കോമണ്വെല്ത്ത് ഗെയിംസ്; ഹോക്കിയില് കാനഡയ്ക്കെതിരെ എതിരില്ലാത്ത എട്ടു ഗോളിന്റെ വൻ വിജയവുമായി ഇന്ത്യ
കോമണ്വെല്ത്ത് ഗെയിംസ് മത്സരങ്ങളിൽ ഇന്ന് നടന്ന പുരുഷ ഹോക്കിയില് കാനഡയ്ക്കെതിരെ പൂൾ ബി പോരാട്ടത്തിൽ എതിരില്ലാത്ത എട്ടു ഗോളിന് ഇന്ത്യൻ വിജയം .അവസാന മത്സരത്തില് ഇംഗ്ലണ്ടിനോട് അപ്രതീക്ഷിത സമനില വഴങ്ങേണ്ടി വന്ന ക്ഷീണം മറന്ന ഇന്ത്യ ഈ ജയത്തോടെ സെമി സ്ഥാനം ഉറപ്പിക്കുകയും ചെയ്തു.
ഇന്ത്യയ്ക്കായി ഹർമൻപ്രീത് സിംഗ്, അക്ഷദീപ് സിംഗ്, മൻദീപ് സിംഗ്, ഗുർജന്ത് സിഗ്, അമിത് രോഹിത്ദാസ്, ലളിത് ഉപാധ്യായ എന്നിവരാണ് ഗോളുകൾ കണ്ടെത്തിയത് . മാത്രമല്ല, ഈ ജയത്തോടെ പൂൾ ബിയിൽ ഇന്ത്യ ഒന്നാം സ്ഥാനത്തേക്ക് ഉയർന്നു. മത്സരത്തിലെ ആദ്യ അഞ്ച് മിനിറ്റിൽ തന്നെ രണ്ട് പെനൽറ്റി കോർമറുകൾ നേടിയെടുത്തെങ്കിലും അത് തടുത്തിടുന്നതിൽ കാനഡ വിജയിച്ചു.
പിന്നീട് ഏഴാം മിനിറ്റിൽ ലഭിച്ച പെനൽറ്റി കോർണർ ഗോളാക്കി മാറ്റി ഹർമൻപ്രീത് ഇന്ത്യയുടെ ഗോൾ വേട്ടക്ക് തുടക്കമിട്ടു. തൊട്ടുപിന്നാലെ ഒമ്പതാം മിനിറ്റിൽ അമിത് രോഹിത്ദാസിലൂടെ ഇനത്യ ലീഡ് രണ്ടാക്കി ഉയർത്തി. രണ്ടാം ക്വാർട്ടറിൽ ലളിത് ഉപാധ്യായിലൂടെ വീണ്ടും ലീഡ് ഉയർത്തിയ ഇന്ത്യ ഗുർജന്ത് സിങിലൂടെ ലീഡ് നാലാക്കി. കളിയുടെ അവസാന ക്വാർട്ടറിലും നിരന്തരം ആക്രമിച്ച ഇന്ത്യ മൂന്ന് ഗോളുകൾ കൂടി നേടി പട്ടിക പൂർത്തിയാക്കി. ഇനി പൂൾ ബിയിലെ അവസാന മത്സരത്തിൽ നാളെ ഇന്ത്യ വെയിൽസിനെ നേരിടും.