ഇപ്പോൾ 50 MBPs വേഗമൊക്കെ കണ്ട് അന്തംവിട്ട് നിൽപ്പാണ്; ബി എസ് എൻ എൽനെ നശിപ്പിക്കുന്ന ബി എസ്എൻ എൽ; ഒരു സങ്കട ഹർജി…
കുറച്ചു വര്ഷങ്ങള്ക്കു മുൻപുവരെ പലരുടേയും വീട്ടിലെ ഒരംഗമായിരുന്ന ബി.എസ്.എൻ.എൽ ഇപ്പോൾ അതങ്ങനെ വീട്ടിലെ മൂലയിൽ അനക്കമില്ലാതെ ഇരിപ്പുണ്ട്. ഫോൺ കണക്ഷനൊക്കെ വി.ഐ.പിയായിരുന്ന കാലത്തു ഒരു ബി.എസ്.എൻ.എൽ കണക്ഷൻ കിട്ടാൻ എം.പിമാരുടെ കാലുവരെ പിടിച്ച് വീട്ടിലെത്തിച്ചിരുന്ന കാര്യം ഇന്ന് അതിശയോക്തിയോടെ മാത്രമേ ഓർക്കാൻ കഴിയൂ. എല്ലാം ബി.എസ്.എൻ.എല്ലിൻറെ കൈയിലിരുപ്പുകൊണ്ട് സംഭവിച്ചതാണ്.
ബി.എസ്.എൻ.എൽ തന്നെ നശിപ്പിക്കുന്ന ബി.എസ്.എൻ.എൽ.. ഒരു സങ്കട ഹർജി… മധ്യമം പത്രത്തിലെ സീനിയർ സബ് എഡിറ്റർ കെ എ സെയ്ഫുദ്ദീന്റെ ഫേസ്ബുക് കുറിപ്പ്.
കെ എ സെയ്ഫുദ്ദീന്റെ ഫേസ്ബുക് കുറിപ്പിനെ പൂർണരൂപം:
ബി.എസ്.എൻ.എൽ തന്നെ നശിപ്പിക്കുന്ന ബി.എസ്.എൻ.എൽ..
ഒരു സങ്കട ഹർജി…
——————————————-
പലരുടേതുമെന്നപോലെ വർഷങ്ങളായി ഞങ്ങളുടെ വീട്ടിലെയും ഒരംഗമായിരുന്നു ബി.എസ്.എൻ.എൽ. സകലമാന മനുഷ്യരും ലാൻഡ് ഫോണുകൾ ഉപേക്ഷിച്ചപ്പോഴും അത് ഞങ്ങളുടെ കൂടെയുണ്ടായിരുന്നു. അതിലേക്ക് വരുന്ന കോളുകൾ തീരെ കുറവാണെങ്കിലും സമയത്ത് ബില്ലടച്ചാലും ഇല്ലെങ്കിലും കാണിച്ചുതരാമെന്ന ഭീഷണി മാസംതോറും മുഴക്കിയിട്ടും അത് കൂടെയുണ്ട്…
പണ്ട്, ഫോൺ കണക്ഷനൊക്കെ വി.ഐ.പിയായിരുന്നപ്പോൾ എം.പിമാരുടെ കാലുവരെ പിടിച്ചായിരുന്നു ഈ കക്ഷിയെ വീട്ടിലെത്തിച്ചിരുന്നതെന്നതൊക്കെ ഇന്ന് അതിശയോക്തിയായി തോന്നാം…
എല്ലാം ബി.എസ്.എൻ.എല്ലിൻറെ കൈയിലിരുപ്പുകൊണ്ട് സംഭവിച്ചത്…
അഞ്ച് വർഷം മുമ്പ് പുതുതായി താമസമായ സ്ഥലത്ത് കണക്ഷനു വേണ്ടി ചെന്നപ്പോൾ തന്നെ അവർ മുഖമടച്ച് പറഞ്ഞിരുന്നു ‘ആ ഏരിയയിൽ കേബിൾ ഇല്ല…’ എന്ന്. ആ പുതിയ പ്രദേശത്ത് എവിടെയൊക്കെ ലാൻഡ് കണക്ഷനുകളുണ്ടായിരുന്നു എന്നൊക്കെ തപ്പിനടന്ന് കണ്ടുപിടിച്ച് നേരേ എതിർവശത്തെ വീട്ടിൽ ഉണ്ടായിരുന്ന സറണ്ടർ ചെയ്ത നമ്പർ സഹിതം കുത്തിയിളക്കിയപ്പോഴാണ് ഏമാൻമാർ കനിഞ്ഞ് കണക്ഷൻ തന്നത്…
ഫോണാണെങ്കിൽ എന്നും കേട്… ലൈനിലെ ഒച്ചയും അലർച്ചയും കാരണം ആരെയും വിളിക്കാനും വിളി കേൾക്കാനും വയ്യാതായി… അടിക്കടി റെസീവർ കേടാകുകയും ചെയ്തു.. ലൈൻ മോശമായതുകൊണ്ടെന്ന് അപ്പീസർമാരുടെ ഒഴുക്കൻ മറുപടി… എന്നാലും ഇടയ്ക്കിടെ വന്ന് ഒരുവിധം നന്നാക്കി പോകും… അവർ പോയാലുടൻ അവർക്കൊപ്പം ലൈനും അതിൻറെ പാട്ടിനുപോകും..
