അന്താരാഷ്ട്ര തലത്തിൽ കടുത്ത നയതന്ത്ര ഒറ്റപ്പെടലും വിമർശനങ്ങളും നേരിടുന്നതിനിടയിലും, ഇന്ത്യയെ വലിയൊരു ലോകശക്തിയായി വിശേഷിപ്പിച്ച് ഇസ്രായേൽ പ്രധാനമന്ത്രി ബെന്യാമിൻ നെതന്യാഹു. ലോകത്തിന്റെ പല ഭാഗങ്ങളിലും ജൂത രാഷ്ട്രത്തിന്റെ നിയമസാധുതയെ ഇല്ലാതാക്കാൻ ആസൂത്രിത ശ്രമങ്ങൾ നടക്കുമ്പോഴും, ഇന്ത്യക്ക് ഇസ്രായേലിനോട് ഭ്രാന്തമായ സ്നേഹമാണുള്ളതെന്ന് അദ്ദേഹം തുറന്നുപറഞ്ഞു.

ജോർദ്ദാൻ താഴ്‌വരയിൽ നടന്ന ഒരു ലീഡർഷിപ്പ് പ്രോഗ്രാമിൽ സംസാരിക്കവെയാണ്, ഇസ്രായേലിന്റെ വളർന്നുവരുന്ന അന്താരാഷ്ട്ര സഖ്യങ്ങൾക്ക് ഏറ്റവും മികച്ച ഉദാഹരണമായി അദ്ദേഹം ഇന്ത്യയെ ചൂണ്ടിക്കാണിച്ചത്. പശ്ചിമേഷ്യയിൽ അതീവ സങ്കീർണ്ണമായ ഭൗമരാഷ്ട്രീയ സാഹചര്യം നിലനിൽക്കുന്നതിനിടയിലാണ് പരമ്പരാഗത സഖ്യകക്ഷികൾക്കപ്പുറം പുതിയ പങ്കാളികളെ തേടുന്നതിന്റെ ഭാഗമായി നെതന്യാഹുവിന്റെ ഈ നിർണ്ണായക പ്രസ്താവന പുറത്തുവന്നിരിക്കുന്നത്.

തങ്ങൾ അന്താരാഷ്ട്ര തലത്തിൽ പുതിയ സഖ്യങ്ങൾ വിപുലീകരിക്കുകയാണെന്നും അത്തരമൊരു വലിയ മേഖലയിലേക്കുള്ള ചുവടുവെപ്പാണ് ഇന്ത്യയെന്ന മഹാശക്തിയുമായി ഇസ്രായേലിനുള്ള സവിശേഷമായ ബന്ധമെന്നും നെതന്യാഹു വ്യക്തമാക്കി. ഇസ്രായേൽ ഗവൺമെന്റ് പ്രസ് ഓഫീസ് പുറത്തുവിട്ട ഔദ്യോഗിക വീഡിയോയിലാണ് പ്രധാനമന്ത്രിയുടെ ഈ വെളിപ്പെടുത്തലുള്ളത്.

ലോകത്തിലെ ഭൂരിഭാഗം രാജ്യങ്ങളിൽ നിന്നും ഇസ്രായേലിന് നിലവിൽ വലിയ രീതിയിലുള്ള എതിർപ്പുകളും നിയമസാധുത ചോദ്യം ചെയ്യലുകളും നേരിടേണ്ടി വരുന്നുണ്ട്. എന്നാൽ ഇന്ത്യയിൽ നിന്ന് ഇത്തരമൊരു അനുഭവം ഉണ്ടാകുന്നില്ലെന്ന് നെതന്യാഹു ചൂണ്ടിക്കാട്ടി.

ഇന്ത്യക്ക് ഇസ്രായേലിനോടുള്ളത് ഭ്രാന്തമായ സ്നേഹമാണ്. തന്റെ ഔദ്യോഗിക സോഷ്യൽ മീഡിയ അക്കൗണ്ടുകൾ പരിശോധിച്ചാൽ പോലും ലോകത്ത് മറ്റെവിടെയുമുള്ളതിനേക്കാൾ കൂടുതൽ ഫോളോവേഴ്സ് ഉള്ളത് ഇന്ത്യയിൽ നിന്നാണെന്ന് താൻ കരുതുന്നതായും നെതന്യാഹു പ്രസംഗത്തിൽ ഓർമ്മിപ്പിച്ചു.

മുൻപും ഇന്ത്യൻ പ്രധാനമന്ത്രി നരേന്ദ്ര മോദിയുമായി തനിക്കുള്ള വ്യക്തിപരമായ സൗഹൃദത്തെക്കുറിച്ചും ഇരുരാജ്യങ്ങളും തമ്മിലുള്ള തന്ത്രപരമായ ബന്ധത്തിന്റെ കരുത്തിനെക്കുറിച്ചും നെതന്യാഹു പലവേദികളിലും വാചാലനായിട്ടുണ്ട്. ഇന്ത്യ അങ്ങേയറ്റം ശക്തമായ രാജ്യമാണെന്നും പ്രതിരോധം, സാങ്കേതികവിദ്യ ഉൾപ്പെടെയുള്ള വിവിധ മേഖലകളിൽ ഇരുരാജ്യങ്ങളും തമ്മിലുള്ള സഹകരണം അതിവേഗം വളരുകയാണെന്നും അദ്ദേഹം മുന്നേ വ്യക്തമാക്കിയിരുന്നു.

