പ്രധാനമന്ത്രി നൽകിയ വിവരങ്ങൾ അർദ്ധ സത്യങ്ങൾ; മോദി രാജ്യത്തെ തെറ്റിദ്ധരിപ്പിക്കുന്നു: കോൺഗ്രസ്
ഇതുവരെ രാജ്യത്തെ ജനസംഖ്യയുടെ 21 ശതമാനം പേർക്ക് മാത്രമാണ് വാക്സിൻ പൂർണതോതിൽ നൽകിയതെന്ന് കോൺഗ്രസ്. ഇന്ന് രാജ്യത്തെ അഭിസംബോധന ചെയ്തുള്ള പ്രധാനമന്ത്രിയുടെ 100 കോടി വാക്സിനേഷൻ അവകാശവാദത്തിനു പിന്നാലെയാണ് വിമർശനവുമായി കോൺഗ്രസ് രംഗത്തെത്തിയത്.
പ്രധാനമന്ത്രി നരേന്ദ്ര മോദി രാജ്യത്തെയാകെ പ്രതിരോധ കുത്തിവയ്പ്പിലൂടെ തെറ്റിദ്ധരിപ്പിക്കുകയാണെന്നും കോൺഗ്രസ് ആരോപിച്ചു. ഈ വർഷം അവസാനത്തോടെ എല്ലാ മുതിർന്ന പൗരൻമാർക്കും പ്രതിരോധ കുത്തിവയ്പ്പ് നൽകുമെന്ന വാഗ്ദാനം നിറവേറ്റുന്നതെങ്ങനെയെന്നു സംബന്ധിച്ച് ധവളപത്രം പുറത്തിറക്കാൻ പ്രധാനമന്ത്രി തയാറാവണമെന്നും കോൺഗ്രസ് ആവശ്യപ്പെട്ടു.
ഇന്ന് രാജ്യത്തെ അഭിസംബോധന ചെയ്ത പ്രധാനമന്ത്രി വിലക്കയറ്റവും ഭീകരതയും സംബന്ധിച്ച വിഷയങ്ങളെക്കുറിച്ച് സംസാരിച്ചില്ല- കോൺഗ്രസ് വക്താവ് ഗൗരവ് വല്ലഭ് ആരോപിച്ചു. കോവിഡ് മൂലം ജീവൻ നഷ്ടപ്പെട്ട 4.53 ലക്ഷം ആളുകളുടെ കുടുംബങ്ങളെ അനുശോചനം അറിയിക്കുന്നതിനുപകരം പ്രധാനമന്ത്രി ആഘോഷിക്കുകയാണ്. രാജ്യം അഭിമുഖീകരിക്കുന്ന പ്രശ്നങ്ങളെക്കുറിച്ച് പ്രധാനമന്ത്രി സംസാരിക്കണം. പക്ഷെ അദ്ദേഹം “മഹോത്സവം’ കൊണ്ടാടുകയാണ്. തെറ്റായ വിവരങ്ങൾ പങ്കുവച്ച് പ്രധാനമന്ത്രി രാജ്യത്തെ തെറ്റിദ്ധരിപ്പിക്കുകയാണ്. പ്രധാനമന്ത്രി നൽകിയ വിവരങ്ങൾ അർധസത്യങ്ങളാണ്. അർധസത്യങ്ങൾ അപകടകാരിയാണെന്നും ഗൗരവ് വല്ലഭ് പറഞ്ഞു.