വംശീയ ചരിത്രത്തെ ഓർമിപ്പിക്കുന്നു; ‘മങ്കിപോക്സി’ന്റെ പേര് മാറ്റണമെന്ന് ആവശ്യം

ലോകമാകെ വ്യാപിക്കുന്ന വൈറസ് മങ്കിപോക്സിന്റെ പേര് പുനർനാമകരണം ചെയ്യണമെന്ന് ലോകാരോഗ്യ സംഘടനയോട് (ഡബ്ല്യുഎച്ച്ഒ) ആവശ്യപ്പെട്ട് ന്യൂയോർക്ക് സിറ്റി. സമൂഹത്തിൽ വിവേചനപരവും വിദ്വേഷം ജനിപ്പിക്കുന്നതുമായ ഇത്തരം പേരുകൾ രോഗികളെ ചികിത്സ തേടുന്നതിൽ നിന്നും പിന്തിരിപ്പിക്കുമെന്ന് ന്യൂയോർക് സിറ്റി പബ്ലിക് ഹെൽത്ത് കമ്മീഷണർ അശ്വിൻ വാസൻ ലോകാരോഗ്യ സംഘടന മേധാവി ടെഡ്രോസ് അദാനോം ഗെബ്രിയേസൂസിന് അയച്ച കത്തിൽ ചൂണ്ടിക്കാട്ടി.

ഇതേവരെ 1,092 അണുബാധകളാണ് ന്യൂയോർക്കിൽ റിപ്പോർട്ട് ചെയ്തിട്ടുള്ളത്. മങ്കിപോക്സ് വർധിക്കുന്ന സാഹചര്യത്തിൽ ലോകാരോഗ്യ സംഘടന ആഗോള അടിയന്തരാവസ്ഥ പ്രഖ്യാപിച്ചിരുന്നു. 70 ശതമാനം രോഗികളും യുറോപ്യൻ രാജ്യങ്ങളിലാണ്. ഇതുവരെ 75 രാജ്യങ്ങളിലായി 16,000 കേസുകൾ റിപ്പോർട്ട് ചെയ്തതായി ലോകാരോഗ്യസംഘടന അറിയിച്ചു.

അതേസമയം, ഉന്മൂലനം ചെയ്യപ്പെട്ട വസൂരി വൈറസുമായി ബന്ധപ്പെട്ട വൈറസിന്റെ പേര് മാറ്റാനുള്ള ആശയം ലോകാരോഗ്യ സംഘടന കഴിഞ്ഞ മാസം ഒരു പത്രസമ്മേളനത്തിൽ അവതരിപ്പിച്ചിരുന്നു. കുരങ്ങുപനി പോലുള്ള പദപ്രയോഗങ്ങൾ വർണ്ണ സമുദായങ്ങൾക്കായി വേരൂന്നിയ വേദനാജനകവും വംശീയവുമായ ചരിത്രത്തെ ഓർമിപ്പിക്കുന്നവെന്നും അശ്വിൻ വാസൻ പറയുന്നു. മങ്കിപോക്സ് വൈറസ് ആദ്യമായി ഉത്ഭവിച്ചിരിക്കുന്നത് ആൾക്കുരങ്ങുകളിൽ നിന്ന് അല്ലെന്നും അദ്ദേഹം ചൂണ്ടിക്കാട്ടി.

മാത്രമല്ല, മങ്കിപോക്സ് എന്ന പേര് വിവേചനപരമാണെന്നും ഒരുവിഭാഗം ആളുകളെ അപമാനിക്കുന്നതാണെന്നും ഇത് ആരോഗ്യ സേവനങ്ങളിൽ ഏർപ്പെടുന്നതിൽ നിന്ന് അവരെ പിന്തിരിപ്പിച്ചേക്കുമെന്നും കത്തിൽ ചൂണ്ടിക്കാട്ടി.