ചാരിറ്റിയായി ലഭിച്ച പണത്തിൻ്റെ പങ്കുവേണമെന്നു പറഞ്ഞ് ഭീഷണി: ഫിറോസ് കുന്നുംപറമ്പിൽ, സാജൻ കെച്ചേരി എന്നിവരുൾപ്പെടെ നാലുപേർക്കെതിരെ പൊലീസ് കേസെടുത്തു
അമ്മയുടെ കരള്മാറ്റ ചികിത്സയ്ക്ക് സഹായമായി ലഭിച്ച തുകയുടെ പങ്ക് ആവശ്യപ്പെട്ട് സന്നദ്ധ പ്രവര്ത്തകര് ഭീഷണിപ്പെടുത്തുന്നുവെന്ന പെണ്കുട്ടിയുടെ പരാതിയില് ഫിറോസ് കുന്നംപറമ്പില് ഉള്പ്പെടെ നാലു പേര്ക്കെതിരേ പൊലീസ് കേസെടുത്തു. തളിപ്പറമ്പ് സ്വദേശിനി വര്ഷയുടെ പരാതിയിലാണ് ചേരാനല്ലൂര് പൊലീസ് കേസെടുത്തത്. അമ്മ രാധയുടെ കരള്മാറ്റ ശസ്ത്രക്രിയയ്ക്കുള്ള പണത്തിനു വേണ്ടി സാമൂഹിക മാധ്യമങ്ങളിലൂടെ സഹായ അഭ്യര്ത്ഥന നടത്തി ലഭിച്ച തുകയുടെ പങ്കു ചോദിച്ചാണ് സാജൻ കെച്ചേരി ഉൾപ്പെടെയുള്ളവർ രംഗത്തെത്തിയത്.
ഫിറോസ് കുന്നംപറമ്പിലിനൊപ്പം സോഷ്യല് മീഡിയയിലൂടെ സാമൂഹിക സന്നദ്ധ പ്രവര്ത്തനം നടത്തുന്ന വ്യക്തിയാണ് സാജന് കേച്ചേരി, ഇവരുടെ സഹായികള് ആയ സലാം, ഷാഹിദ് എന്നീ നാലു പേര്ക്കെതിരെയും പൊലീസ് കേസെടുത്തിട്ടുണ്ട്. യുവതിയെ ഭീഷണിപ്പെടുത്തിയതിനും സമൂഹ മാധ്യമങ്ങളിലൂടെ അപമാനിച്ചതിനുമാണ് കേസ് രജിസ്റ്റര് ചെയ്തിരിക്കുന്നതെന്ന് ചേരാനല്ലൂര് പൊലീസ് പറഞ്ഞു.
ഇക്കഴിഞ്ഞ ജൂണ് 24-നാണ് അമ്മയുടെ ശസ്ത്രക്രിയയ്ക്ക് സഹായം അഭ്യര്ത്ഥിച്ച് വര്ഷ ഫെയ്സ്ബുക്കില് ലൈവില് എത്തുന്നത്. അതിനു പിന്നാലെ വര്ഷയ്ക്ക് സഹായവുമായി സാജന് കേച്ചേരി പിന്നീട് എത്തുകയായിരുന്നു. വലിയ തുക അക്കൗണ്ടിലേക്ക് വന്നപ്പോള് ജോയിന്റ് അക്കൗണ്ട് വേണമെന്ന് വര്ഷയോട് സന്നദ്ധ പ്രവര്ത്തകര് ആവശ്യപ്പെട്ടുവെങ്കിലും പെണ്കുട്ടി സമ്മതിക്കാതെയായതോടെ നിരന്തരം ഭീഷണി മുഴക്കുകയും പെണ്കുട്ടിയെ സമൂഹമാധ്യമങ്ങളില് അപമാനിക്കുകയും ചെയ്യുകയായിരുന്നു.
പണമാവശ്യപ്പെട്ട് ഭീഷണിപ്പെടുത്തിയെന്ന ആരോപണം വന്നതിന് പിന്നാലെ വര്ഷയ്ക്ക് പിന്തുണയുമായി ഫിറോസ് കുന്നംപറമ്പില് കഴിഞ്ഞ ദിവസം രംഗത്തെത്തിയിരുന്നു. വര്ഷയെ ഇനി കുറ്റപ്പെടുത്തരുത്, അവളും നമ്മുടെ കുഞ്ഞുപെങ്ങളല്ലേയെന്ന കുറിപ്പോടെയാണ് കണ്ണൂര് തളിപ്പറമ്പുകാരിയായ വര്ഷയെ പിന്തുണച്ച് സമൂഹമാധ്യമങ്ങളില് വീഡിയോ പുറത്തുവിട്ടു.