അൺലോക്ക് നാലാം ഘട്ടം: മെട്രോ സർവീസുകൾ പുനരാരംഭിക്കും; സ്കൂള്‍- കോളേജുകള്‍ അടഞ്ഞ് തന്നെ
24 August 2020
കോവിഡ് വൈറസ് വ്യാപനത്തിനെ തുടർന്ന് രാജ്യത്ത് പ്രഖ്യാപിച്ച ലോക്ഡൗണിൽ സേവനം നിർത്തിയ മെട്രോ സർവിസുകൾ അടുത്ത മാസം മുതൽ പുനരാരംഭിക്കും. കേന്ദ്രത്തിന്റെ അൺലോക്ക് നാലാംഘട്ടത്തിൻെറ ഭാഗമായാണ് മെട്രോ സ്റ്റേഷനുകൾ തുറക്കുക എന്ന് കേന്ദ്ര ആഭ്യന്തര മന്ത്രാലയം അറിയിച്ചു.എന്നാൽ സ്കൂളുകളും കോളജുകളും തുറക്കില്ല. ബാറുകൾക്കും തുറന്ന് പ്രവർത്തിക്കാൻ അനുമതി നൽകിയിട്ടില്ല, എന്നാല്‍ കൗണ്ടറിലൂടെയുള്ള മദ്യവിൽപ്പന തുടരാമെന്ന് അറിയിക്കുന്നു.
രാജ്യത്തെ സിനിമാ തിയറ്റുകൾക്ക് തുറന്ന് പ്രവര്‍ത്തിക്കാന്‍ ഇക്കുറിയും അനുമതി നൽകിയിട്ടില്ല. നേരത്തെ ഡൽഹി മെട്രോ സർവിസ് പുനരാരംഭിക്കാൻ അനുമതി വേണമെന്ന് ആവശ്യപ്പെട്ട് ഡൽഹി മുഖ്യമന്ത്രി അരവിന്ദ് കെജ്രിവാൾ കേന്ദ്രത്തിന് കത്തെഴുതിയിരുന്നു.
