സംസ്ഥാനത്തെ ഇന്ധനവില വര്ദ്ധനവ്; സൈക്കിള് ചവിട്ടി പ്രതിപക്ഷ എംഎല്എമാര് നിയമസഭയിലേക്ക്
കേന്ദ്രം നികുതിയിൽ കുറവ് വരുത്തിയിട്ടും ഇവിടെ ഇന്ധന വില കുറയ്ക്കാന് സംസ്ഥാന സര്ക്കാര് ഇടപെടുന്നില്ലെന്ന് ആരോപിച്ച് പ്രതിഷേധം ശക്തമാക്കി പ്രതിപക്ഷമായ കോൺഗ്രസ്. ഇന്ധന വിലയുമായി ബന്ധപ്പെട്ട് ഇന്ന് നിയമ സഭയില് അടിയന്തര പ്രമേയമായി അവതരിപ്പിക്കാന് നോട്ടീസ് നല്കിയതിന് പിന്നാലെ പ്രതിപക്ഷ എംഎല്എമാര് സഭയിലേക്ക് എത്തിയത് സൈക്കിളിലായിരുന്നു.
പ്രതിപക്ഷ നേതാവ് വിഡി സതീശന് ഉള്പ്പെടെ ഉള്ളവരായിരുന്നു സൈക്കിളില് സഭയിലേക്ക് യാത്ര ചെയ്തതത്. കഴിഞ്ഞ ദിവസം കോവളം എംഎല്എ എം വിന്സന്റ് സൈക്കിളില് സഭയിലെത്തിയിരുന്നു. ഇതിന് പിന്നാലെയാണ് പ്രതിപക്ഷ നേതാവിന്റെ നേതൃത്വത്തില് പ്രതിഷേധം ശക്തമാക്കുന്നത്. എംഎല്എ ഹോസ്റ്റലില് നിന്നും നിയമ സഭവരെയായിരുന്നു സൈക്കിള് യാത്ര. സമരം വ്യാപകമാക്കാനുള്ള തീരുമാനത്തിലാണ് പ്രതിപക്ഷം. ഇന്ന് ഇന്ധന നികുതി അടിയന്തര പ്രമേയമായി അവതരിപ്പിക്കാനും പ്രതിപക്ഷം തീരുമാനിച്ചിട്ടുണ്ട്.