യുപിയിലെ ലുലു മാളിൽ നമസ്‌കരിച്ച അജ്ഞാതർക്കെതിരെ കേസെടുത്ത് പോലീസ്
യുപിയിലെ ലുലു മാൾ പരിസരത്ത് നമസ്‌കാരം നടത്തിയ അജ്ഞാതർക്കെതിരെ ലുലു മാൾ മാനേജ്‌മെന്റ് നൽകിയ പരാതിയിൽ പോലീസ് എഫ്‌ഐആർ ഫയൽ ചെയ്തു. ഐപിസി സെക്ഷൻ 153 എ, 295 എ, 341 എന്നിവ പ്രകാരം സുശാന്ത് ഗോൾഫ് സിറ്റി പോലീസ് സ്റ്റേഷനിലാണ് എഫ്‌ഐആർ രജിസ്റ്റർ ചെയ്തിരിക്കുന്നത്.
ഈ മാസം 10 ന് മുഖ്യമന്ത്രി യോഗി ആദിത്യനാഥാണ് മാൾ ഉദ്ഘാടനം ചെയ്തത്. തുറന്ന് ദിവസങ്ങൾക്കുള്ളിൽ, ഷോപ്പിംഗ് ഏരിയയിലെ തുറസ്സായ സ്ഥലത്ത് ചിലർ നമസ്‌കാരം അർപ്പിച്ചതായി റിപ്പോർട്ട് ചെയ്തതിനെ തുടർന്ന് ഇത് വിവാദമായി. സംഭവത്തിന്റെ വീഡിയോ സോഷ്യൽ മീഡിയയിൽ വൈറലായതോടെ വിവാദമായി. ഇതിനെത്തുടർന്ന് നിരവധി ഹിന്ദു സംഘടനകൾ എതിർപ്പ് ഉയർത്തുകയും ജനങ്ങൾക്കെതിരെയും മാൾ മാനേജ്‌മെന്റിനെതിരെയും നടപടി ആവശ്യപ്പെടുകയും ചെയ്തിരുന്നു.
മാളിൽ വീണ്ടും നമസ്‌കാരം നടത്തിയാൽ സുന്ദർ കാണ്ഡം ചൊല്ലുമെന്ന് അഖില ഭാരതീയ ഹിന്ദു മഹാസഭ പറയുകയുമുണ്ടായി . ഹിന്ദു സമൂഹത്തോട് മാൾ ബഹിഷ്‌കരിക്കാനും സംഘടന ആവശ്യപ്പെട്ടു. മാൾ ‘ലവ് ജിഹാദ്’ നടത്തുകയാണെന്ന് പ്രസ്താവനയിൽ ആരോപിച്ചു. മാളിൽ നിയമിച്ച ജീവനക്കാരിൽ 80 ശതമാനവും മുസ്ലീം സമുദായത്തിൽ നിന്നുള്ളവരാണെന്നും ബാക്കിയുള്ള 20 ശതമാനം ഹിന്ദു പെൺകുട്ടികളാണെന്നും സംഘടന ആരോപിച്ചിരുന്നു.
