100 രൂപ കടന്ന പെട്രോൾവില വര്ദ്ധന; 100 സൈക്കിളിൽ 100 കി മി പ്രതിഷേധയാത്ര സംഘടിപ്പിച്ച് യൂത്ത് കോൺഗ്രസ്
തുടര്ച്ചയായ വില വര്ദ്ധനവിന്റെ ഫലമായി 100 കടന്ന ഇന്ധന വില വര്ദ്ധനവിനെതിരെ 100 സൈക്കിളിൽ 100 കി.മി പ്രതിഷേധയാത്ര നടത്തി യൂത്ത് കോൺഗ്രസ്. ഇന്ന് കായംകുളത്തുനിന്ന് സംസ്ഥാന പ്രസിഡൻറ് ഷാഫി പറമ്പിൽ എം എൽ എയുടെ നേതൃത്വത്തിൽ സംഘടിപ്പിച്ച സമരയാത്ര നൂറുകിലോമീറ്റർ പിന്നിട്ട് തലസ്ഥാനത്തെ രാജ്ഭവന് മുന്നിൽ സമാപിച്ചു.
രാജ്ഭവന് മുന്നിൽ പ്രതിഷേധ റാലിയുടെ സമാപനം കെ പി സി സി പ്രസിഡൻറ് കെ സുധാകരൻ ഉദ്ഘാടനം ചെയ്തു.സാധാരണ ജനങ്ങളുടെ ദുരിതം മനസ്സിലാക്കാത്ത പ്രധാനമന്ത്രിയാണ് രാജ്യം ഭരിക്കുന്നതെന്ന് അദ്ദേഹം കുറ്റപ്പെടുത്തി. നേരത്തെ യു പി എ ഭരണത്തിൽ ഇന്ധനവില 50 രൂപ ആയപ്പോൾ കാളവണ്ടിയിൽ യാത്രചെയ്ത് പ്രതിഷേധിച്ച ബി ജെ പി നേതാക്കാൾ വില 100 കടന്നിട്ടും ഇപ്പോള് മിണ്ടുന്നില്ല.
ജനങ്ങള് കോവിഡിന്വ്യാപനത്തിന്റെ പകച്ചുനിൽക്കുന്ന അവസരത്തില് തന്നെ രാജ്യത്തെ ജനങ്ങൾ ഇന്ധന വിലവർദ്ധനയെ തുടർന്നുള്ള നിത്യോപയോഗസാധനങ്ങളുടെ വിലക്കയറ്റത്തിൽ ദുരിതമനുഭവിക്കുകയാണ്. എന്നിട്ടുപോലും പ്രധാനമന്ത്രി ഒന്നുമറിഞ്ഞില്ല, ഒന്നും കേട്ടില്ല, ഒന്നും കണ്ടില്ല എന്ന ഭാവത്തിൽ മൗനത്തിലാണ്. ഈ ഫാഷിസ്റ്റ് ഭരണത്തെ തൂത്തെറിയണം -അദ്ദേഹം പറഞ്ഞു.