ബക്രീദ് നിയന്ത്രണങ്ങളില് തെറ്റായ വാര്ത്തകള് പ്രചരിപ്പിക്കുന്നവര്ക്കെതിരെ കര്ശന നടപടി
ജില്ലയില് ബക്രീദിനോടനുബന്ധിച്ച് ആരാധനാലയങ്ങളില് ഒരേസമയം 40 പേരെ മാത്രമേ അനുവദിക്കുകയുള്ളൂവെന്ന് മലപ്പുറം ജില്ലാ കലക്ടര് കെ ഗോപാലകൃഷ്ണന്. ഇവിടെ എത്തുന്നവര് കോവിഡ് നെഗറ്റീവ് സര്ട്ടിഫിക്കറ്റ് ഉള്ളവരോ കോവിഡ് വാക്സിനേഷന് സ്വീകരിച്ചവരോ ആയിരിക്കേണ്ടതാണെന്നും ആരാധനാലയങ്ങളില് എത്തുന്നവര്ക്ക് കോവിഡ് മാനദണ്ഡങ്ങള് സംബന്ധിച്ച് ബോധവല്ക്കരണം നടത്തേണ്ടതാണെന്നും കലക്ടര്അറിയിപ്പില് പറയുന്നു.
സര്ക്കാര് തീരുമാന പ്രകാരം ആരാധനാലയങ്ങളില് 40 പേര്ക്ക് മാത്രമായിരിക്കും പ്രവേശനം അനുവദിക്കുന്നത്. ഇത് സംബന്ധിച്ച് വരുന്ന തെറ്റായ വാര്ത്തകള്ക്കെതിരെ കര്ശന നിലപാട് സ്വീകരിക്കുന്നതാണെന്ന് കലക്ടര് അറിയിച്ചു. ബലികര്മ്മം നടക്കുന്ന സമയത്ത് വളരെ കുറച്ച് പേര് മാത്രമേ സ്ഥലത്ത് കൂടാന് പാടുള്ളൂ. ഇവര് നെഗറ്റീവ് സര്ട്ടിഫിക്കറ്റ് ഉള്ളവരോ, വാക്സിനേഷന് നടത്തിയവരോ ആയിരിക്കണം. ബലികര്മ്മം നടത്തിയ മാംസം വീടുകളിലേക്ക് പാര്സലായി വിതരണം ചെയ്യുന്നതിനുള്ള സജ്ജീകരണം ബന്ധപ്പെട്ടവര് നടത്തേണ്ടതാണ്.
ബക്രീദിനോടനുബന്ധിച്ച് ഗൃഹ സന്ദര്ശനം പരമാവധി ഒഴിവാക്കേണ്ടതാണ്. 10 വയസ്സിന് താഴെയുള്ളവരും, 60 വയസ്സിന് മുകളിലുള്ളവരും മറ്റ് അസുഖങ്ങള് ഉള്ളവരും വീടുകളില് നിന്ന് അനാവശ്യമായി പുറത്ത് പോകാന് പാടില്ല. ഇതിനെല്ലാം പുറമേ സര്ക്കാര് പുറപ്പെടുവിക്കുന്ന കോവിഡ് മാനദണ്ഡങ്ങള് കര്ശനമായി പാലിക്കേണ്ടതുമാണെന്ന് ജില്ലാ കലക്ടര് നിര്ദേശം നല്കി.