ബോംബെറിയും; യുപി മുഖ്യമന്ത്രി യോ​ഗി ആദിത്യനാഥിന് വധഭീഷണി

single-img
9 August 2022

യുപി മുഖ്യമന്ത്രി യോ​ഗി ആദിത്യനാഥിന് വാട്സ് ആപ്പിലൂടെ വധഭീഷണി. സംസ്ഥാന പൊലീസിന്റെ ടെക്‌സ്‌റ്റ് ഹെൽപ്പ് ലൈനിലാണ് മുഖ്യമന്ത്രി യോഗി ആദിത്യനാഥിനെ വധിക്കുമെന്ന് വാട്‌സ്ആപ്പ് സന്ദേശം ലഭിച്ചത്. തുടർന്ന് നടത്തിയ അന്വേഷണത്തിൽ ഒരാൾക്കെതിരെ കേസെടുത്തതായി ലഖ്‌നൗ പൊലീസ് ഉദ്യോഗസ്ഥർ അറിയിച്ചു.

ഡയൽ-112 എന്ന പോലീസ് ഹെൽപ്പ് ലൈനിലെ വാട്ട്‌സ്ആപ്പ് നമ്പറിൽ ഷാഹിദ് എന്ന വ്യക്തിയാണ് സന്ദേശം അയച്ചതെന്ന് പൊലീസ് പറയുന്നു. യോഗി ആദിത്യനാഥിന് നേർക്ക് ബോംബെറിയുമെന്ന് ഷാഹിദ് ഭീഷണിപ്പെടുത്തിയതായി മാധ്യമങ്ങളോട് പൊലീസ് പറഞ്ഞു.

സംഭവത്തിൽ ഗോൾഫ് സിറ്റി പൊലീസ് സ്‌റ്റേഷനിലാണ് കേസ് രജിസ്റ്റർ ചെയ്തതെന്ന് ഹെഡ്ക്വാർട്ടേഴ്‌സ് സ്റ്റേഷൻ കമാൻഡർ സുഭാഷ് കുമാർ അറിയിച്ചു. സന്ദേശത്തിന്റെ പിന്നിലുള്ള പ്രതികളെ പിടികൂടാൻ നിരവധി സംഘങ്ങളെ രൂപീകരിച്ചിട്ടുണ്ടെന്നും സൈബർ സെല്ലും നിരീക്ഷണ സംഘങ്ങളും ഇതിനായി അന്വേഷണം തുടങ്ങിയെന്നും പൊലീസ് മാധ്യമങ്ങളോട് പറഞ്ഞു.