലഘൂകരിക്കാനുള്ള നീക്കവും യുക്രെയ്‌ന്റെ സൈനിക ആശയവിനിമയത്തിന് നിർണായകമായ സ്റ്റാർലിങ്ക് സേവനങ്ങളിലെ തടസ്സങ്ങളും ഇരുരാജ്യങ്ങളും തമ്മിലുള്ള ഭിന്നത വർധിപ്പിച്ചതായാണ് റിപ്പോർട്ടുകൾ. സ്റ്റാർലിങ്ക് സേവനങ്ങൾ തടസ്സപ്പെട്ടത് സൈനിക പ്രവർത്തനങ്ങളെയും മനുഷ്യജീവനുകളെയും അപകടത്തിലാക്കിയെന്ന് സെലെൻസ്‌കി ആരോപിച്ചു.

അതേസമയം, സ്റ്റാർലിങ്ക് സേവനങ്ങളിലെ തടസ്സങ്ങൾക്ക് അമേരിക്കൻ സർക്കാരാണ് ഉത്തരവാദിയെന്ന നിലപാടാണ് എലോൺ മസ്‌ക് സ്വീകരിച്ചതായി റിപ്പോർട്ട്. റഷ്യൻ ആക്രമണങ്ങൾ തുടരുന്നതിനിടെ അമേരിക്കയുടെ നയമാറ്റം യുക്രെയ്‌ന്റെ പ്രതിരോധശേഷിയെ ബാധിക്കുമെന്ന ആശങ്കയും ശക്തമാണ്. സെലെൻസ്‌കിയുടെ ആരോപണങ്ങൾ സ്വതന്ത്രമായി സ്ഥിരീകരിക്കപ്പെട്ടിട്ടില്ലെങ്കിലും അമേരിക്ക–യുക്രെയ്ൻ ബന്ധത്തിലെ വിശ്വാസപ്രതിസന്ധി അന്താരാഷ്ട്ര തലത്തിൽ ചർച്ചയാകുകയാണ്.

The post ട്രംപ് വഞ്ചിച്ചതായി തോന്നുന്നു; അമേരിക്കയ്‌ക്കെതിരെ സെലെൻസ്‌കി appeared first on ഇവാർത്ത | Evartha.

ബോളിവുഡ് നടൻ ഇമ്രാൻ ഖാനോട് ഇന്ത്യ വിടാൻ നിർദേശിച്ച് മുംബൈ പൊലീസ്. മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഒക്ടോബർ 10-ന് നടന്ന പ്രതിഷേധത്തിൽ പങ്കെടുത്തതിനെ തുടർന്നാണ് നടപടിയെന്നാണ് റിപ്പോർട്ടുകൾ. ഈ മാസം 28-നകം രാജ്യം വിടണമെന്നാണ് പൊലീസ് നിർദേശിച്ചിരിക്കുന്നത്.

അമേരിക്കൻ പൗരത്വമുള്ള ഇമ്രാൻ ഖാൻ ഒരു രാഷ്ട്രീയ പ്രതിഷേധത്തിൽ പങ്കെടുത്തത് ചൂണ്ടിക്കാട്ടി ഫോറിനേഴ്‌സ് ആക്ട് ഉൾപ്പെടെയുള്ള നിയമവ്യവസ്ഥകൾ പ്രകാരമാണ് നടപടിയെന്നാണ് വിവരം. ഇമ്രാനെ ഇന്ത്യയിൽനിന്ന് നാടുകടത്തണമെന്ന് ആവശ്യപ്പെട്ട് ബിജെപി നേതാവ് കിരിത് സോമയ്യ നേരത്തേ രംഗത്തെത്തിയിരുന്നു. വിദേശ പൗരൻ രാജ്യത്തെ രാഷ്ട്രീയ പ്രക്ഷോഭങ്ങളിൽ പങ്കെടുക്കുന്നതിന്റെ ഔചിത്യവും അദ്ദേഹം ചോദ്യം ചെയ്തിരുന്നു.

ഗ്യാനേഷ് കുമാറിന്റെ രാജി ആവശ്യപ്പെട്ട് മുംബൈയിലെ ആഗസ്റ്റ് ക്രാന്തി മൈതാനത്ത് നടന്ന പ്രതിഷേധത്തിലാണ് ഇമ്രാൻ ഖാൻ പങ്കെടുത്തത്. അദ്ദേഹത്തിന്റെ പങ്കാളിയും നടിയുമായ ലേഖ വാഷിംഗ്ടൺ, കസിൻ സെയ്ൻ മേരി ഖാൻ എന്നിവരും പ്രതിഷേധത്തിലുണ്ടായിരുന്നു. പ്രകടനത്തിനിടെ ഇവരെ പൊലീസ് കസ്റ്റഡിയിലെടുത്തിരുന്നു.

