സംസ്ഥാനത്ത് ചൂട് കൂടുന്നു ; ജനങ്ങള്ക്ക് ജാഗ്രതാ നിര്ദേശവുമായി ആരോഗ്യവകുപ്പ്
സംസ്ഥാനത്ത് ചൂട് ഉയരുന്ന സാഹചര്യത്തില് ആരോഗ്യവകുപ്പ് ജാഗ്രതാ നിര്ദ്ദേശം പുറപ്പെടുവിച്ചു. തെരഞ്ഞെടുപ്പ് കാലമായതിനാല് പൊതുപ്രവര്ത്തകര് ഉള്പ്പെടെയുള്ള എല്ലാവരും ശ്രദ്ധിക്കണം. രാവിലെ 11 മണി മുതല് വൈകുന്നേരം മൂന്നുമണി വരെ നേരിട്ടുള്ള വെയില് കൊള്ളുന്നത് ഒഴിവാക്കേണ്ടതാണ്. നേരിട്ടുള്ള സൂര്യ പ്രകാശം ഏല്ക്കുമ്പോള് ആഘാതം വലുതായിരിക്കും.അതിനാല് കുടയോ, തൊപ്പിയോ ഉപയോഗിക്കേണ്ടതാണ്. ശരീരം ചൂടാകാതിരിക്കാന് ദാഹമില്ലെങ്കില് പോലും ധാരാളം വെള്ളം കുടിക്കണം. കുടിക്കുന്നത് ശുദ്ധജലമാണെന്ന് ഉറപ്പാക്കണം. ഇടയ്ക്കിടെ തണുത്ത വെള്ളത്തില് മുഖം കഴുകുന്നത് നല്ലതാണ്.
പ്രായമുള്ളവര്, കുട്ടികള്, ഹൃദ്രോഗം തുടങ്ങിയ രോഗമുള്ളവര്, കഠിന ജോലികള് ചെയ്യുന്നവര് എന്നിവര് പ്രത്യേകം ശ്രദ്ധിക്കണം. എന്തെങ്കിലും ശാരീരിക ബുദ്ധിമുട്ട് തോന്നിയാല് ഉടന് ചികിത്സ തേടേണ്ടതാണെന്നും ആരോഗ്യവകുപ്പ് നിര്ദേശം നല്കി.