ഫോൺ രേഖകള് ഭര്ത്താവിന് ചോര്ത്തി നല്കി; കോഴിക്കോട് എസിപിക്കെതിരെ പരാതിയുമായി വീട്ടമ്മ
തന്റെ അറിവില്ലാതെ ഫോൺ രേഖകള് കോഴിക്കോട് മെഡിക്കല് കോളേജ് അസിസ്റ്റന്റ് പൊലീസ് കമ്മീഷണര് ഭര്ത്താവിന് ചോര്ത്തി നല്കിയെന്ന് പരാതിയുമായി വീട്ടമ്മ. എസിപി സുദര്ശന് എതിരെ പൊന്നാനിയിലെ വീട്ടമ്മ മലപ്പുറം എസ്പിക്ക് പരാതി നല്കിയതിൽ വകുപ്പുതല അന്വേഷണത്തില് എസിപിക്കെതിരെ നടപടിക്ക് ശുപാര്ശ ചെയ്യുകയും ചെയ്തിട്ടുണ്ട്.
എസിപി നൽകിയ ഫോണ് രേഖകള് ഭര്ത്താവ് ബന്ധുക്കള്ക്കും സുഹൃത്തുക്കള്ക്കും നല്കി അപമാനിക്കാൻ ശ്രമിച്ചെന്നും വീട്ടമ്മ പരാതിയിൽ ചൂണ്ടിക്കാട്ടി. പരാതി നൽകിയ വീട്ടമ്മയുടെ ഭര്ത്താവിന്റെ അടുത്ത സുഹൃത്താണ് അസിസ്റ്റന്റ് പൊലീസ് കമ്മീഷണര്.
ഭര്ത്താവ് തന്നെ ആവശ്യപ്പെട്ടത് അനുസരിച്ചാണ് എസിപി വീട്ടമ്മയുടെ ഫോൺ രേഖകള് സൈബര് സെല്ലിന്റെ സഹായത്തോടെ ചോര്ത്തിയത് എന്നാണ് വിവരം. അതേസമയം, കോഴിക്കോട് ചേവായൂര് കൂട്ട ബലാത്സംഗ കേസിന്റെ അന്വേഷണത്തിന്റെ മറവിലാണ് തെറ്റിദ്ധരിപ്പിച്ച് എസിപി ഫോൺ രേഖകള് ചോര്ത്തിയതെന്നാണ് സിറ്റി പൊലീസ് കമ്മീഷണര് സംഭവത്തിൽ ഡിജിപിക്ക് റിപ്പോര്ട്ട് നല്കിയിട്ടുള്ളത്.
വീട്ടമ്മയുടെ പരാതിയില് അന്വേഷണം നടത്തിയ മലപ്പുറം എസ്പി കഴിഞ്ഞ ദിവസം ഡിജിപിക്ക് റിപ്പോർട്ട് സമർപ്പിച്ചു. എസിപിയുടെ ഭാഗത്ത് നിന്നും ഗുരുതരമായ വീഴ്ച്ചയുണ്ടായെന്നും വകുപ്പുതല നടപടിയെടുക്കണമെന്നും റിപ്പോര്ട്ടിലുണ്ട്. സംഭവത്തില് കോഴിക്കോട് സിറ്റി പൊലീസ് കമ്മീഷണറും ഡിജിപിക്ക് റിപ്പോർട്ട് നല്കിയിട്ടുണ്ട്.