കെ.ടി ജലീലിനെതിരെ കേസെടുക്കണം: കെ.സുരേന്ദ്രന്‍
കെ.ടി.ജലീലിനെതിരെ രാജ്യദ്രോഹകുറ്റം ചുമത്തി കേസെടുക്കണമെന്നു ബിജെപി സംസ്ഥാന അധ്യക്ഷൻ കെ സുരേന്ദ്രൻ. കേസെടുക്കാന്‍ പോലീസ് തയ്യാറാകാത്തത് കേരളത്തിലെ സര്‍ക്കാരും ജലീലിന്റെ രാജ്യദ്രോഹത്തിന് കൂട്ടുനില്‍ക്കുന്നതുകൊണ്ടാണ് എന്നും അദ്ദേഹം ആരോപിച്ചു.
പാകിസ്താന്‍ അനധികൃതമായി കൈവശം വച്ചിരിക്കുന്ന കശ്മീരിന്റെ ഒരു ഭാഗത്തെ പാകിസ്താന്‍ വിശേഷിപ്പിക്കുന്ന ആസാദ് കശ്മീര്‍ എന്നാണ് ജലീല്‍ അദ്ദേഹത്തിന്റെ പ്രസ്താവനയില്‍ പറയുന്നത്. ജമ്മു കശ്മീരിനെ കുറിച്ചുള്ള നമ്മുടെ രാജ്യത്തിന്റെ നിലപാടിനെ പരസ്യമായി ചോദ്യം ചെയ്യുന്ന സമീപനമാണ് കെ.ടി ജലീലിന്റെത്. രാജ്യദ്രോഹ പ്രസ്താവന ശ്രദ്ധയില്‍പെട്ട് 24 മണിക്കൂര്‍ കഴിഞ്ഞിട്ടും എന്തുകൊണ്ടാണ് കേസെടുക്കാത്തതെന്നു സുരേന്ദ്രന്‍ ചോദിച്ചു. ജലീലിന്റെ രാജി ആവശ്യപ്പെടാന്‍ മുഖ്യമന്ത്രി തയാറകണമെന്നും സുരേന്ദ്രന്‍ ആവശ്യപ്പെട്ടു.
ഇന്ത്യന്‍ അധിനിവേശ കശ്മീരെന്ന ജലീലിന്റെ പരാമര്‍ശത്തിനെതിരെയും വ്യാപക വിമര്‍ശനമുയര്‍ന്നിരുന്നു. കശ്മീര്‍ ഇന്ത്യയുടെ ഭാഗമാണെന്ന ഇന്ത്യയുടെ നിലപാടിന് വിരുദ്ധമാണ് ഇത്. വിഭജനകാലത്ത് കശ്മീര്‍ രണ്ടായി പകുത്തു എന്ന തെറ്റായ വിവരവും പോസ്റ്റിലുണ്ടായിരുന്നു.