ബ്രോഡ്ബാൻഡ് കൂടിയുള്ള കണക്ഷനാണ്. പ്രധാനമായും നെറ്റിനു വേണ്ടിയാണ് ഈ കാലത്തും ലൈൻ നിലനിർത്തിയിരുന്നത്. കഷ്ടിച്ച് 1MBPS സ്പീഡൊക്കെ കിട്ടിയിരുന്നതാണ്.. പിന്നെ അതങ്ങു കുറഞ്ഞു.. തീരെ സ്പീഡ് ഇല്ല എന്ന് പരാതിപറഞ്ഞപ്പോൾ 10MBPS സ്പീഡുള്ള പാക്കേജിലേക്ക് മാറാനായിരുന്നു ഉപദേശം. അതും ചെയ്തു.. അങ്ങനെ മാസംതോറും 1069 രൂപയുടെ പാക്കേജിലേക്ക് മാറി… വാഗ്ദാനം ചെയ്ത 10 MBPS സ്പീഡൊന്നും കിട്ടിയില്ലെങ്കിലും ഒരു മൂന്നൊക്കെ വെച്ച് അഡ്ജസ്റ്റ് ചെയ്തു പോരുകയായിരുന്നു… അപ്പോഴും ലൈൻ തകരാറും റസീവർ കേടാകലും പോലുള്ള പതിവ് കലാപരിപാടികൾ തുടർച്ചയായിരുന്നു. ബില്ലടയ്ക്കാൻ ഒരു ദിവസം വൈകിയാൽ കട്ട് ചെയ്യുന്ന പണിയും അടുത്തിടയായി തുടങ്ങി..
ഓൺലൈൻ ക്ലാസുകളും വർക് ഫ്രം ഹോമും തുടങ്ങിയപ്പോഴാണ് ശരിക്കും പണികിട്ടി തുടങ്ങിയത്… സ്പീഡ് വെറും 420 KBPS ആയി ചുരുങ്ങി…ചിലപ്പോൾ അത് 135 KBPS വരെയെത്തി ചത്തുമലച്ചു…
പിന്നെയും പിന്നെയും പരാതിയുമായി BSNL ഓഫീസ് കയറിയിറങ്ങലായി… അവർ പ്രശ്നംവെച്ചു… പരിഹാരം നിർദേശിച്ചു..
പഴയ കോപ്പർ കേബിളിലൂടെയാണ് ഇൻർനെറ്റ് സഞ്ചാരം.. അത് ഒഴിവാക്കി ഒപ്റ്റിക് ഫൈബർ കേബിളിലേക്ക് മാറിയാൽ സംഗതി ഡബിൾ ഓ.കെയാകും… 20 MBPS വരെ സ്പീഡ് കിട്ടും..
എല്ലാം ശരിയാകും…
പക്ഷേ, ആര് ചെയ്യും..?
ബി.എസ്.എൻ.എൽ ഓഫീസിലെ ചേച്ചി ഒരു നമ്പർ തന്നു…
പിന്നെ വിളിയോട് വിളി…
നാളെ വരും … മറ്റന്നാൾ വരും…. എന്നു പറഞ്ഞ് ദിവസങ്ങൾ കുറേ കടന്നു …
ഞങ്ങളുടെ വീടിന് തൊട്ടപ്പുറത്തായി ഒരു ഇൻഡസ്ട്രിയൽ എസ്റ്റേറ്റുണ്ട്.. അവിടെ വരെ ഫൈബർ കേബിൾ ഉണ്ടെന്നും ലൊക്കേഷൻ നോക്കിയിട്ട് ശരിയാക്കാമെന്നും മറുപടിയുണ്ടായി…
ഒടുവിൽ രണ്ടുപേർ ലൊക്കേഷൻ നോക്കാൻ വന്നു…
അപ്പോൾ ദാണ്ടേ കെടക്കണ് പ്രശ്നം…!
