അനധികൃതമായി വിട്ടുനില്ക്കല്: ആരോഗ്യ വകുപ്പിന് കീഴിലെ 432 ജീവനക്കാരെ സര്വീസില് നിന്നും നീക്കം ചെയ്യാന് ഉത്തരവ്
അനധികൃതമായി സര്വീസില് നിന്നും വര്ഷങ്ങളായി വിട്ടു നില്ക്കുന്ന ആരോഗ്യ വകുപ്പിന് കീഴിലുള്ള 385 ഡോക്ടര്മാരുള്പ്പെടെയുള്ള 432 ജീവനക്കാരെ സര്വീസില് നിന്നും നീക്കം ചെയ്യാന് സര്ക്കാര് ഉത്തരവിട്ടതായി ആരോഗ്യമന്ത്രി കെ കെ ശൈലജ അറിയിച്ചു.
പല തവണ അവസരം നല്കിയിട്ടും സര്വീസില് പ്രവേശിക്കുന്നതിന് താത്പര്യം പ്രകടിപ്പിക്കാത്ത ജീവനക്കാരെ നീക്കം ചെയ്യുന്നതിനാണ് തീരുമാനമെടുത്തത്. കോവിഡ് സാഹചര്യത്തില് ആരോഗ്യ മേഖലയില് ഡോക്ടര്മാരുടേയും മറ്റ് ജീവനക്കാരുടേയും സേവനം ആവശ്യമുണ്ട്. അതിനാല് തന്നെയാണ് ഇച്ഛാശക്തിയോടെ കര്ശനമായ നടപടി സ്വീകരിച്ചത് എന്ന് മന്ത്രി തന്റെ ഫേസ്ബുക്ക് പോസ്റ്റില് പറഞ്ഞു.
അനധികൃതമായി ജോലിക്ക് ഹാജരാകാതിരുന്ന മെഡിക്കല് വിദ്യാഭ്യാസ വകുപ്പിലെ 36 ഡോക്ടര്മാരെ നേരത്തെ പുറത്താക്കിയിരുന്നു. അനധികൃതമായി ജോലിക്ക് ഹജരാകാത്ത ആരോഗ്യ വകുപ്പിലെ ജീവനക്കാരെ കണ്ടെത്തി റിപ്പോര്ട്ട് നല്കുന്നതിനും കര്ശനമായ അച്ചടക്ക നടപടി സ്വീകരിക്കുന്നതിനും വകുപ്പിന് കര്ശന നിര്ദ്ദേശം നല്കിയിട്ടുണ്ട് എന്ന് മന്ത്രി അറിയിച്ചു.
അനധികൃതമായി വിട്ടുനിന്ന പ്രബേഷനന്മാരും സ്ഥിരം ജിവനക്കാരുമായ 385 ഡോക്ടര്മാരേയാണ് നടപടിക്രമങ്ങള് പാലിച്ചുകൊണ്ട് പിരിച്ചുവിടുന്നത്. ഇതിന് പുറമേ അനധികൃതാവധിയിലായ 5 ഹെല്ത്ത് ഇന്സ്പെക്ടര്മാര്, 4 ഫാര്മസിസ്റ്റുകള്, 1 ഫൈലേറിയ ഇന്സ്പെക്ടര്, 20 സ്റ്റാഫ് നഴ്സുമാര്, 1 നഴ്സിംഗ് അസിസ്റ്റന്റ്, 2 ദന്തല് ഹൈനീജിസ്റ്റുമാര്, 2 ലാബ് ടെക്നീഷ്യന്മാര്, 2 റേഡിയോഗ്രാഫര്മാര്, 2 ഒപ്റ്റോമെട്രിസ്റ്റ് ഗ്രേഡ്-രണ്ട്, 1 ആശുപത്രി അറ്റന്ഡര് ഗ്രേഡ്-രണ്ട്, 3 റെക്കോഡ് ലൈബ്രേറിയന്മാര്, 1 പി.എച്ച്.എന്. ട്യൂട്ടര്, 3 ക്ലാര്ക്കുമാര് എന്നിങ്ങനെ 47 ജീവനക്കാരേയുമാണ് പിരിച്ചുവിടുന്നത്.