The post ഇന്ത്യക്ക് ഇസ്രായേലിനോട് തികച്ചും ‘ഭ്രാന്തമായ സ്നേഹം’ ; പ്രശംസയുമായി ഇസ്രായേൽ പ്രധാനമന്ത്രി ബെന്യാമിൻ നെതന്യാഹു appeared first on ഇവാർത്ത | Evartha.

കോഴിക്കോട് ജില്ലയിലെ വടകരയില്‍ കോണ്‍ഗ്രസ് നേതാവിന്റെ വീട്ടില്‍ ആത്മഹത്യക്ക് ശ്രമിച്ചയാള്‍ മരിച്ചു. തിരുവള്ളൂര്‍ സ്വദേശി ഇബ്രാഹിംകുട്ടിയാണ് മരിച്ചത്. ഡിസിസി സെക്രട്ടറി സുധീറിന്റെ വീട്ടിലെത്തിയ ഇയാള്‍ ശരീരമാസകലം പെട്രോള്‍ ഒഴിച്ച് തീകൊളുത്തകയായിരുന്നു.

സംഭവത്തിൽ ഇബ്രാഹിംകുട്ടിക്ക് 60 ശതമാനം പൊള്ളലേറ്റിരുന്നു. കടത്തനാട് സൊസൈറ്റിയില്‍ ഇബ്രാഹിംകുട്ടി അരക്കോടി രൂപ നിക്ഷേപിച്ചിരുന്നു. നിക്ഷേപത്തുക തിരിച്ചുകിട്ടാത്തതില്‍ പ്രതിഷേധിച്ചായിരുന്നു ആത്മഹത്യയ്ക്ക് ശ്രമിച്ചത്. സുധീര്‍കുമാര്‍ സൊസൈറ്റിയിലെ മുന്‍ ഡയറക്ടറാണ്.

The post കോഴിക്കോട് ഡിസിസി സെക്രട്ടറിയുടെ വീട്ടിലെത്തി തീ കൊളുത്തി; ആത്മഹത്യക്ക് ശ്രമിച്ചയാള്‍ മരിച്ചു appeared first on ഇവാർത്ത | Evartha.

താരസംഘടനയായ ‘അമ്മ’യിൽ നടക്കുന്ന തർക്കവും പോരുമൊക്കെ സോഷ്യൽ മീ‍ഡിയയിലും ചർച്ചയാണിപ്പോൾ. ‘അമ്മ’യെക്കുറിച്ച് നടി അന്ന രാജൻ പറഞ്ഞ വാക്കുകളാണിപ്പോൾ സോഷ്യൽ മീഡിയയിൽ ശ്രദ്ധേയമാകുന്നത്. അമ്മയിൽ ചേരാൻ വച്ചിരുന്ന പൈസയ്ക്ക് സ്വർണം വാങ്ങിയെന്നും അതിനിപ്പോൾ ഇരട്ടി വിലയാണെന്നുമാണ് അന്ന പറയുന്നത്. “ഇതുവരെ ആയിട്ടും ജോയ്ന്‍ ചെയ്തിട്ടില്ല.

‘അമ്മ’യില്‍ ഇതുവരെ ഞാന്‍ അംഗത്വം എടുത്തിട്ടില്ല. ഭാവിയില്‍ ചേരുമോ ഇല്ലയോ എന്നും അറിയില്ല. ഇത്രയും വര്‍ഷമായിട്ടും എനിക്ക് അതിന്‍റെ ആവശ്യം തോന്നിയിട്ടില്ല. അംഗത്വം എടുക്കാന്‍ നല്ലൊരു തുക വേണം. ആ തുക കൊണ്ട് ഗോള്‍ഡ് വാങ്ങിച്ചുവെന്ന് മുന്‍പ് ഞാന്‍ പറഞ്ഞിട്ടുണ്ട്. അന്ന് വാങ്ങിച്ച സ്വര്‍ണത്തിന്‍റെ വില ഇന്ന് ഇരട്ടിയായിട്ടുണ്ട്”.- അന്ന രാജൻ പറഞ്ഞു.

‘അമ്മ’ സംഘടനയിൽ നിലവിൽ നടക്കുന്ന തർക്കത്തെ കുറിച്ചും അന്ന രാജൻ പ്രതികരിച്ചിരുന്നു. “അമ്മ സംഘടയുടെ നേതൃസ്ഥാനത്തേക്ക് സ്ത്രീകള്‍ വന്നപ്പോള്‍ ഞാനും സന്തോഷിച്ചിരുന്നു. ഇനി ധൈര്യമായിട്ട് അമ്മയില്‍ കയറാം എന്നാണ് കരുതിയത്. അപ്പോഴാണ് ഇത്രയും പ്രശ്നങ്ങള്‍ നടക്കുന്നത്. പിന്നെ ചേരണ്ടെന്ന് ഞാനും വിചാരിച്ചു”, എന്നായിരുന്നു അന്ന പറഞ്ഞത്.