ഇൻഡസ്ട്രിയൽ എസ്റ്റേറ്റിനടുത്തു നിന്ന് ഞങ്ങളുടെ വീട്ടിലേക്ക് 400 മീറ്റർ ഉണ്ട്. 200 മീറ്റർ വരെ കേബിൾ ഇടാനേ ഒപ്ഷനുള്ളു..
ഒരു നാല് കണക്ഷൻ എങ്കിലും പിടിച്ചുകൊടുത്താൽ വീട്ടിലേക്ക് ഇന്ദ്രവല്ലരി എത്തിച്ചുതരാം…
ഒന്നൂടി നോക്കാമെന്നു പറഞ്ഞ് അവർ പോയി…
നാലു ദിവസം കഴിഞ്ഞ് വിളിച്ചപ്പോൾ അയാൾ സങ്കടം പറയുന്നു… അവിടെ വരെ ഇട്ടുതരാൻ പ്രൊവിഷൻ ഇല്ല എന്ന്…
മറ്റൊരു ഒപ്ഷൻ കൂടി അയാൾ പറഞ്ഞു. 200 മീറ്റർ കഴിഞ്ഞുള്ള കേബിളിന് മീറ്ററിന് 10 രൂപ നിരക്കിൽ ഞാൻ കൊടുത്താൽ കേബിളിട്ടു തരാമെന്ന്…
മോഡത്തിൻറെ തുകക്കു പുറമെ കേബിളിൻറെ തുക കൂടി ഒരു കസ്റ്റമറെ കൊണ്ടു വഹിപ്പിക്കുന്നതിൽ അയാൾക്കും മനസ്താപം…
ഒടുവിൽ അയാൾ കൈമലർത്തി..
‘ഇതാണ് സാർ ബി.എസ്.എൻ.എല്ലിൻറെ അവസ്ഥ.. സാർ ഒരു പൊതുമേഖല സ്ഥാപനത്തോട് കാണിക്കുന്ന ഈ താൽപര്യത്തിനനുസരിച്ച് ഒന്നും ചെയ്തു തരാൻ കഴിയാത്തതിൽ സങ്കടമുണ്ട്… എനിക്കൊന്നും ചെയ്യാൻ കഴിയില്ല….’
അങ്ങനെ ഊമ്പിത്തൊലിഞ്ഞ് പൊയ്ക്കോണ്ടിരിക്കെയാണ് ഞങ്ങളുടെ ഏരിയയിയെ പഴഞ്ചൻ കേബിളുകൾ മാറ്റി ഒപ്റ്റിക് ഫൈബർ വലിക്കാൻ കേബിൾ ടി.വിക്കാർ വന്നത്. കൂട്ടത്തിൽ ഇൻറർനെറ്റും കൊടുക്കുന്നുണ്ട്…
താരിഫ് നോക്കിയപ്പോൾ ബി.എസ്.എൻ.എല്ലിനെക്കാൾ കുറഞ്ഞ പൈസക്ക് അവർ തരുന്നതിനെക്കാൾ വേഗതയുള്ള നെറ്റ്…
അവർ പോയി ഏതാണ്ട് ഒരു മണിക്കൂർ കഴിഞ്ഞപ്പോൾ കുറച്ചുപയ്യന്മാർ തോളിൽ കുറേ കേബിളുമായി മുറ്റത്തു നിൽക്കുന്നു…
അവന്മാര് വന്ന് ചറപറാന്ന് കേബിൾ വലിക്കുന്നു..
ഇനി ഭാവിയിലെങ്ങാനും കേബിൾ നീട്ടേണ്ടിവന്നാലോ എന്നു കരുതി കുറച്ചു കേബിൾ അധികവുമിട്ടു…
ഇപ്പോൾ സ്വസ്ഥം… സമാധാനം… 50 MBPs വേഗമൊക്കെ കണ്ട് അന്തംവിട്ട് നിൽപ്പാണ്…
പട്ടിണി കിടന്നവന് ബിരിയാണി കിട്ടിയ സന്തോഷം…
ബി.എസ്.എൻ.എൽ ആപ്പീസിൽ ചെന്ന് ലൈനും കട്ട് ചെയ്യിച്ചു….
പക്ഷേ, ലാൻഡ് ഫോൺ ഒഴിവാക്കാൻ എന്നിട്ടും മനസ്സുവരാത്തതിനാൽ അതങ്ങനെ മൂലയിൽ അനക്കമില്ലാതെ ഇരിപ്പുണ്ട്…
കെ എ സെയ്ഫുദ്ദീന്റെ ഫേസ്ബുക് പോസ്റ്റ് ഇവിടെ വായിക്കാം
