ഉദയ്പൂർ കൊലപാതകം : ഐജിയും പൊലീസ് സൂപ്രണ്ടും ഉൾപ്പെടെ 32 പൊലീസ് ഉദ്യോഗസ്ഥർക്ക് സ്ഥലമാറ്റം
രാജസ്ഥാനിലെ ഉദയ്പൂരിൽ കനയ്യ ലാലിനെ (48) സോഷ്യൽ മീഡിയ പോസ്റ്റിന്റെ പേരിൽ കൊലപ്പെടുത്തിയതിന് പിന്നിൽ പൊലീസിൻെറ ജാഗ്രതക്കുറവാണെന്ന് ആരോപണമുയർന്നതിനെ തുടർന്നാണ് 32 ഉന്നത പോലീസ് ഉദ്യോഗസ്ഥരെ സ്ഥലം മാറ്റിയത്.
ഐജിക്കും ഉദയ്പൂർ പോലീസ് സൂപ്രണ്ടിനുമെതിരെയാണ് നടപടി. കനയ്യ ലാലിനെ ഒരു സംഘം പിന്തുടർന്ന് ഭീഷണിപ്പെടുത്തുന്നതായി കനയ്യ ലാൽ ധൻമാണ്ടി പൊലീസ് സ്റ്റേഷനിൽ പരാതി നൽകിയിരുന്നെങ്കിലും പൊലീസ് നിഷ്ക്രിയരാണെന്ന് കനയ്യ ലാലിന്റെ ഭാര്യ യശോദ ആരോപിച്ചിരുന്നു.
സോഷ്യൽ മീഡിയ പോസ്റ്റിലൂടെ അയൽവാസിയായ നസീം നൽകിയ പരാതിയെ തുടർന്ന് മെയ് 11നാണ് കനയ്യ ലാലിനെ അറസ്റ്റ് ചെയ്തത്. തുടർ ന്ന് ഇയാളെ വിട്ടയച്ചു. പിന്നീട് 15 ന് നസീം തന്നെ ഭീഷണിപ്പെടുത്തുകയാണെന്നും പൊലീസ് സംരക്ഷണം വേണമെന്നും കനയ്യ ആവശ്യപ്പെട്ടു. തൻ്റെ ജീവന് ഭീഷണിയുണ്ടെന്നും ചിലർ കട നിരീക്ഷിക്കുന്നുണ്ടെന്നും ഇയാൾ പൊലീസിനെ അറിയിച്ചു.
ജൂൺ 15 ന് ധൻമാണ്ടി പൊലീസിൽ നൽകിയ പരാതിയിൽ നസീമും മറ്റ് അഞ്ച് പേരും തൻ്റെ ഫോട്ടോ ചില ഗ്രൂപ്പുകൾക്ക് കൈമാറുന്നുണ്ടെന്നും കട തുറന്നാൽ തന്നെ കൊല്ലുമെന്നും അദ്ദേഹം പറഞ്ഞു.
ഗെയിം കളിക്കുന്നതിനിടെ മകൻ അറിയാതെ വിവാദ പോസ്റ്റ് ഷെയർ ചെയ്തെന്നും ഫോൺ എങ്ങനെ ഉപയോഗിക്കണമെന്ന് അറിയില്ലെന്നും പരാതിയിൽ പറയുന്നു. പൊലീസ് ഇരുവരെയും വിളിച്ചുവരുത്തി പ്രശ്നം പരിഹരിച്ചു. കനയ്യ നൽകിയ പരാതി ഗൗരവമായി എടുക്കാത്തതിന് നേരത്തെ എസ്.ഐയെയും എ.എസ്.ഐയെയും സസ്പെൻഡ് ചെയ്തിരുന്നു.