എസ് ഐയെ ഭീഷണിപ്പെടുത്തിയിട്ടില്ല; വിശദീകരണവുമായി സക്കീര് ഹുസൈന്
കൊച്ചി: കളമശേരി എസ്ഐയെ ഫോണില് വിളിച്ചു ഭീഷണിപ്പെടുത്തിയെന്ന ആരോപണത്തില് പ്രതികരിച്ച് സിപിഎം ഏരിയാ സെക്രട്ടറി സക്കീര് ഹുസൈന്. താന് എസ് ഐയെ ഭീഷണിപ്പെടുത്തിയിട്ടില്ലെന്നും എസ്ഐ അമൃത് രംഗനാണ് അപമര്യാദയായി പെരുമാറിയതെന്നും സക്കീര് ഹുസൈന് പറഞ്ഞു.
സക്കീര് ഹുസൈനും കളമശേരി എസ്ഐയും തമ്മിലുള്ള ഫോണ് സന്ദേശമാണു സമൂഹമാധ്യമങ്ങളിലൂടെ പ്രചരിച്ചത്. പരാതിക്കാരന്റെ ഫോണ് സംഭാഷണം റിക്കാര്ഡ് ചെയ്തു പ്രചരിപ്പിച്ച എസ്ഐയുടെ നടപടി കൃത്യവിലോപമാണെന്നും സക്കീര് ഹുസൈന് കൂട്ടിച്ചേര്ത്തു. കൊച്ചി ശാസ്ത്രസാങ്കേതിക സര്വകലാശാലയില് വിദ്യാര്ഥികള് തമ്മില് സംഘര്ഷമുണ്ടായപ്പോള് എസ്എഫ്ഐ ജില്ലാ പ്രസിഡന്റിനെ പിടികൂടി പോലീസ് ജീപ്പില് കയറ്റിയതിനെ ചോദ്യംചെയ്തായിരുന്നു ഏരിയ സെക്രട്ടറിയുടെ ഫോണ്.
“കളമശേരിയിലെ രാഷ്ട്രീയം മനസിലാക്കി പ്രവര്ത്തിക്കുന്നതു നല്ലതായിരിക്കും” എന്ന സക്കീര് ഹുസൈന്റെ മുന്നറിയിപ്പും “”ഞാന് ടെസ്റ്റ് എഴുതി പാസായതാണെന്നും എസ്ഐ ആയി കളമശേരിയില്തന്നെ ഇരിക്കാമെന്ന് ആര്ക്കും വാക്കുകൊടുത്തിട്ടില്ല” എന്ന എസ്ഐയുടെ മറുപടിയുമാണ് വൈറലായത്.