ഇപ്പോൾ, അന്നയെ പ്രശംസിച്ച് നിരവധി പേരാണിപ്പോൾ രം​ഗത്തെത്തുന്നത്. അന്ന എടുത്തത് നല്ലൊരു തീരുമാനമാണെന്നാണ് പലരുടെയും പ്രതികരണം. അതേസമയം, അമ്മയിൽ ചേർന്നാൽ നിരവധി ഉപകാരങ്ങൾ ഉണ്ടാകുമെന്നും ഈ തുക കൊണ്ട് നിരവധി അഭിനേതാക്കളുടെ കുടുംബം പോറ്റാനാകുമെന്ന് പറയുന്നവരുമുണ്ട്.

The post ‘അമ്മ’യിൽ ചേരാൻ വച്ചിരുന്ന പൈസയ്ക്ക് സ്വർണം വാങ്ങി; അതിനിപ്പോൾ ഇരട്ടി വിലയായി : അന്ന രാജൻ appeared first on ഇവാർത്ത | Evartha.

ശ്രീപത്മനാഭ സ്വാമി ക്ഷേത്രത്തിലെ സ്വര്‍ണമോഷണത്തില്‍ പൊലീസ് റിപ്പോര്‍ട്ട് തള്ളി ഭരണസമിതി. റിപ്പോര്‍ട്ട് തയാറാക്കിയ ഉദ്യോഗസ്ഥനെതിരെ നിയമനടപടി സ്വീകരിക്കണമെന്നും ക്ഷേത്രത്തില്‍ നിന്ന് വിലപിടിപ്പുള്ളതൊന്നും നഷ്ടമായില്ലെന്നും ഭരണസമിതി അറിയിച്ചു.

റിപ്പോര്‍ട്ട് തയാറാക്കിയ ഉദ്യോഗസ്ഥനെതിരെ നിയമനടപടി സ്വീകരിക്കണമെന്നാവശ്യപ്പെട്ട് അഭ്യന്തരമന്ത്രിക്ക് റിപ്പോര്‍ട്ട് നല്‍കാനും ഭരണസമിതി യോഗം തീരുമാനിച്ചു. പത്മനാഭസ്വാമി ക്ഷേത്രത്തില്‍ നിന്ന് വിലപിടിപ്പുള്ള ആഭരണങ്ങള്‍ നഷ്ടമായെന്നതും സുരക്ഷാവീഴ്ച സംഭവിച്ചെന്നതുള്‍പ്പെടെയുള്ള റിപ്പോര്‍ട്ടുകള്‍ അടിസ്ഥാന രഹിതവും തെറ്റുമാണെന്ന് ക്ഷേത്ര ഭരണസമിതി വ്യക്തമാക്കി.

ക്ഷേത്രത്തില്‍ പ്രവേശിക്കുമ്പോഴും പുറത്തുകടക്കുമ്പോഴും ജീവനക്കാര്‍ പരിശോധനയ്ക്ക് വിധേയരാണ്. വിലപിടിപ്പുള്ളതൊന്നും ക്ഷേത്രത്തില്‍ നിന്ന് നഷ്ടമായിട്ടില്ല. തെറ്റായ വാദങ്ങള്‍ ഉന്നയിക്കുന്നത് ദുരുദ്ദേശ്യപരമാണെന്നും ഭരണസമിതി വ്യക്തമാക്കി.

പൊലീസ് റിപ്പോര്‍ട്ടിനെക്കുറിച്ച് ക്ഷേത്ര ഭരണ സമിതിയോട് മന്ത്രി കെ മുരളീധരന്‍ വിശദീകരണം തേടിയിരുന്നു. ഇന്റലിജന്‍സ് ADGP പി വിജയന്‍ നല്‍കിയ റിപ്പോര്‍ട്ടിന്റെ അടിസ്ഥാനത്തിലാണ് സംസ്ഥാന പൊലീസ് മേധാവി ക്ഷേത്രത്തിലെ അമൂല്യവസ്തുക്കള്‍ കാണാതാകുന്നുവെന്ന് ചൂണ്ടിക്കാട്ടി ആഭ്യന്തര വകുപ്പ് സെക്രട്ടറിക്ക് കത്ത് നല്‍കിയത്. എന്നാല്‍ റിപ്പോര്‍ട്ടിലെ ആരോപണം അടിസ്ഥാന രഹിതമെന്നും സുരക്ഷാ വീഴ്ചയില്ലെന്നും കാട്ടി ക്ഷേത്രം എക്‌സിക്യുട്ടിവ് ഓഫിസറുടെ വിശദീകരണം.

The post ശ്രീപദ്മനാഭ സ്വാമി ക്ഷേത്രത്തിലെ സ്വര്‍ണം നഷ്ടപെട്ടിട്ടില്ല ; റിപ്പോര്‍ട്ട് തയ്യാറാക്കിയ ഉദ്യോഗസ്ഥനെതിരെ നടപടി സ്വീകരിക്കണമെന്ന് ഭരണസമിതി appeared first on ഇവാർത്ത | Evartha.

