അമിതാഭ് ബച്ചൻ ബാക്കിവെച്ച ശൂന്യത യഷ് നികത്തുന്നു: കങ്കണ
കന്നഡ താരം യഷ് നായകനായി എത്തിയ കെജിഎഫ് ചാപ്റ്റർ 2 മികച്ച വിജയം സ്വന്തമാക്കിയ പിന്നാലെ യഷിനെ അമിതാഭ് ബച്ചനോട് ഉപമിച്ചിരിക്കുകയാണ് ബോളിവുഡ് താരം കങ്കണ. കഴിഞ്ഞ ഏതാനും പതിറ്റാണ്ടുകളായി ഇന്ത്യൻ സിനിമയ്ക്ക് നഷ്ടമായ ക്ഷുഭിത യൗവനം എന്നാണ് ഇൻസ്റ്റാഗ്രാം സ്റ്റോറിയിൽ അവർ യഷിനെ വിശേഷിപ്പിച്ചത്.
തൊള്ളായിരത്തി എഴുപതുകൾ മുതൽ അമിതാഭ് ബച്ചൻ ബാക്കിവെച്ച ശൂന്യത യഷ് നികത്തുന്നു, ഗംഭീരം എന്നും കങ്കണ പറഞ്ഞു. ബോളിവുഡിൽ ഡോൺ, ദീവാർ, അഗ്നിപഥ്, ശക്തി തുടങ്ങിയ ചിത്രങ്ങളിലൂടെയാണ് ക്ഷുഭിത യൗവനം എന്ന പേര് അമിതാഭ് ബച്ചൻ സമ്പാദിച്ചത്.
കെജിഎഫിന്റെ ഹിന്ദി പതിപ്പ് മാത്രം മൂന്ന് ദിവസങ്ങളില് നിന്ന് നേടിയിരിക്കുന്നത് 143.64 കോടി രൂപയാണ്. ഈ ചിത്രം റിലീസ് ചെയ്യപ്പെട്ട വ്യാഴാഴ്ച 53.95 കോടിയും വെള്ളിയാഴ്ച 46.79 കോടിയും ശനിയാഴ്ച 42.90 കോടിയുമാണ് നേടിയിരിക്കുന്നത്. പ്രമുഖ ട്രേഡ് അനലിസ്റ്റ് തരണ് ആദര്ശിന്റെ കണക്കാണ് ഇത്.