അതേസമയം, ഏതെങ്കിലും രാഷ്ട്രീയ സംഘടനയുടെ പ്രതിനിധിയായല്ല, മുംബൈയിലെ താമസക്കാരൻ എന്ന നിലയിലാണ് പ്രതിഷേധത്തിൽ പങ്കെടുത്തതെന്ന് ഇമ്രാൻ ഖാൻ വ്യക്തമാക്കിയിരുന്നു. സഞ്ചാരസ്വാതന്ത്ര്യത്തിനും ജനങ്ങളുടെ ശബ്ദത്തിനും മേലുള്ള നിയന്ത്രണങ്ങളെയാണ് താൻ ചോദ്യം ചെയ്തതെന്നും അദ്ദേഹം പറഞ്ഞു.

The post പ്രതിഷേധത്തിൽ പങ്കെടുത്തതിന് നടപടി; നടൻ ഇമ്രാൻ ഖാനോട് ഒക്ടോബർ 28-നകം ഇന്ത്യ വിടാൻ നിർദേശം appeared first on ഇവാർത്ത | Evartha.

മാസപ്പടി കേസിൽ മുഖ്യമന്ത്രി പിണറായി വിജയൻ ഉൾപ്പെടെയുള്ളവർക്ക് ഹൈക്കോടതിയിൽ തിരിച്ചടി. വിജിലൻസ് എഫ്ഐആർ രജിസ്റ്റർ ചെയ്യാൻ ഉത്തരവിട്ട സിംഗിൾ ബെഞ്ച് വിധിക്കെതിരെ നൽകിയ അപ്പീൽ അനുമതി ഹർജികൾ ഹൈക്കോടതി തള്ളി. സിംഗിൾ ബെഞ്ച് ഉത്തരവിനെതിരെ അപ്പീൽ നിലനിൽക്കില്ലെന്നും കോടതി വ്യക്തമാക്കി.

തങ്ങളുടെ വാദം കേൾക്കാതെയാണ് സിംഗിൾ ബെഞ്ച് ഉത്തരവിട്ടതെന്നും നടപടി നിയമപരമല്ലെന്നുമായിരുന്നു ഹർജിക്കാരുടെ പ്രധാന വാദം. എന്നാൽ അപ്പീൽ നൽകാൻ അനുമതി നൽകരുതെന്ന നിലപാടാണ് എൻഫോഴ്‌സ്‌മെന്റ് ഡയറക്ടറേറ്റ് (ഇഡി) കോടതിയിൽ സ്വീകരിച്ചത്.

ഹർജിക്കാർക്ക് അനുകൂലമായ നിലപാടാണ് സംസ്ഥാന സർക്കാരും കോടതിയിൽ സ്വീകരിച്ചിരുന്നത്. എന്നാൽ ഇഡിയുടെ വാദങ്ങൾ അംഗീകരിച്ചുകൊണ്ടാണ് ഹൈക്കോടതി ഹർജികൾ തള്ളിയത്. ഇതോടെ മാസപ്പടി കേസിൽ പിണറായി വിജയൻ ഉൾപ്പെടെയുള്ളവരെ പിന്തുണച്ച സംസ്ഥാന സർക്കാരിനും കോടതിവിധി തിരിച്ചടിയായി.

The post മാസപ്പടി കേസ്: പിണറായി വിജയന് ഹൈക്കോടതിയിൽ തിരിച്ചടി; അപ്പീൽ അനുമതി ഹർജികൾ തള്ളി appeared first on ഇവാർത്ത | Evartha.

ടി20 ക്രിക്കറ്റിൽ അതിവേഗ അർധസെഞ്ച്വറി നേടി മലയാളി താരം സഞ്ജു സാംസൺ. ഹൈദരാബാദിൽ വെസ്റ്റ് ഇൻഡീസിനെതിരായ പരമ്പരയിലെ നാലാം മത്സരത്തിലാണ് സഞ്ജുവിന്റെ തകർപ്പൻ ബാറ്റിങ് പ്രകടനം. വെറും 20 പന്തിൽ താരം അർധസെഞ്ച്വറി തികച്ചു.