സംസ്ഥാനത്തെ സ്‌കൂൾ പ്രവേശനോത്സവ ഗാനത്തിന് ഇത്തവണ എഐ ദൃശ്യാവിഷ്‌കാരം. ആദ്യമായാണ് എഐയില്‍ ദൃശ്യാവിഷ്‌കാരവും പുറത്തിറക്കുന്നത്. റഫീഖ് അഹമ്മദിന്റെ വരികളില്‍ ഹിഷാം അബ്ദുല്‍ വഹാബാണ് ഗാനം പാടിയത്.

മുഖ്യമന്ത്രിയുടെ ‘പൂക്കി’ ചിരിയോടെയാണ് ഗാനത്തിന്റെ ദൃശ്യാവിഷ്‌കാരം തുടങ്ങുന്നത് തന്നെ. പൊതുവിദ്യാഭ്യാസ മന്ത്രി എന്‍. ഷംസുദ്ദീനും എഐ ഗാനത്തില്‍ ഭാഗമാകുന്നുണ്ട്. തിങ്കളാഴ്ചയാണ് പ്രവേശനോത്സവത്തിന്റെ സംസ്ഥാനതല ഉദ്ഘാടനം. പട്ടം ഗവ. ഗേള്‍സ് ഹൈസ്‌കൂളില്‍ മുഖ്യമന്ത്രി തന്നെ പ്രവേശനോത്സവത്തിന്റെ ഉദ്ഘാടനം നിര്‍വഹിക്കും.

The post സ്‌കൂൾ പ്രവേശനോത്സവ ഗാനത്തിന് ഇത്തവണ എഐ ദൃശ്യാവിഷ്‌കാരം; മുഖ്യമന്ത്രിയുടെ ‘പൂക്കി’ ചിരിയോടെ ആരംഭം appeared first on ഇവാർത്ത | Evartha.

യുഡിഎഫ് സ‌ർക്കാരിന്റെ നയപ്രഖ്യാപനത്തെ വിമർശിച്ച് സിപിഐ സംസ്ഥാന സെക്രട്ടറി ബിനോയ് വിശ്വം. നയപ്രഖ്യാപനത്തിൽ കാര്യമായ നയം ഒന്നും ഉണ്ടായിരുന്നില്ലെന്നും ഉപരിപ്ലവകരമായ നയപ്രഖ്യാപനമാണ് ഗവർണറെ കൊണ്ട് സർക്കാർ നടത്തിയതെന്നും അദ്ദേഹം പറഞ്ഞു. ഒരു രാഷ്ട്രീയം നയ പ്രഖ്യാപനത്തിൽ ഉണ്ടെന്ന് ചൂണ്ടിക്കാട്ടിയ അദ്ദേഹം കേന്ദ്ര സർക്കാരിന് സങ്കടമോ ദേഷ്യമോ ഉണ്ടാകുന്ന ഒന്നും ചെയ്യാതിരിക്കുക എന്നതാണ് അതെന്നും പരിഹസിച്ചു.

കേന്ദ്ര സർക്കാരിനെതിരെ ഒരു വാക്കു പോലും നയപ്രഖ്യാപനത്തിൽ പരാമർശമില്ല. കേന്ദ്രത്തെ തലോടിയും തൊട്ടും പോകാൻ ശ്രമിക്കുന്നതാണ് കണ്ടത്. മധുവിധുവിന്റെ ഭാഗമാണോ ഇതെന്ന് ചോദിച്ച അദ്ദേഹം കഴിഞ്ഞ 10 വർഷം കേന്ദ്രത്തിന്റെ തെറ്റായ നയങ്ങൾ കേരളം കണ്ടതാണെന്നും പറ‍ഞ്ഞു. ഈ നയം മാറാതെ കേരളത്തിൽ ആരും ഭരിച്ചാലും അനുകൂലമായി ഒന്നും ഉണ്ടാകില്ലെന്നും ബിനോയ് വിശ്വം കൂട്ടിച്ചേർത്തു.

എന്തെല്ലാമൊക്കെയോ ചെയ്യാൻ പോകുന്നു എന്ന പ്രതീതി ഉണ്ടാക്കിക്കൊണ്ടാണ് സർക്കാർ വന്നത്. പക്ഷേ അങ്ങനെ ഒന്നും തന്നെ പ്രഖ്യാപനത്തിൽ ഇല്ല. വാഗ്ദാനങ്ങൾ വാരിക്കോരി നൽകുകയാണ് പുതിയ സർക്കാർ. സംസ്ഥാനത്തിനും നാടിനും ജനങ്ങൾക്കും ഗുണപ്രദമായ നടപടികളും ഉണ്ടായാൽ ഇടതുപക്ഷം പിന്തുണയ്ക്കും. എന്നാൽ ജനദ്രോഹ നടപടികളിലേക്ക് സർക്കാർ കടന്നാൽ അതിനെ ചെറുത്തു തോൽപ്പിക്കാൻ ജനങ്ങളുടെ കൂടെ ഇടതുപക്ഷം ഉണ്ടാകും‌, നയപ്രഖ്യാപനത്തിലെ മുഖ്യമന്ത്രിയുടെ വിശദീകരണത്തിൽ നിരവധി ചോദ്യങ്ങൾക്ക് മറുപടിയില്ലെന്നും ബിനോയ് വിശ്വം ചൂണ്ടിക്കാട്ടി.

