ലോക്സഭാ തെരെഞ്ഞെടുപ്പിന്റെ അഞ്ചാം ഘട്ടം ഇന്ന്: 51 മണ്ഡലങ്ങളിൽ ഇന്ന് ജനവിധി

ലോകസഭാ തെരഞ്ഞെടുപ്പിന്‍റെ അഞ്ചാം ഘട്ടത്തിൽ 51 മണ്ഡലങ്ങളിൽ ഇന്ന് വോട്ടെടുപ്പ് നടക്കും. രാഹുൽ ഗാന്ധി മത്സരിക്കുന്ന അമേഠിയും സോണിയാ ഗാന്ധി മത്സരിക്കുന്ന റായ്ബറേലിയും അടക്കം ഉത്തർപ്രദേശിലെ 14 മണ്ഡലങ്ങളിലും ഇന്നാണ് വോട്ടെടുപ്പ്. രാജസ്ഥാനിലെ 12 ഉം മധ്യപ്രദേശ്, പശ്ചിമബംഗാൾ സംസ്ഥാനങ്ങളിൽ 7 വീതം മണ്ഡലങ്ങളിലും ഇന്ന് വോട്ടെടുപ്പ് നടക്കുന്നുണ്ട്.

മൂന്നു ഘട്ടങ്ങളിലായി വോട്ടെടുപ്പ് നടക്കുന്ന ജമ്മു കശ്മീരിലെ അനന്ത്നാഗ് മണ്ഡലത്തിലേക്കുള്ള അവസാന ഘട്ടവും ഇന്നാണ്. അനന്ത്നാഗിലെ ഷോപിയാൻ, പുൽവാമ ജില്ലകളിലായിരിക്കും തിങ്കളാഴ്ച വോട്ടെടുപ്പ്. ഫെബ്രുവരി 14ന് സൈനിക വാഹനവ്യൂഹത്തിനു നേരെ ഭീകരാക്രമണം നടന്നതിനു ശേഷം അതീവ സുരക്ഷയിലാണ് മേഖലയിൽ തിരഞ്ഞെടുപ്പു പ്രക്രിയയ്ക്കുള്ള ഒരുക്കങ്ങൾ. ജമ്മു കശ്മീരിലെ ലഡാക്ക് മണ്ഡലത്തിലേക്കുള്ള വോട്ടെടുപ്പും ആറിനു നടക്കും. ലേ, കാർഗിൽ ജില്ലകളാണ് ലഡാക്ക് മണ്ഡലത്തിലുള്ളത്. ഭൂവിസ്തൃതി നോക്കുമ്പോൾ ഇന്ത്യയിലെ ഏറ്റവും വലിയ മണ്ഡലമാണ് ലഡാക്ക്– 1,72,374 ച.കി.മീ ആണ് വിസ്തീർണം.