മഞ്ചേശ്വരം കോഴ; കെ സുരേന്ദ്രന് വീണ്ടും ക്രൈംബ്രാഞ്ച് നോട്ടീസ്
സംസ്ഥാന നിയമസഭാ തെരഞ്ഞെടുപ്പിലെ മഞ്ചേശ്വരം കോഴക്കേസുമായി ബന്ധപ്പെട്ട് ബിജെപി സംസ്ഥാന അധ്യക്ഷന് കെ സുരേന്ദ്രന് വീണ്ടും ക്രൈംബ്രാഞ്ച് നോട്ടീസ്. സുരേന്ദ്രന്റെ മൊബൈല് ഫോണ് പരിശോധനയ്ക്ക് ഹാജരാക്കണമെന്ന് ആവശ്യപ്പെട്ടാണ് ഇത്തവണ നോട്ടീസ് നല്കിയത്.
മുന്പ് സുരേന്ദ്രനെ അന്വേഷണ സംഘം ചോദ്യം ചെയ്തപ്പോള് നല്കിയ പ്രധാന മൊഴികളെല്ലാം കളവാണെന്നും കണ്ടെത്തിയിട്ടുണ്ട്. തെരഞ്ഞെടുപ്പില് ബിഎസ്പി സ്ഥാനാര്ത്ഥിയായിരുന്ന സുന്ദരയ്ക്ക് സ്ഥാനാര്തിത്വം പിന്വലിക്കാന് രണ്ടര ലക്ഷം രൂപയും സ്മാര്ട്ട് ഫോണും നല്കിയെന്നും ഭീഷണിപ്പെടുത്തിയെന്നുമാണ് കേസ്.
പിന്നാലെ, കേസിലെ നിര്ണ്ണായ തെളിവുകളില് ഒന്നായ മൊബൈല് ഫോണ് നഷ്ടപ്പെട്ടുവെന്നായിരുന്നു സുരേന്ദ്രന്റെ മൊഴി. പക്ഷെ ഇത് കളവാണെന്നും, ഈ ഫോണ് ഇപ്പോഴും ഉപയോഗിക്കുന്നുണ്ടെന്നാണ് അന്വേഷണ സംഘത്തിന്റെ കണ്ടെത്തല്. പരിശോധനയ്ക്കായി ഈ ഫോണ് ഒരാഴ്ചക്കകം ഹാജരാക്കാനാണ് സുരേന്ദ്രന് നോട്ടീസ് നല്കിയിരിക്കുന്നത്.