സോഷ്യല് മീഡിയയില് മനോരമ ചാനലിലെ മാധ്യമപ്രവര്ത്തക നിഷ പുരുഷോത്തമന്റെ പേരിനോട് സാമ്യമുള്ളതിന്റെ പേരില് താന് സൈബര് ആക്രമണം നേരിടുന്നെന്ന് വൈല്ഡ് ലൈഫ് ഫോട്ടോഗ്രാഫര് നിഷ പുരുഷോത്തമന്. സോഷ്യല് മീഡിയയില് ആള് മാറി കഴിഞ്ഞ ദിവസങ്ങളില് ഒരുപാട് മോശം മെസേജുകളാണ് തനിക്ക് വരുന്നതെന്നും ദയവ് ചെയ്ത് ഇത് അവസാനിപ്പിക്കണം എന്നും നിഷ പറയുന്നു.
മെസേജുകള് ആള് മാറിയല്ലാതെ അയച്ചാല് പോലും വിമര്ശനങ്ങള്ക്ക് നല്ല ഭാഷ ഉപയോഗിക്കണമെന്നും നിഷ തന്റെ ഫേസ്ബുക്ക് വീഡിയോയില് പറയുന്നുണ്ട്. അതേപോലെ തന്നെ തന്റെ ചിത്രം ഉപയോഗിച്ച് വിനോദ് വര്ഗീസ് എന്നയാള് ഫേസ്ബുക്കില് മോശമായി ചിത്രീകരിച്ചെന്നും നിഷ പറയുന്നു. ആദ്യമൊക്കെ ഇന്ബോക്സില് ആയിരുന്നു മോശമായ മെസേജുകള് എങ്കില് ഇപ്പോള് പരസ്യമായാണ് പറയുന്നത് എന്നും അവര് പറയുന്നു.
നിങ്ങള് ഉദ്ദേശിക്കുന്ന ആളല്ല താന് എന്ന് പറയുമ്പോള് സോഷ്യല് മീഡിയയില് എഴുപത് ശതമാനം ആളുകളും മാപ്പ് പറയുകയോ, അവരുടെ കമന്റ് നീക്കം ചെയ്യുകയോ ചെയ്യാറുണ്ട് എന്നും നിഷ പറഞ്ഞു. തന്റെ ചിത്രം വ്യാപകമായി തെറ്റിദ്ധരിക്കപ്പെട്ടു ദുരുപയോഗം ചെയ്യുന്നതിനാലാണ് തനിക്ക് ഇപ്പോള് വീഡിയോയുമായി എത്തേണ്ടി വന്നതെന്നും നിഷ പറഞ്ഞു. അതേസമയം മാധ്യമപ്രവര്ത്തക നിഷ പുരുഷോത്തമനെതിരെ നടന്ന വ്യാപകമായ സൈബര് ആക്രമണത്തില് പത്രപ്രവര്ത്തക യൂണിയന് നല്കിയ പരാതിയില് പോലീസ് കേസെടുത്ത് അന്വേഷണം നടത്തിവരികയാണ്.