ആകെ 23 പന്തുകൾ നേരിട്ട സഞ്ജു 56 റൺസെടുത്താണ് പുറത്തായത്. ആറ് സിക്‌സും നാല് ഫോറും ഉൾപ്പെട്ടതായിരുന്നു താരത്തിന്റെ വെടിക്കെട്ട് ഇന്നിങ്‌സ്. സഞ്ജുവിന്റെ ആക്രമണോത്സുക ബാറ്റിങ്ങിന്റെ കരുത്തിൽ ഇന്ത്യ മൂന്ന് ഓവറിൽ തന്നെ 50 റൺസ് പിന്നിട്ടു.

ബാറ്റിങ്ങിന് ഇറങ്ങിയ ആദ്യ പന്ത് തന്നെ അതിർത്തി കടത്തിയാണ് സഞ്ജു തന്റെ വരവറിയിച്ചത്. കഴിഞ്ഞ മാസം അഫ്ഗാനിസ്ഥാനെതിരെയും 20 പന്തിൽ അർധസെഞ്ച്വറി നേടിയ പ്രകടനത്തിന് സമാനമായിരുന്നു ഇത്തവണത്തേത്.

2024ൽ ബംഗ്ലാദേശിനെതിരെ 22 പന്തിൽ അർധസെഞ്ച്വറി നേടിയതാണ് ഇതിന് മുമ്പ് സഞ്ജുവിന്റെ വേഗമേറിയ ഫിഫ്റ്റികളിലൊന്ന്. വെസ്റ്റ് ഇൻഡീസിനെതിരായ വെടിക്കെട്ട് പ്രകടനത്തിലൂടെ വീണ്ടും തന്റെ ബാറ്റിങ് മികവ് തെളിയിച്ചിരിക്കുകയാണ് മലയാളി താരം.

The post വെറും 20 പന്തിൽ അർധസെഞ്ച്വറി; വിൻഡീസിനെതിരെ സഞ്ജു സാംസണിന്റെ വെടിക്കെട്ട് appeared first on ഇവാർത്ത | Evartha.

ജന്തർ മന്തറിൽ ദേശീയപതാക ഉയർത്തിയതിനെത്തുടർന്ന് അറസ്റ്റിലായ നേതാക്കൾക്ക് ഐക്യദാർഢ്യം പ്രഖ്യാപിച്ച് വീണ്ടും പ്രതിഷേധത്തിനൊരുങ്ങാൻ പ്രവർത്തകരോട് ആഹ്വാനം ചെയ്ത് സിജെപി. വെള്ളിയാഴ്ച വൈകിട്ട് അഞ്ചിന് ഡൽഹിയിലെ കൊണോട്ട് പ്ലേസിലുള്ള സെൻട്രൽ പാർക്കിൽ ദേശീയപതാകയുമായി എത്തണമെന്ന് അഭിജീത് ദീപ്‌കെ പ്രവർത്തകരോട് ആവശ്യപ്പെട്ടു. സമൂഹമാധ്യമത്തിൽ പങ്കുവെച്ച വീഡിയോയിലൂടെയാണ് അദ്ദേഹം ആഹ്വാനം നടത്തിയത്.

അനുമതിയില്ലാതെ ജന്തർ മന്തറിൽ പ്രവേശിച്ച് ദേശീയപതാക ഉയർത്തിയതിനെത്തുടർന്ന് അറസ്റ്റിലായ സിജെപി നേതാക്കൾക്ക് പിന്തുണ പ്രഖ്യാപിച്ചാണ് പ്രതിഷേധം സംഘടിപ്പിക്കുന്നത്. ദേശീയപതാകയുമായി സമരത്തിൽ പങ്കെടുക്കണമെന്നാണ് പ്രവർത്തകർക്ക് നൽകിയിരിക്കുന്ന നിർദേശം.

ദേശീയപതാക ഉയർത്തുന്നത് കുറ്റകരമല്ലെന്ന കാര്യം ഭരണാധികാരികളെ ഓർമിപ്പിക്കണമെന്നും അഭിജീത് ദീപ്‌കെ പറഞ്ഞു. ഡൽഹിയിലെത്താൻ കഴിയാത്തവർ സ്വന്തം നഗരങ്ങളിൽ ദേശീയപതാകയുമായി മാർച്ച് നടത്തണമെന്നും അദ്ദേഹം ആവശ്യപ്പെട്ടു. ദേശീയപതാക രാജ്യത്തിന്റെ അഭിമാനമാണെന്നും അത് ഉയർത്തുന്നത് കുറ്റകൃത്യമല്ലെന്നും ജനങ്ങളെ ബോധ്യപ്പെടുത്തുകയാണ് പ്രതിഷേധത്തിന്റെ ലക്ഷ്യമെന്നും അദ്ദേഹം വ്യക്തമാക്കി.