കെ എസ് ആർ ടി സി യിലെ സൗജന്യ യാത്രയുമായി ബന്ധപ്പെട്ട് സ്ത്രീകളെ അനന്തമായി കാത്തിരിപ്പിക്കരുതെന്നും അദ്ദേഹം ആവശ്യപ്പെട്ടു. സൗജന്യ യാത്ര ഇനിയും വൈകാൻ പാടില്ലെന്നും സർക്കാർ കേന്ദ്ര സർക്കാറിനെതിരെ ഇപ്പോൾ പാലിക്കുന്ന മൗനം ഒരു നയം ആക്കാൻ പാടില്ലെന്നും അദ്ദേഹം പറഞ്ഞു.

പ്രതിപക്ഷ നേതാവ് പിണറായി വിജയനെതിരെ നടന്ന ഇ.ഡി. റെയ്ഡിലും അദ്ദേഹം പ്രതികരിച്ചു. ഇ.ഡി. ഒരു രാഷ്ട്രീയ സീൻ ഉണ്ടാക്കി. ആ കേസിൽ ഒരുതരത്തിലും ബന്ധമില്ലാത്ത വ്യക്തിയാണ് പിണറായി വിജയൻ, ആ കേസിൽ കക്ഷി അല്ലാത്ത ഒരു വ്യക്തി. അങ്ങനെ ഒരു വ്യക്തിയെ എന്തിനാണ് മണിക്കൂറുകളോളം തടഞ്ഞ് റെയ്ഡ് നടത്തിയത്? അങ്ങനെ ഒരു പൊളിറ്റിക്കൽ ഷോ ഇ ഡി നടത്താൻ പാടില്ലായിരുന്നു. ഇ ഡി ഈ രാഷ്ട്രീയം പലയിടത്തും കളിച്ചതാണ്, ബിനോയ് വിശ്വം പറഞ്ഞു.

The post കേന്ദ്ര സർക്കാരിനെതിരെ ഒരു വാക്കു പോലും നയപ്രഖ്യാപനത്തിൽ പരാമർശമില്ല; കേന്ദ്രത്തെ തലോടിയും തൊട്ടും പോകാൻ ശ്രമിക്കുന്നതാണ് കണ്ടത്: ബിനോയ് വിശ്വം appeared first on ഇവാർത്ത | Evartha.

രണ്ടാം തവണയും തുടര്‍ച്ചയായ ഫുട്‌ബോള്‍ ലോകകപ്പ് കിരീടം ലക്ഷ്യമിട്ട് കളിക്കാനിറങ്ങുന്ന അര്‍ജന്റീനന്‍ ടീമിനെ ഇക്കുറിയും മെസ്സി തന്നെ നയിക്കും. 2026 ഫിഫ ഫുട്‌ബോള്‍ ലോകകപ്പിലെ ടീമില്‍ 26 അംഗ സ്‌ക്വാഡിനെയാണ് പരിശീലകന്‍ ലയണല്‍ സ്‌കലോണി പ്രഖ്യാപിച്ചിരിക്കുന്നത്. എമിലിയാനോ മാര്‍ട്ടീനസും ജൂലിയന്‍ ആല്‍വരാസും ലൗട്ടാരോ മാര്‍ട്ടീനസും അടക്കം കഴിഞ്ഞ ലോകകപ്പ് ടീമിലെ 17 പേര്‍ ഇത്തവണയും ഉള്‍പ്പെട്ടിട്ടുണ്ട്.

എമിലിയാനോ മാര്‍ട്ടീനസും ജെറോനിമോ റൂലിയും ജുവാന്‍ മൂസ്സോയുമാണ് ഗോള്‍ കീപ്പര്‍മാര്‍. പ്രതിരോധ നിരയില്‍ ലിയണാര്‍ഡോ ബലേര്‍ഡി, നികോളാസ് ടഗ്ലിയാഫികോ, ഗോണ്‍സാലോ മോണ്‍ടിയേല്‍, ലിസാന്ഡ്രോ മാര്‍ട്ടിനേസ്, ക്രിസ്റ്റ്യൻ റൊമോറോ, നിക്കോളാസ് ഓട്ടോമെന്‍ഡി, ഫക്കുന്‍ഡോ മെഡിന, നഹുവേല്‍ മൊലീന എന്നിവരും ഉള്‍പ്പെട്ടിരിക്കുന്നു.

മധ്യനിരയില്‍ ലിയാന്‍ഡ്രോ പാരേഡ്‌സ്, റോഡ്രിഗോ ഡീ പോള്‍, വാലെന്റി ബാര്‍കോ, ജിയാവാനി ലോ സെല്‍സോ, എക്‌സിക്വേല്‍ പലാസിയോസ്, എന്‍സോ ഫെര്‍ണാണ്ടസ്, അലെക്‌സിസ് മാക് അലിസ്റ്റര്‍ എന്നിവര്‍ ഉള്‍പ്പെട്ടിരിക്കുന്നു.

