കർണാടകയിൽ ആർഎസ്എസ് നേതാവിനെ ഹണി ട്രാപ്പ് ചെയ്ത് വൻ തുക തട്ടി; മനുഷ്യാവകാശ പ്രവർത്തക അറസ്റ്റിൽ

കർണാടകയിലെ മാണ്ഡ്യ ജില്ലയിൽ ആർഎസ്എസ് നേതാവിനെ ഹണി ട്രാപ്പ് ചെയ്ത് വൻ തുക തട്ടിയെടുത്ത സംഭവത്തിൽ സാമൂഹിക, മനുഷ്യാവകാശ പ്രവർത്തക സൽമ ബാനുവിനെ കർണാടക പോലീസ് അറസ്റ്റ് ചെയ്തതായി പോലീസ് അറിയിച്ചു.

ആർഎസ്എസ് നേതാവും സ്വർണ വ്യാപാരിയുമായ നിദ്ദോഡി ജഗന്നാഥ് ഷെട്ടി നൽകിയ പരാതിയുടെ അടിസ്ഥാനത്തിലാണ് സൽമ ബാനുവിനെ അറസ്റ്റ് ചെയ്തത്. ശ്രീനിധി ജൂവലറി ഉടമയും ദക്ഷിണ കന്നഡ ജില്ലയിലെ സ്വാധീനമുള്ള രാഷ്ട്രീയക്കാരനുമാണ് ഷെട്ടിയെന്ന് പോലീസ് പറഞ്ഞു. പ്രതികൾ ഷെട്ടിയിൽ നിന്ന് 50 ലക്ഷം രൂപ തട്ടിയെടുക്കുകയും കൂടുതൽ തുക ആവശ്യപ്പെടുകയും ചെയ്തു.

സംഭവത്തിൽ ഷെട്ടി പോലീസിനെ സമീപിച്ചതിനെ തുടർന്ന് പോലീസ് മറ്റ് പ്രതികൾക്കായി തിരച്ചിൽ ആരംഭിച്ചു. ഫെബ്രുവരി 26 ന് മാണ്ഡ്യയിൽ നിന്ന് നാല് പേരുള്ള വാഹനത്തിൽ ഷെട്ടിക്ക് മൈസൂരുവിലേക്ക് ലിഫ്റ്റ് വാഗ്ദാനം ചെയ്തു. മൈസൂരിലെ ഒരു ഹോട്ടലിൽ വച്ചാണ് നേതാവിനെ കുടുക്കിയത്.

താൻ ഹോട്ടലിൽ സ്വർണ ബിസ്‌ക്കറ്റ് പരീക്ഷിക്കാൻ പോയെന്നും മുറിയിൽ കയറിയ ഉടൻ തന്നെ പ്രതികൾ ഫോട്ടോയെടുക്കുകയും തന്നെ ഒരു സ്ത്രീക്കൊപ്പം ചിത്രീകരിക്കുകയും ചെയ്‌തതായി പരാതിക്കാരൻ പോലീസിനോട് പറഞ്ഞു.

തുടർന്ന് ഈ വീഡിയോ വൈറലാക്കാതിരിക്കാൻ സംഭവസ്ഥലത്ത് വെച്ച് തന്നെ പ്രതികൾ ഇരയോട് നാല് കോടി രൂപ ആവശ്യപ്പെട്ടു. ഷെട്ടി അവർക്ക് 50 ലക്ഷം രൂപ നൽകി പ്രശ്നം ഒത്തുതീർപ്പാക്കി. പക്ഷെ അധികം വൈകാതെ തന്നെ കൂടുതൽ പണം ആവശ്യപ്പെട്ട് പ്രതികൾ ഇയാളെ ഭീഷണിപ്പെടുത്താൻ തുടങ്ങി. ഇതോടെയാണ് ഇയാൾ പരാതി നൽകിയത്.