ദേശീയപതാക ഉയർത്തിയതിന്റെ പേരിൽ ഇന്ത്യക്കാർ ജയിലിലായിരുന്നത് ബ്രിട്ടീഷ് ഭരണകാലത്താണെന്ന് അഭിജീത് ദീപ്‌കെ നേരത്തെയും വിമർശിച്ചിരുന്നു. ജന്തർ മന്തറിലെ പ്രതിഷേധവും നേതാക്കളുടെ അറസ്റ്റും സംബന്ധിച്ച വിവാദം തുടരുന്നതിനിടെയാണ് സിജെപി വീണ്ടും സമരത്തിന് ആഹ്വാനം ചെയ്തിരിക്കുന്നത്.

The post വീണ്ടും സമരത്തിന് ആഹ്വാനം ചെയ്ത് സിജെപി; വെള്ളിയാഴ്ച ദേശീയപതാകയുമായി ഡൽഹിയിൽ ഒത്തുചേരാൻ നിർദേശം appeared first on ഇവാർത്ത | Evartha.

മുതിർന്ന മാധ്യമപ്രവർത്തകനും മറുനാടന്‍ മലയാളി എഡിറ്ററുമായ ഷാജൻ സ്‌കറിയയ്‌ക്കെതിരെ നിരന്തരമായി ഉണ്ടാകുന്ന വധഭീഷണികളിൽ കോം ഇന്ത്യ എക്‌സിക്യൂട്ടീവ് യോഗം ശക്തമായി അപലപിച്ചു. ഒരു മൾട്ടി സ്റ്റേറ്റ് കോ ഓപ്പറേറ്റീവ് സൊസൈറ്റിയുമായി ബന്ധപ്പെട്ട് നൽകിയ വാർത്തയുടെതെന്ന പേരിൽ കഴിഞ്ഞ ദിവസം നിരന്തരം വാട്സാപ്പ് കോളായും സന്ദേശങ്ങളായും വധഭീക്ഷണി ഉൾപ്പെടെ ഉണ്ടായതായി പരാതി യുണ്ട്.

സ്വതന്ത്രമായി വാർത്തകൾ റിപ്പോർട്ട് ചെയ്യുന്ന മാധ്യമപ്രവർത്തകർക്കും മാധ്യമ സ്ഥാപനങ്ങൾക്കുമെതിരെ തുടർച്ചയായി ഉയരുന്ന വധഭീഷണികളും ആക്രമണ നീക്കങ്ങളും ജനാധിപത്യത്തിനും മാധ്യമസ്വാതന്ത്ര്യത്തിനും മേലുള്ള കടന്നുകയറ്റമാണെന്ന് യോഗം വിലയിരുത്തി.

ഇത്തരം ഭീഷണികൾക്കെതിരെ ശക്തമായ നിയമനടപടികൾ സ്വീകരിക്കണമെന്നും മാധ്യമപ്രവർത്തകരുടെ സുരക്ഷ ഉറപ്പാക്കണമെന്നും ആവശ്യപ്പെട്ട് സംസ്ഥാന ആഭ്യന്തര മന്ത്രിക്കും സംസ്ഥാന പോലീസ് മേധാവിക്കും പരാതി നൽകാൻ യോഗം തീരുമാനിച്ചു.

തുടർച്ചയായി വരുന്ന വധഭീഷണികളിൽ അടിയന്തരമായി ഇടപെടണമെന്നും കുറ്റക്കാർക്കെതിരെ വിട്ടുവീഴ്ചയില്ലാത്ത നടപടികൾ ഉണ്ടാകണമെന്നും കോം ഇന്ത്യ ആവശ്യപ്പെട്ടു. ചൊവ്വാഴ്ച കൂടിയ എക്‌സിക്യൂട്ടീവ് യോഗത്തിൽ യോഗത്തിൽ പ്രസിഡന്റ് വിൻസെന്റ് നെല്ലിക്കുന്നേൽ അധ്യക്ഷനായി.
സെക്രട്ടറി സോയിമോൻ മാത്യു പ്രമേയം അവതരിപ്പിച്ചു .

The post മാധ്യമപ്രവര്‍ത്തകന്‍ ഷാജന്‍ സ്കറിയക്കെതിരെ വധഭീഷണി: കോം ഇന്ത്യ അപലപിച്ചു appeared first on ഇവാർത്ത | Evartha.