മുന്നേറ്റനിരയില്‍ ജൂലിയന്‍ ആല്‍വാരസ്, ലയണല്‍ മെസി, നിക്കോളാസ് ഗോണ്‍സാലെസ, തിയാഗോ അല്‍മാഡ, ജുലിയാനോ സിമോണ്‍, നികോ പാസ്, ജോസ് മാന്വേല്‍ ലോപസ്, ലൗട്ടാരോ മാര്‍ട്ടിനേസ് എന്നിവരാണ്. അതേസമയം റയല്‍ മാഡ്രിഡിലെ പുത്തന്‍ താരോദയം ഫ്രാന്‍കോ മസ്റ്റാറ്റുവോനോ, മാര്‍കോസ് സനേസി, എമിലിയാനോ ബുവേണ്ടിയ, പൗലോ ഡി ബാല എന്നിവര്‍ ടീമില്‍ ഉള്‍പ്പെട്ടില്ല.

പരിക്ക് സംബന്ധമായ ആശങ്കകള്‍ക്കിടെയാണ് മെസ്സിയുടെ പേരും ടീമില്‍ ഉള്‍പ്പെട്ടിരിക്കുന്നത്. തന്റെ ആറാം ലോകകപ്പിനൊരുങ്ങുകയാണ് മെസി. എമിലിയാനോ മാര്‍ട്ടിനേസിന്റെ പരിക്കും ആശങ്കപ്പെടുത്തുന്നതാണ്.

The post ലോകകപ്പിൽ മെസ്സി നയിക്കും; 26 അംഗ സ്‌ക്വാഡിനെ പ്രഖ്യാപിച്ച് അര്‍ജന്റീന appeared first on ഇവാർത്ത | Evartha.

പുതിയ സർക്കാരിന്റെ സമീപനം വ്യക്തമല്ലെന്ന് പ്രതിപക്ഷ നേതാവ് പിണറായി വിജയൻ. പ്രതീക്ഷിച്ച രീതിയിലുള്ള നയപ്രഖ്യാപനമല്ല ഉണ്ടായതെന്ന് പറഞ്ഞ പിണറായി വിജയൻ യുഡിഎഫ് സർക്കാരിൻ്റെ ആദ്യ നയപ്രഖ്യാപന പ്രസംഗത്തിനിടെ ഗുരുതര ചട്ടലംഘനം ഉണ്ടായെന്നും ചൂണ്ടിക്കാട്ടി. നിയമസഭയ്ക്ക് അകത്ത് പ്രവേശിക്കാൻ ഡിജിപിക്ക് അനുമതിയില്ലെന്ന് പിണറായി വിജയൻ പറഞ്ഞു.

ഗവർണർ രാജേന്ദ്ര അർലേക്കർക്കൊപ്പം സംസ്ഥാന പൊലീസ് മേധാവി റവഡ ചന്ദ്രശേഖർ നിയമസഭയ്ക്ക് അകത്ത് പ്രവേശിച്ചു. പിന്നീട് മറ്റൊരു വഴിയിലൂടെ ഇദ്ദേഹം പുറത്തേക്ക് പോയി. നിയമസഭയ്ക്ക് അകത്ത് പ്രവേശിക്കാൻ ഡിജിപിക്ക് അനുമതിയില്ല. ഇത് പതിവില്ലാത്ത കീഴ്വഴക്കമെന്ന് പ്രതിപക്ഷ നേതാവ് പിണറായി വിജയൻ ചൂണ്ടിക്കാട്ടി. സഭയ്ക്ക് അകത്ത് കടക്കാൻ പ്രോട്ടോകോൾ പ്രകാരം ഡിജിപിക്ക് അനുമതിയില്ലെന്നും പിണറായി വിജയൻ ചൂണ്ടിക്കാട്ടി.

ഡിജിപി സഭയ്ക്ക് അകത്ത് വന്നത് ഗവർണർക്കൊപ്പമാണ്. പ്രോട്ടോകോൾ ലംഘനം ഉദ്യോഗസ്ഥരും ശ്രദ്ധയിപ്പെടുത്തിയിരുന്നു. സഭാതലത്തിൽ പ്രവേശിച്ച ശേഷമാണ് മറ്റൊരു വഴിയിലൂടെ ഡിജിപി പുറത്ത് പോയത്. സംഭവം ശ്രദ്ധയിൽപ്പെട്ടെന്ന് സ്പീക്കർ തിരുവഞ്ചൂർ രാധാകൃഷ്‌ണൻ സഭയിൽ പ്രതിപക്ഷ നേതാവിന് മറുപടി നൽകി. അശ്രദ്ധ കൊണ്ടാകാം ഡിജിപി സഭയ്ക്ക് അകത്ത് പ്രവേശിച്ചതെന്നും സ്‌പീക്കർ മറുപടിയിൽ പറഞ്ഞു.

