നാഷണല് ഹെറാള്ഡ് കേസില് കോണ്ഗ്രസ് അദ്ധ്യക്ഷ സോണിയ ഗാന്ധിയെ എന്ഫോഴ്സ്മെന്റ് ഡയറക്ടറേറ്റ് ഇന്ന് ചോദ്യം ചെയ്യും
ന്യൂഡല്ഹി: നാഷണല് ഹെറാള്ഡ് കേസില് കോണ്ഗ്രസ് അദ്ധ്യക്ഷ സോണിയ ഗാന്ധിയെ എന്ഫോഴ്സ്മെന്റ് ഡയറക്ടറേറ്റ് (ഇ ഡി) ഇന്ന് വീണ്ടും ചോദ്യം ചെയ്യും.
കഴിഞ്ഞാഴ്ച രണ്ടര മണിക്കൂറോളം ചോദ്യം ചെയ്ത ഇ ഡി വീണ്ടും ഹാജരാകാന് നോട്ടീസ് നല്കുകയായിരുന്നു.
ഈ മാസം 22 നാണ് സോണിയ ഗാന്ധിയെ ചോദ്യം ചെയ്തത്. നാഷണല് ഹെറാള്ഡ് ഏറ്റെടുത്ത യംഗ് ഇന്ത്യന് പ്രൈവറ്റ് ലിമിറ്റഡ് കമ്ബനിയുടെ ഓഹരി വിവരങ്ങള് സംബന്ധിച്ച 50 ചോദ്യങ്ങളാണ് അന്ന് അന്വേഷണ ഉദ്യോഗസ്ഥര് ചോദിച്ചത്. അനാരോഗ്യം കണക്കിലെടുത്ത് മെഡിക്കല് സംഘത്തെ തയ്യാറാക്കി നിര്ത്തിയായിരുന്നു ചോദ്യം ചെയ്തത്.
അതേസമയം, ഇ ഡി നടപടിയ്ക്കെതിരെ കോണ്ഗ്രസ് ഇന്നും പ്രതിഷേധിക്കും. എ ഐ സി സി ആസ്ഥാനത്തായിരിക്കും പ്രതിഷേധം. സംസ്ഥാന ഘടകങ്ങളും പ്രതിഷേധ പരിപാടികള് സംഘടിപ്പിക്കും.
നാഷണല് ഹെറാള്ഡ് കേസ്
കോണ്ഗ്രസ് മുഖപത്രമായ നാഷണല് ഹെറാള്ഡ് 2008ല് 90 കോടി കടബാദ്ധ്യതയുമായി പൂട്ടി. ഈ തുക കോണ്ഗ്രസ് പാര്ട്ടി പ്രസാധകരായ അസോസിയേറ്റഡ് ജേര്ണല്സ് ലിമിറ്റഡിന് (എ.ജെ.എല്) നല്കാനുള്ളതായിരുന്നു. 2010ല് രൂപീകരിച്ച, രാഹുലിനും സോണിയയ്ക്കും 76ശതമാനം ഓഹരിയുള്ള യംഗ് ഇന്ത്യാ കമ്ബനി വെറും 50 ലക്ഷം രൂപയ്ക്ക് എ.ജെ.എല്ലിനെ ഏറ്റെടുത്തു. ഇതുവഴി കോണ്ഗ്രസ് നല്കാനുണ്ടായിരുന്ന കടബാദ്ധ്യത ഇല്ലാതാക്കുകയും നാഷണല് ഹെറാള്ഡിന്റെ പേരിലുള്ള 2000 കോടി രൂപയുടെ സ്വത്തുക്കള് തട്ടിയെടുക്കുകയും ചെയ്തെന്ന് സോണിയയ്ക്കും രാഹുലിനുമെതിരെ കേസ് നല്കിയ സുബ്രഹ്മണ്യം സ്വാമി ആരോപിച്ചിരുന്നു.