മഴക്കെടുതി; മലപ്പുറം, വയനാട് ജില്ലകളിലെ മുഴുവന് വില്ലേജുകളേയും ദുരന്തബാധിതമായി പ്രഖ്യാപിച്ചു; സംസ്ഥാനത്താകെ 1038 വില്ലേജുകള്
സംസ്ഥാനത്തുണ്ടായ കനത്ത മഴയിലും ഉരുള്പൊട്ടലിലും നാശനഷ്ടമുണ്ടായ 1038 വില്ലേജുകളെ ദുരന്തബാധിത പ്രദേശങ്ങളായി സർക്കാർ പ്രഖ്യാപിച്ചു. ഇതിൽ തിരുവനന്തപുരം ഒഴികെയുള്ള ജില്ലകളിലെ വില്ലേജുകളാണ് പട്ടികയിലുള്ളത്. അതേപോലെ പ്രളയത്തില് അകപ്പെട്ട കുടംബങ്ങള്ക്കുള്ള അടിയന്തര സഹായ വിതരണത്തിനുള്ള മാനദണ്ഡം നിശ്ചയിച്ച് സര്ക്കാര് ഉത്തരവിറക്കി. ഈ മാസം 8 മുതല് ഒരാഴ്ച പെയ്ത കനത്ത മഴയില് സംസ്ഥാനത്തെ 13 ജില്ലകളിലാണ് നാശനഷ്ടമുണ്ടായത്.
ഓരോ ജില്ലകളിൽ നിന്നും കളക്ടര്മാര് നല്കിയ റിപ്പോര്ട്ടിന്റെ അടിസ്ഥാനത്തിലാണ് ദുരന്തബാധിത വില്ലേജുകള് ഏതൊക്കെയെന്ന് പ്രഖ്യാപിച്ചത്. കനത്ത നാശനഷ്ടങ്ങളുണ്ടായ മലപ്പുറം, വയനാട് ജില്ലകളിലെ മുഴുവന് വില്ലേജുകളേയും ദുരന്തബാധിതമായി പ്രഖ്യാപിച്ചു. തൃശൂർ ജില്ലയിൽ 215ഉം, പാലക്കാട് 124ഉം , കോഴിക്കോട് 115ഉം വില്ലേജുകള് പട്ടികയിലുണ്ട്. ജില്ലകളിൽ ഏറ്റവും കൂടുതല് ദുരന്തബാധിത വില്ലേജുകള്, അഞ്ചെണ്ണം, കൊല്ലത്താണുള്ളത്.
ബാങ്കുകൾ നൽകുന്ന വായപ മൊറട്ടോറിയം പ്രഖ്യാപനത്തിന് പ്രധാന മാനദണ്ഡമായി കണക്കാക്കുന്നത് ദുരന്തബാധിത പ്രദേശങ്ങളുടെ ഈ പട്ടികയാണ്. അതോടൊപ്പം കേന്ദ്ര സഹായത്തിനുള്ള സംസ്ഥാനത്തിന്റെ അപേക്ഷ തയ്യാറാക്കുന്നതും ഇതനുസരിച്ചാണ്. കഴിഞ്ഞ വർഷത്തെ പ്രളയത്തിനു ശേഷം 1264 വില്ലേജുകളെയാണ് ദുരന്തബാധിത പ്രദേശങ്ങളുടെ പട്ടികയില് ഉള്പ്പെടുത്തിയത്.
മൂന്നു ഘട്ടങ്ങളായാണ് കഴിഞ്ഞ വര്ഷം പട്ടിക തയ്യാറാക്കിയത്. എന്നാല് ഈ വര്ഷം ഒറ്റത്തവണയായി തന്നെ പട്ടിക പുറത്തിറക്കുകയായിരുന്നു. വെള്ളം കയറിയ വീടുകളില് കഴിഞ്ഞവര്ക്കും, പൂര്ണ്ണമായോ ഭാഗികമായോ വീട് നഷ്ടപ്പെട്ടവര്ക്കും അടിയന്തരസഹായം കിട്ടും. മുന്നറിയിപ്പ് കിട്ടിയതിനാൽ സര്ക്കാര് ക്യാമ്പുകളില് കഴിഞ്ഞവര്ക്കും, ആലപ്പുഴ, കോട്ടയം ജില്ലകളില് കഞ്ഞിപ്പുരകളില് രജിസ്റ്റര് ചെയ്തവര്ക്കും അടിയന്തരസഹായത്തിന് അര്ഹതയുണ്ടെന്നും സര്ക്കാര് ഉത്തരവില് വ്യക്തമാക്കുന്നു.