The post നിയമസഭയ്ക്ക് അകത്ത് പ്രവേശിക്കാൻ ഡിജിപിക്ക് അനുമതിയില്ല; നയപ്രഖ്യാപന പ്രസംഗത്തിനിടെ ഗുരുതര ചട്ടലംഘനം ഉണ്ടായതായി പിണറായി വിജയൻ appeared first on ഇവാർത്ത | Evartha.

അന്താരാഷ്ട്ര ഭൗമരാഷ്ട്രീയ രംഗത്ത് വൻ മാറ്റങ്ങൾ പ്രകടമാകുന്ന പശ്ചാത്തലത്തിൽ പാകിസ്ഥാൻ ഭരണകൂടത്തിന് കടുത്ത ഭീഷണിയുമായി ഭീകര സംഘടനകൾ രംഗത്ത്. ഇസ്രായേലുമായി നയതന്ത്ര ബന്ധം സ്ഥാപിക്കാൻ പാകിസ്ഥാൻ നീക്കം നടത്തിയാൽ രാജ്യത്ത് വൻ നാശനഷ്ടങ്ങൾ ഉണ്ടാക്കുമെന്നാണ് ഉയർന്ന ഭീഷണി. കശ്മീരിലെ പഹൽഗാമിൽ നടന്ന വൻ ഭീകരാക്രമണത്തിന്റെ പ്രധാന സൂത്രധാരനായ ലഷ്‌കർ ഇ ത്വയ്ബ കമാൻഡറാണ് ഇപ്പോൾ ഇസ്ലാമാബാദിനെതിരെ കടുത്ത മുന്നറിയിപ്പ് നൽകിയിരിക്കുന്നത്.

ഇസ്രായേലിനെ ഒരു പരമാധികാര രാജ്യമായി അംഗീകരിക്കാൻ പാകിസ്ഥാൻ തയ്യാറാകുന്നു എന്ന രീതിയിലുള്ള ചർച്ചകൾ ആഗോള തലത്തിൽ സജീവമാണ്. ഇതിന് പിന്നാലെയാണ് തീവ്രവാദ സംഘടനകൾ സ്വന്തം രാജ്യത്തിന്റെ നയങ്ങൾക്കെതിരെ പരസ്യമായ വെല്ലുവിളിയുമായി രംഗത്തെത്തിയത്. ബന്ധങ്ങൾ സാധാരണ നിലയിലാക്കാൻ ശ്രമിച്ചാൽ പാകിസ്ഥാന്റെ നിലനിൽപ്പ് തന്നെ അപകടത്തിലാക്കുമെന്നാണ് ഭീകരർ പുറത്തുവിട്ട പുതിയ വീഡിയോ സന്ദേശത്തിൽ വ്യക്തമാക്കുന്നത്.

പശ്ചിമേഷ്യയിലെയും അറബ് ലോകത്തെയും ചില രാജ്യങ്ങൾ ഇസ്രായേലുമായി നയതന്ത്ര ബന്ധങ്ങൾ സ്ഥാപിച്ചതിന് പിന്നാലെ പാകിസ്ഥാന് മേലും വലിയ രീതിയിലുള്ള അന്താരാഷ്ട്ര സമ്മർദ്ദമുണ്ട്. എന്നാൽ ഇത്തരമൊരു നീക്കം ഉണ്ടായാൽ അതിനെ രാജ്യദ്രോഹമായി കണക്കാക്കുമെന്നാണ് ഭീകര സംഘടനകളുടെ വാദം. ഇസ്ലാമിക മൂല്യങ്ങൾക്ക് വിരുദ്ധമായ തീരുമാനങ്ങളിൽ നിന്നും പിന്മാറാൻ അവർ ഭരണകൂടത്തോട് ആവശ്യപ്പെടുന്നു.

പാകിസ്ഥാനിലെ പഞ്ചാബ് പ്രവിശ്യയിലുള്ള സുരക്ഷിത താവളത്തിൽ നിന്നാണ് ഈ ഭീകരൻ നിലവിൽ പ്രവർത്തിക്കുന്നത്. രാജ്യത്തെ പ്രമുഖ നഗരങ്ങളിലും തന്ത്രപ്രധാന കേന്ദ്രങ്ങളിലും ആക്രമണം നടത്താൻ തങ്ങളുടെ സ്ലീപ്പർ സെല്ലുകൾ സജ്ജമാണെന്നും ഭീഷണിയിലുണ്ട്. പാകിസ്ഥാൻ രഹസ്യാന്വേഷണ ഏജൻസികളുടെ സംരക്ഷണയിൽ കഴിയുന്നവർ തന്നെ ഭരണകൂടത്തിന് നേരെ തിരിയുന്നത് വലിയ പ്രതിസന്ധിയാണ് സൃഷ്ടിക്കുന്നത്.കഴിഞ്ഞ വർഷം പഹൽഗാമിൽ നിരവധി വിനോദസഞ്ചാരികളുടെ മരണത്തിന് ഇടയാക്കിയ ക്രൂരമായ ആക്രമണം ആസൂത്രണം ചെയ്തത് ഈ കമാൻഡറായിരുന്നു.

