കോൺഗ്രസിൽ നേതൃ മാറ്റം ആവശ്യപ്പെട്ട് ഗ്രൂപ്പ് 23 നേതാക്കള്
വിവിധ സംസ്ഥാനങ്ങളിലെ നിയമസഭാ തെരഞ്ഞെടുപ്പ് തോല്വിക്ക് പിന്നാലെ കോണ്ഗ്രസില് നേതൃമാറ്റ ആവശ്യം ശക്തമാക്കി ഗ്രൂപ്പ് 23 നേതാക്കള്. നേതൃനിരയിൽ ഗാന്ധി കുടംബം മുന്പോട്ട് വയക്കുന്ന ഒരു ഫോര്മുലയും അംഗീകരിക്കേണ്ടെന്നും ഡൽഹിയിൽ ഗുലാം നബി ആസാദിന്റെ വസതിയില് ചേര്ന്ന യോഗത്തില് നേതാക്കള് തീരുമാനിച്ചു.
അതേസമയം, ഇപ്പോഴും പ്രവർത്തക സമിതി ചേരുന്നതിൽ മൗനം തുടരുകയാണ് നേതൃത്വം. രാജ്യത്തെ ഓരോ തെരഞ്ഞെടുപ്പിലും കോൺഗ്രസ് പാര്ട്ടി തോറ്റ് തുന്നം പാടുമ്പോള് നേതൃത്വം മാറിയേ തീരൂ എന്ന ആവശ്യം ശക്തമാക്കുകയാണ് ഗ്രൂപ്പ് 23 നേതാക്കള്. കപില് സിബല്, ആനന്ദ് ശര്മ്മ, ഭൂപേന്ദ്രഹൂഡ, മനീഷ് തിവാരി എന്നീ നേതാക്കളാണ് ഗുലാംനബി ആസാദിന്റെ വീട്ടില് ഒത്തു കൂടിയത്.
പാർട്ടിയുടെ അധ്യക്ഷ സ്ഥാനത്ത് നിന്ന് ഗാന്ധി കുടംബം പിന്മാറണം. അധ്യക്ഷ സ്ഥാനം ഒഴിഞ്ഞാല് രാജസ്ഥാന് മുഖ്യമന്ത്രി അശോക് ഗലോട്ടിനെ ആ സ്ഥാനത്തേക്ക് കൊണ്ടുവരാനും മല്ലികാര്ജുന ഖാര്ഗയെ പാര്ലമെന്ററി പാര്ട്ടി നേതാവാക്കാനുമാണ് ഗാന്ധി കുടുംബത്തിന്റെ ആലോചന.
ഈ ഫോര്മുല അംഗീകരിക്കേണ്ടതില്ലെന്നും ഗ്രൂപ്പ് 23 തീരുമാനിച്ചു. സംഘടന ജനറല് സെക്രട്ടറി സ്ഥാനത്തും അഴിച്ചു പണി വേണം. പഞ്ചാബിലെ തോല്വിയടക്കം ചൂണ്ടിക്കാട്ടി പ്രവര്ത്തക സമിതിയില് കെ സി വേണുഗോപാലിനെതിരെ നിലപാട് ശക്തമാക്കാനാണ് ഗ്രൂപ്പ് 23 ന്റെ തീരുമാനം.