ദേശീയ അന്വേഷണ ഏജൻസി സമർപ്പിച്ച കുറ്റപത്രത്തിൽ ഇയാളുടെ പങ്കാളിത്തം കൃത്യമായി രേഖപ്പെടുത്തിയിട്ടുണ്ട്. ഇന്ത്യയും ഇസ്രായേലും തമ്മിലുള്ള ശക്തമായ നയതന്ത്ര സഹകരണവും ഭീകര സംഘടനകളെ വലിയ രീതിയിൽ പ്രകോപിപ്പിക്കുന്നുണ്ട്.ആഗോള ഭീകര ശൃംഖലകൾ തമ്മിലുള്ള സഹകരണം വർദ്ധിച്ചുവരുന്നതായി അന്താരാഷ്ട്ര സുരക്ഷാ ഏജൻസികൾ നേരത്തെ തന്നെ മുന്നറിയിപ്പ് നൽകിയിരുന്നു.

പശ്ചിമേഷ്യയിലെ ചില പ്രമുഖ സംഘടനകളുടെ പ്രതിനിധികൾ പാകിസ്ഥാൻ അധീന കശ്മീരിലെ ഭീകര ക്യാമ്പുകൾ സന്ദർശിച്ചതായും റിപ്പോർട്ടുകളുണ്ട്. ഈ കൂട്ടുകെട്ടാണ് ഇപ്പോൾ പാകിസ്ഥാൻ ഭരണകൂടത്തിന് തന്നെ വലിയ തലവേദനയായി മാറിയിരിക്കുന്നത്.

The post ഇസ്രായേലുമായി കൈകോർത്താൽ രാജ്യം തകരും; പാകിസ്ഥാന് മുന്നറിയിപ്പുമായി പഹൽഗാം ഭീകരാക്രമണത്തിന്റെ സൂത്രധാരൻ appeared first on ഇവാർത്ത | Evartha.

16-ാം നിയമസഭയുടെ ആദ്യ സമ്മേളനത്തിന് തുടക്കമായി. ഗവർണറുടെ നയപ്രഖ്യാപനത്തോടെയാണ് സമ്മേളനം ആരംഭിച്ചത്. 25 ലക്ഷം രൂപയുടെ ഉമ്മൻ ചാണ്ടി ആരോഗ്യ ഇൻഷുറൻസ്, കെഎസ്ആർടിസി ബസിൽ സ്ത്രീകൾക്ക് സൗജന്യ യാത്ര തുടങ്ങി തിരഞ്ഞെടുപ്പ് കാലത്ത് യുഡിഎഫ് മുന്നോട്ടുവെച്ച ഇന്ദിരാ ഗ്യാരന്റികൾ നയപ്രഖ്യാപനത്തിൽ ഇടംപിടിച്ചു.

സ്ത്രീകൾക്ക് കെഎസ്ആർടിസി ബസുകളിൽ സൗജന്യ യാത്ര സ്ഥിരമായ അവകാശമാക്കി മാറ്റുകയും, കോളേജുകളിൽ പഠിക്കുന്ന പെൺകുട്ടികൾക്ക് വിദ്യാഭ്യാസ സഹായമായി പ്രതിമാസം 1000 രൂപ വീതം നൽകുകയും ചെയ്യും.സാമൂഹിക സുരക്ഷാ പെൻഷൻ 3,000 രൂപയായി വർദ്ധിപ്പിക്കാനും, മുൻ മുഖ്യമന്ത്രി ഉമ്മൻചാണ്ടിയുടെ പേരിൽ ഓരോ കുടുംബത്തിനും വർഷം തോറും 25 ലക്ഷം രൂപയുടെ സൗജന്യ ആരോഗ്യ ഇൻഷുറൻസ് പരിരക്ഷ നൽകാനും സർക്കാർ തീരുമാനിച്ചു.

കൂടാതെ, യുവ സംരംഭകർക്കായി 5 ലക്ഷം രൂപയുടെ പലിശരഹിത വായ്പകളും മുതിർന്ന പൗരന്മാരുടെ ക്ഷേമത്തിനായി രാജ്യത്തെ ആദ്യത്തെ പ്രത്യേക വകുപ്പും രൂപീകരിക്കും.വികസനവും ജനക്ഷേമവും സമതുലിതമായി കൊണ്ടുപോകുന്നതിനൊപ്പം സംസ്ഥാനത്തിന്റെ സാമ്പത്തിക നിലയെക്കുറിച്ച് വ്യക്തമായ ചിത്രം നൽകുന്നതിനായി ധവളപത്രം പുറത്തിറക്കുമെന്നും ഗവർണർ നയപ്രഖ്യാപനത്തിലൂടെ വ്യക്തമാക്കി.

The post സതീശൻ സർക്കാരിന്റെ നയപ്രഖ്യാപനം: ക്ഷേമ പെൻഷൻ 3000 ആക്കും, 25 ലക്ഷം രൂപയുടെ ഉമ്മൻ ചാണ്ടി ആരോഗ്യ പദ്ധതി പ്രഖ്യാപിച്ചു appeared first on ഇവാർത്ത | Evartha.